ۇكىمەت • 19 قاڭتار، 2022

ۆاك شتاتتىق فورماتتا وقۋعا رۇقسات بەردى

بۇگىن پرەمەر-ءمينيستردىڭ ورىنباسارى ەرالى توعجانوۆتىڭ توراعالىعىمەن قازاقستان اۋماعىندا كوروناۆيرۋس ينفەكتسياسىنىڭ تارالۋىنا جول بەرمەۋ جونىندەگى ۆەدومستۆوارالىق كوميسسيانىڭ وتىرىسى ءوتتى، دەپ حابارلايدى Egemen.kz.

گاۋھار قاپاش

دەنساۋلىق ساقتاۋ ءمينيسترى اجار عينيات سوڭعى اپتادا ەپيدەميولوگيالىق احۋال ورتاشا ەسەپپەن 5،6 ەسە ناشارلاي تۇسكەنىن اتاپ ءوتتى.

سىرقاتتانۋشىلىقتىڭ ءوسۋى قاراعاندى وبلىسىندا – 28 ەسە، الماتى وبلىسىندا – 11 ەسە، اتىراۋ، اقمولا وبلىستارىندا جانە الماتى قالاسىندا – 9-9،5 ەسە. ۆيتسە-پرەمەر ينفەكتسيانىڭ تارالۋىن تەجەۋ ءۇشىن ازاماتتاردى ۆاكتسينالاۋ جانە رەاكتسينالاۋ قارقىنىن كۇشەيتۋدى تاپسىردى.

سونداي-اق ۆەدومستۆوارالىق كوميسسيا كوروناۆيرۋس ينفەكتسياسىن ەمدەۋ ءۇشىن جاڭا دارىلىك پرەپاراتتاردى ەرەكشە جاعدايلاردا پايدالانۋدى قولدادى.

ۆاك تالقىلاۋىنىڭ قورىتىندىسى بويىنشا وقىتۋدىڭ شتاتتىق فورماتىنا رۇقسات بەرۋ ۇسىنىلدى:

- مەكتەپكە دەيىنگى ۇيىمداردا – اتا-انالاردىڭ وتىنىشتەرى بويىنشا («قىزىل»، «سارى»، «جاسىل» ايماقتاردا);

- وقۋشى سانى 600-گە دەيىن (قوسا العاندا) جالپى ءبىلىم بەرەتىن مەكتەپتەردە;

- وقۋشى سانى 600-دەن اساتىن جالپى ءبىلىم بەرەتىن مەكتەپتەردە – جوبالىق قۋاتتىڭ 50% اسپايتىن جۇكتەمەمەن; - جالپى ءبىلىم بەرەتىن مەكتەپتەردە – باستاۋىش 1-4 سىنىپتار (حالىقارالىق مەكتەپتەردە 5-6 سىنىپتاردى قوسا العاندا);

- مەكتەپتەن تىس ۇيىمداردا – جەكە ساباقتار، توپتىق ساباقتار – 15 ادامعا دەيىن، مۇمكىندىگى شەكتەۋلى بالالارعا ارنالعان تۇزەتۋ كابينەتتەرىندە (ورتالىقتارىندا)، ەرەسەكتەردە – جەكە جانە توپتىق ساباقتار – 8 ادامعا دەيىن;

- كوللەدجدەر مەن جوعارى وقۋ ورىندارىندا – ارالاس فورماتتا: پراكتيكالىق، زەرتحانالىق، سەمينارلىق ساباقتار، وندىرىستىك پراكتيكا – يكەمدى گرافيك بويىنشا شتاتتىق رەجيمدە، دارىستەر – ونلاين.

كەڭەس بارىسىندا اتاپ وتىلگەندەي، ورتا ءبىلىم بەرۋ ۇيىمدارىندا، كوللەدجدەردە، جوعارى وقۋ ورىندارىندا بارلىق ءبىلىم الۋشىلاردى قاشىقتان وقىتۋ فورماتىنا اۋىستىرۋ كارانتين رەجيمىن بۇزۋشىلىقتار انىقتالعان كەزدە قولدانىلاتىن بولادى.

كەڭەس سوڭىندا ەرالى توعجانوۆ مەملەكەتتىك ورگاندار مەن اكىمدىكتەردىڭ باسشىلارىنا كوروناۆيرۋس ينفەكتسياسىنىڭ تارالۋىنا جول بەرمەۋ بويىنشا ۇكىمەت قابىلداپ جاتقان شارالاردىڭ ساقتالۋىن باقىلاۋدى قامتاماسىز ەتۋ جونىندە ناقتى تاپسىرمالار بەردى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز