كۋاگەرلەردىڭ ايتۋىنشا, 24 قاڭتار كۇنى تاڭەرتەڭ بۋركينا-فاسو پرەزيدەنتىنىڭ ۋاگادۋگۋ قالاسىنداعى رەزيدەنتسياسىنىڭ ماڭىندا اتىس دىبىستارى ەستىلگەن.
ەستەرىڭىزدە بولسا, 23 قاڭتاردا ۋاگادۋگۋ قالاسىنداعى ەكى اسكەري كازارمادا اتىس بولعانى جايلى حابارلاعانبىز.
وسىدان كەيىن بۇقارالىق اقپارات قۇرالدارىندا كوتەرىلىس بولدى دەگەن مالىمدەمەلەر پايدا بولدى. بىراق ۇكىمەت بيلىكتى قارۋلى باسىپ الۋ ارەكەتىن جوققا شىعارعان ەدى.
بۋركينا-فاسونىڭ قارۋلى كۇشتەر ءمينيسترى بارتەلەمي سيمپورا جاعدايدىڭ باقىلاۋدا ەكەنىن ايتتى.
بيلىك وكىلدەرىنىڭ ايتۋىنشا, ساربازدار مەملەكەتتىك توڭكەرىس جاساۋ ماقساتىمەن ەمەس, ەڭبەك جاعدايىن جاقسارتۋدى تالاپ ەتىپ كوتەرىلىسكە شىققان.
وسىعان بايلانىستى ەل بويىنشا ءموبيلدى ينتەرنەت اجىراتىلدى.
ارتىنشا ءبىر توپ ازامات كوشەگە شىعىپ, ۇكىمەتتىڭ «پروگرەسس حالىقتىق قوزعالىسى» پارتياسىنىڭ كەڭسەسىنە شابۋىل جاسادى.
شابۋىلدان كەيىن ەل بويىنشا ساعات 20:00-دەن 05:30-عا دەيىن كومەندانتتىق ساعات جاريالاندى.
بۋركينا-فاسوداعى وقۋ ورىندارىندا ساباق ەكى كۇنگە توقتاتىلدى.
