ۆيرۋس جۇقتىرۋ ازايماي تۇر

كوروناۆيرۋستىڭ گرەك ءالفاۆيتىنىڭ «وميكرون» ارپىمەن بەلگىلەنەتىن B.1.1.529 شتامى 2021 جىلى افريكانىڭ وڭتۇستىگىنەن تابىلدى. سوڭعى مالىمەتتەرگە زەر سالساق، رەسەيدە بۇل شتامدى 1 682 ادام جۇقتىرعان. جاڭا ينفەكتسيامەن كۇرەسۋ جونىندەگى فەدەرالدى جەدەل شتابتىڭ سوڭعى ستاتيستيكاسى بويىنشا رەسەيدە ينفەكتسيانىڭ جاڭا جاعدايلارى اراسىندا كوروناۆيرۋستىڭ «دەلتا» شتامىنىڭ ۇلەسى ءبىر كۇن بۇرىن 52،3%-عا دەيىن تومەندەدى. «وميكرون» مەن باسقا شتامداردىڭ ۇلەسى 47،7%-عا دەيىن ءوستى. «وميكرون» ەلدىڭ 52 وڭىرىندە تىركەلگەن.

وتكەن تاۋلىكتە رەسەيدە كوروناۆيرۋس ينفەكتسياسىن جۇقتىرعان 49 513 ناۋقاس تىركەلىپ، 9 136 ادام اۋرۋحاناعا جاتقىزىلدى، دەپ حابارلايدى Covid-19 تارالۋىنا جول بەرمەۋ جونىندەگى ۆەدوم­ستۆوارالىق كوميسسيا. ناۋقاستار، اسىرەسە ماس­كەۋدە كوپ انىقتالدى. ەل استاناسىندا 15 987 ناۋ­قاس تىركەلگەن، سانكت-پەتەربۋرگتە – 5 922 جانە ماس­كەۋ وبلىسىندا 4 424 جاعداي انىقتالعان. كورو­نا­ۆيرۋس سالدارىنان 692 ناۋقاس قايتىس بولعان.

جۇقپالى اۋرۋلار بويىنشا مامان ەۆگەني تيما­كوۆ رەسەيدە COVID-19 ۆيرۋسىن جۇقتىرۋ اقپان ايىنىڭ ورتاسىندا ءورشيدى دەپ مالىمدەدى. ماس­كەۋدە ول ءسال ەرتەرەك بولۋى مۇمكىن ەكەنىن دە ەس­كەرتتى. سەبەبى «وميكرون» شتامىنىڭ ينكۋبا­تسيا­لىق كەزەڭى ەكى-ءۇش كۇن، ەڭ كوبى جەتى كۇن، دەيدى ما­مان.

سوندىقتان كوپتەگەن ەل كارانتين شارالارىن كۇشەيتۋگە كوشتى. ماسەلەن، يتاليا ۇكىمەتى ەل تۇرعىندارى گرين-پاسساسىز، ياعني جاسىل پاسپورتسىز تەك دارىحانالارعا، ازىق-ت ۇلىك دۇكەندەرىنە جانە ءۇي جانۋارلارىنا ارنالعان دۇكەندەرگە بارا الادى دەپ مالىمدەدى. ال 1 اقپاننان باستاپ بانك بولىمشەلەرىنە، پوشتا مەن مەملەكەتتىك مەكەمەلەر كەڭسەلەرىنە بارۋ ءۇشىن كوروناۆيرۋس انىقتالماعانىن راستايتىن تەست ناتيجەسى قاجەت بولادى. سونىمەن قاتار اقپان ايىنان باستاپ 50 جاستان اسقان ادامدارعا ۆاكتسينا الۋ مىندەتتەلەدى.

اۋستريانىڭ ۇلتتىق كەڭەسى دە مىندەتتى ۆاكتسينالاۋ تۋرالى زاڭ قابىلدادى. وسىلايشا، اۋستريا – ەۋروپا وداعىندا كوروناۆيرۋسقا قارسى ەكپە مىندەتتى سانالاتىن العاشقى ەل بولماق. قابىلدانعان قۇجاتتىڭ 2024 جىلعى 31 قاڭتارىنا دەيىن زاڭدىق كۇشى بار. اتالعان زاڭعا سايكەس، ناۋ­رىز ايىنان باستاپ ەكپە سالدىرماعان ازاماتتار 600 ەۋرو كولەمىندە ايىپپۇل تولەيدى.

حالىقتى ەكپە سالدىرۋعا ىنتالاندىرۋ ءۇشىن بيلىك ۆاكتسينا العاندار اراسىندا سىيلىقتار ۇتىسىن ويناتۋدى جوسپارلاپ وتىر. لوتەرەيانىڭ ءاربىر ونىنشى قاتىسۋشىسى 500 ەۋرو كولەمىندەگى اقشالاي كۋپون ۇتىپ الا الادى.

رەسەيلىك «دنكوم» مولەكۋلالىق-گەنەتيكالىق زەرتتەۋلەر عىلىمي ورتالىعىنىڭ نەگىزىن قالاۋشى جانە باس ديرەكتورى اندرەي يساەۆ كورونا­ۆي­رۋس­تىڭ «دەلتا» شتامىن جۇقتىرعاننان كەيىن ورگانيزمدە قالىپتاسقان انتيدەنەلەر «وميكروننان» قور­عايدى، الايدا بۇل پروتسەسس ءالسىز دەگەن تۇ­جى­رىم ايتادى.

«وكىنىشكە قاراي، زەرتتەۋ ناتيجەسى «وميكرون» جۇقتىرعاننان كەيىن قالىپتاساتىن يممۋنيتەت باسقا شتامداردان قورعاۋدا ءالسىز ەكەنىن دالەلدەدى. «دەلتادان» كەيىن پايدا بولاتىن انتيدەنە «وميكروننان» ازداپ بولسىن قورعايدى، ال «وميكروننان» كەيىن تۇزىلگەن انتيدەنە «دەلتاعا» قارسى وتە ءالسىز»، دەپ اتاپ ءوتتى ساراپشى.

كوروناۆيرۋسپەن كۇرەس جولىندا ءار ەل وزىنشە ءتاسىل تاۋىپ جاتىر. ماسەلەن، بەلگيا كورولدىگى «كوروناۆيرۋس بارومەترىن» ەنگىزەتىنىن حابارلادى. بۇل «بارومەتر» ءۇش تۇستەن تۇرادى – قىزىل، سارى جانە قىزعىلت سارى. سارى ەپيدەميالىق جاع­دايدىڭ باقىلاۋدا ەكەنىن، قىزعىلت سارى ەپي­دەميالىق جاعدايدىڭ ناشارلاعانىن، قى­زىل دەنساۋلىق ساقتاۋ سالاسىندا جۇمىس اۋىرت­پا­لىعىنىڭ ارتۋ قاۋپىن بىلدىرەدى.

بەلگيا پرەمەر-ءمينيسترى الەكساندر دە كروو بۇل ەپيدەميالىق جاعدايدى باقىلاۋدا ۇستاۋ ءۇشىن ءتيىمدى ءتاسىل دەيدى.