ءبىلىم • 21 قاڭتار، 2022

بالالاردى ىنتالاندىرۋدىڭ تىڭ جولىن تاپتى

ەكىباستۇزدىق مۇعالىم داريا دوشيموۆا وقۋشىلاردىڭ وقۋعا دەگەن ىنتاسى مەن قىزىعۋشىلىعىن ارتتىرۋ ءۇشىن ءتۇرلى ويىن تەحنولوگيالارىن قولدانا باستاعان، دەپ حابارلايدى Egemen.kz قر ءبىلىم جانە عىلىم مينيسترلىگىنىڭ ءباسپاسوز قىزمەتىنە سىلتەمە جاساپ.

تابيعات مۇسىلمانقۇل

ول پاۆلودار وبلىسى ەكىباستۇز قالاسىنداعى №35 مەكتەپ-گيمنازياسىندا «كاسىپكەرلىك جانە بيزنەس نەگىزدەرى» پانىنەن ساباق بەرەدى. سونىمەن قاتار Youtube-تە ءبىلىم بەرۋ كانالىن جۇرگىزەدى جانە جالپى ءبىلىم بەرەتىن پاندەردى وقىتۋدا گەيميفيكاتسيا ءادىسىن پايدالانۋدى ەنگىزگەن.

پەداگوگ ەكىباستۇزدا رەسپۋبليكالىق جاس كاسىپكەرلەر كلۋبىن قۇرعان. كلۋبتىڭ پرەزيدەنتى – قالالىق №35 مەكتەپتىڭ 10 «ا» سىنىپ وقۋشىسى. بۇگىندە كلۋبتىڭ فيليالدارى سەمەي جانە قىزىلوردا قالالارىندا دا اشىلعان. داريا دوشيموۆا وقۋشىلار اراسىندا ويىن تۋرنيرلەرىن ۇيىمداستىرۋعا اتسالىسىپ تۇرادى.

ۇستاز ءبىلىم بەرۋ سالاسىندا 15 جىلدان استام ۋاقىت جۇمىس ىستەيدى. وسى جىلدار ىشىندە داريا دوشيموۆا وقىتۋدىڭ ءتۇرلى ادىستەرىن ويلاپ تاپقان. بۇگىندە ول جۇزدەگەن شاكىرت تاربيەلەگەن بىلىكتى ۇستاز. شاكىرتتەرى داريانىڭ جۇمىسقا شىعارماشىلىق كوزقاراسپەن قارايتىن كاسىبي مامان ەكەنىن ايتادى.

4566

«قازىرگى زاماننىڭ بالالارىن ينتەرنەتتەن الشاقتاتۋ ءۇشىن وعان بالاما رەتىندە ۇستەل ويىندارىن ويلاپ تاپتىق. ويتكەنى، شىنايى ومىردەگى زياتكەرلىك ويىن ونلاين ويىندارعا قاراعاندا الدەقايدا پايدالى. بالالار ۋاقىتىن قىزىقتى ءارى ءتيىمدى وتكىزگەنىن قالايمىن. ەكونوميكا جانە قارجىلىق ساۋاتتىلىق باعىتتارى بويىنشا ۇستەل ويىنىن نەگىزگە الىپ وتىرمىن. ول ويىندى بالالار جەتى ساعات بويى ءۇزىلىسسىز وينايدى. بۇل ۇستەل ويىنى بالاعا قارجىلىق ساۋاتتىلىقتى ۇيرەتەدى. ەندى مەن وقۋشىلار باسقا پاندەردى دە قىزىعۋشىلىقپەن وقۋى ءۇشىن وسىنداي ويىنداردى ەنگىزۋدى جوسپارلاپ وتىرمىن. كاسىپكەرلىك نەگىزدەرىمەن تانىسۋ ءۇشىن وتكىزىلەتىن ويىندارعا قاتىسقان مەكتەپ وقۋشىلارى مەن كوللەدج ستۋدەنتتەرى ءپاندى وقىتۋدىڭ وسىنداي ادىستەرى وزدەرىنە ۇنايتىنىن ايتادى»، دەيدى داريا دوشيموۆا.

ول - پاۆلودار وبلىسى پەداگوگتەرىنىڭ اراسىنداعى شاڭعى جارىسىنىڭ التىن مەدالىن العان، باسكەتبول ويىندارىنىڭ سەگىز دۇركىن جۇلدەگەرى. قازىرگى ۋاقىتتا داريا دوشيموۆا شەت تىلدەر مەن پسيحولوگيا سالاسىن مەڭگەرۋدە.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز