ەكونوميكا • 18 قاڭتار، 2022

ۇكىمەت الەۋمەتتىك جاعدايدى تۇراقتاندىرۋ بويىنشا جوسپار ۇسىندى

146 رەت كورسەتىلدى

ۇلتتىق ەكونوميكا مينيسترلىگىندە قازاقستانداعى الەۋمەتتىك-ەكونوميكالىق جاعدايدى تۇراقتاندىرۋ بويىنشا جەدەل ءىس-قيمىل جوسپارى تانىستىرىلدى، دەپ حابارلايدى Egemen.kz.

ۇلتتىق ەكونوميكا ءمينيسترى الىبەك قۋانتىروۆتىڭ ايتۋىنشا، مەملەكەت باسشىسىنىڭ تاپسىرماسىن ورىنداۋ ماقساتىندا مينيسترلىك ورتالىق مەملەكەتتىك ورگاندارمەن جانە ۇيىمدارمەن بىرلەسىپ، «قازاقستان رەسپۋبليكاسىنداعى الەۋمەتتىك-ەكونوميكالىق جاعدايدى تۇراقتاندىرۋ بويىنشا جەدەل ءىس-قيمىل جوسپارىن بەكىتۋ تۋرالى» قر ۇكىمەتى قاۋلىسىنىڭ جوباسىن ازىرلەدى.

«جوسپار قوعامدىق ءتارتىپ پەن قاۋىپسىزدىكتى قالپىنا كەلتىرۋ، الەۋمەتتىك جانە باسقا دا ينفراقۇرىلىمدار، الەۋمەتتىك ماسەلەلەر، باعانىڭ نەگىزسىز وسۋىنە جول بەرمەۋ، حالىق پەن كاسىپكەرلىكتى قولداۋ جانە ۇيىمداستىرۋ - قارجى ماسەلەلەرى بويىنشا 51 ءىس-شارادان تۇرادى. قوعامدىق ءتارتىپ پەن قاۋىپسىزدىكتى، الەۋمەتتىك جانە باسقا دا ينفراقۇرىلىمدى قالپىنا كەلتىرۋ باعىتى بويىنشا جوسپاردا 11 ءىس-شارا كوزدەلگەن. وسىلايشا، مەملەكەت باسشىسىنىڭ كۇشتىك قۇرىلىمدار قىزمەتكەرلەرىنىڭ جاۋىنگەرلىك ازىرلىگىن ارتتىرۋ جانە مورالدىق رۋحىن قولداۋ، زاقىمدالعان جىلجىمايتىن م ۇلىك وبەكتىلەرىن قالپىنا كەلتىرۋ، سونداي-اق كۇشتىك قۇرىلىمداردىڭ، دەنساۋلىق ساقتاۋ، ءبىلىم بەرۋ جانە كوممۋنالدىق شارۋاشىلىق سالالارىنىڭ ماتەريالدىق-تەحنيكالىق بازاسىن قالپىنا كەلتىرۋ جونىندەگى تاپسىرمالارىن ىسكە اسىرۋ كوزدەلىپ وتىر»، دەپ ءتۇسىندىردى الىبەك قۋانتىروۆ ۇكىمەت وتىرىسى بارىسىندا.

الەۋمەتتىك ماسەلەلەر باعىتى بويىنشا 10 ءىس-شارانى ىسكە اسىرۋ جوسپارلانۋدا. ولار جاراقات العان ءتيىستى ورگانداردىڭ قىزمەتكەرلەرىنە وتەماقى تولەۋدى، قازا تاپقان وسى ورگاندار مەن بەيبىت ازاماتتاردىڭ وتباسىلارىنا كومەك كورسەتۋدى، بيزنەس پەن حالىققا بورىش جۇكتەمەسىن ازايتۋ شارالارىن، مۇقتاج ازاماتتارعا تۇرعىن ءۇي كومەگىن كورسەتۋدىڭ جاڭا ءتارتىبى مەن تەتىگىن ەنگىزۋدى قامتيدى.

ءمينيستردىڭ ايتۋىنشا، باعانىڭ نەگىزسىز وسۋىنە جول بەرمەۋ باعىتىندا 15 ءىس-شارانى ىسكە اسىرۋ جوسپارلانعان. بۇل ءىس-شارالار سۇيىتىلعان مۇناي گازىن وتكىزۋدىڭ جاڭا تەتىگىن ازىرلەۋدى، الەۋمەتتىك ماڭىزى بار ازىق-ت ۇلىك تاۋارلارىنىڭ باعالارىن تۇراقتاندىرۋ جونىندەگى فورۆاردتىق تەتىكتەردى قارجىلاندىرۋدى ۇلعايتۋدى جانە كومىر باعاسىنىڭ وسۋىنە جول بەرمەۋ جونىندەگى شارالاردى قامتيدى. ال حالىق پەن كاسىپكەرلىكتى قولداۋ باعىتى بويىنشا 7 ءىس-شارانى ىسكە اسىرۋ كوزدەلگەن.

«ماسەلەن، باستالعان سالىقتىق جانە كەدەندىك تەكسەرۋلەردى 2022 جىلعى 1 اقپانعا دەيىنگى مەرزىمدە توقتاتا تۇرۋ جانە كەيىنگە قالدىرۋ، كادەگە جاراتۋ الىمىنىڭ مولشەرلەمەلەرى مەن تاسىلدەرىن قايتا قاراۋ، 2022 جىلعى 20 ساۋىرگە دەيىنگى كەزەڭگە قۇرىلىستاردى كوشىرۋگە، ورنالاستىرۋعا، بۇزۋعا بايلانىستى اتقارۋشىلىق ارەكەتتەردى جۇرگىزۋگە ۋاقىتشا تىيىم سالۋدى ەنگىزۋ جوسپارلانۋدا. ۇيىمداستىرۋ-قارجىلىق ماسەلەلەر باعىتى بويىنشا 8 ءىس-شارانى ىسكە اسىرۋ جوسپارلانۋدا. ولار تەڭگەگە دەگەن سەنىمدى تولىق قالپىنا كەلتىرگەنگە دەيىن ۆاليۋتا نارىعىنىڭ تۇراقتىلىعىن قامتاماسىز ەتۋدى، باتىس وڭىرلەر ءۇشىن الەۋمەتتىك-ەكونوميكالىق دامۋدىڭ كەشەندى جوسپارلارىن ازىرلەۋدى نەمەسە وزەكتەندىرۋدى، جاپپاي تارتىپسىزدىكتەر سالدارىن جويۋ جونىندەگى ءىس-شارالاردى قارجىلاندىرۋدى قامتاماسىز ەتۋ ءۇشىن 2022 جىلعا ارنالعان رەسپۋبليكالىق بيۋدجەتتى ناقتىلاۋدى قامتيدى»،  دەدى الىبەك قۋانتىروۆ.

مينيستر ۇسىنىلعان جەدەل ءىس-قيمىل جوسپارى مەملەكەت باسشىسىنىڭ تاپسىرمالارىن ەسكەرە وتىرىپ، جاقىن اراداعى بىرنەشە اي ىشىندە مەملەكەتتىك ورگانداردىڭ ءتيىستى مىندەتتەردى ۇيلەستىرە شەشۋىنە باعىتتالعانىن اتاپ ءوتتى.

«جوسپاردى ىسكە اسىرۋ ەلدەگى ەكونوميكالىق جاعدايدى جەدەل قالپىنا كەلتىرۋگە جانە كۇندەلىكتى ومىرگە ورالۋعا اكەلەدى. جوبا قارجى، ادىلەت مينيسترلىكتەرىمەن، سونداي-اق باسقا دا مەملەكەتتىك ورگاندارمەن كەلىسىلدى»، دەپ قوستى مينيستر.

سوڭعى جاڭالىقتار

ۇقساس جاڭالىقتار