ايماقتار • 26 قاڭتار، 2022

اتىراۋدا بىرقاتار شەنەۋنىك جازالاندى

154 رەت كورسەتىلدى

اتىراۋدا ادەپ جونىندەگى كەڭەس وتىرىسىندا بىرنەشە شەنەۋنىككە قاتىستى تارتىپتىك ىستەر قارالدى، دەپ حابارلايدى Egemen.kz وبلىس اكىمدىگىنىڭ ءباسپاسوز قىزمەتىنە سىلتەمە جاساپ.

«ماحامبەت اۋدانى اكىمى اپپاراتىنىڭ باسشىسى بۇرىن قولدانىلعان تارتىپتىك جازاعا قاراماستان، ءوزىنىڭ ەڭبەككە ۋاقىتشا جارامسىزدىعى كەزەڭىندە قىزمەتتىك اۆتوكولىكتى پايدالانا وتىرىپ، زاڭناما تالاپتارىن بۇزدى. وسىعان بايلانىستى ادەپ جونىندەگى كەڭەس اتقاراتىن مەملەكەتتىك لاۋازىمىنان بوساتۋ تۋرالى ۇسىنىس ەنگىزدى»، دەلىنگەن اكىمدىك ءباسپاسوز قىزمەتىنىڭ حابارلاماسىندا.

سونداي-اق، اتىراۋ وبلىسى بويىنشا تەكسەرۋ كوميسسياسىنىڭ باسشىسىنا قاتاڭ سوگىس تۇرىندە تارتىپتىك جازا قولدانۋ ۇسىنىلدى. كەڭەستىڭ پىكىرىنشە، ول ۇجىم ىشىندە ىسكەرلىك ءارى دوستىق قارىم-قاتىناس ورناتا المادى.

جازانى اتىراۋ قالالىق جۇمىسپەن قامتۋ، الەۋمەتتىك باعدارلامالار جانە ازاماتتىق حال اكتىلەرىن تىركەۋ ءبولىمىنىڭ باسشىسى دا الدى. شەنەۋنىك قىزمەتكەرلەرگە دورەكىلىك تانىتتى. كەڭەس ەسكەرتۋ تۇرىندە تارتىپتىك جازا قولدانۋ تۋرالى شەشىم شىعاردى.

«سونداي-اق، يندەر اۋدانى اكىمدىگىنىڭ لاۋازىمدى تۇلعالارىنىڭ تارتىپتىك جازانى مەرزىمىنەن بۇرىن نەگىزسىز الىپ تاستاۋىنا جانە ەسبول اۋىلدىق وكرۋگى اكىمىنە 656 609 تەڭگە مولشەرىندە زاڭسىز سىياقى بەرۋىنە بايلانىستى ادەپ جونىندەگى كەڭەستىڭ شەشىمىمەن سىيلىقاقىنى مەملەكەت بيۋدجەتىنە قايتارۋ تۋرالى شارالاردى جۇزەگە اسىرۋ تۋرالى ۇسىنىس ەنگىزىلدى»، دەلىنگەن حابارلامادا.

سوڭعى جاڭالىقتار

ۇقساس جاڭالىقتار