«كارانتين تالاپتارىنا سايكەس وقۋ ورنى عيماراتىندا, كىتاپحانا جانە جاتاقحانانىڭ كىرە بەرىسىندە Ashyq قوسىمشاسىنىڭ بولۋى جانە ونى قولدانۋ مىندەتتى. تىنىس الۋ جولدارىنىڭ ينفەكتسياسىنىڭ بەلگىلەرى بار (جوتەل, مۇرىننان سۋ اعۋ, دەنە تەمپەراتۋراسى 37-دەن جوعارى) ادامداردى وقۋ عيماراتىنا كىرگىزۋگە بولمايدى. سونىمەن قاتار ماسكا رەجيمى ساقتالادى. جانە ستۋدەنتتەردەن پتر تەستىن تالاپ ەتۋگە جول بەرىلمەيدى», دەدى قر ءبىلىم جانە عىلىم مينيسترلىگى جوعارى جانە جوعارى وقۋ ورنىنان كەيىنگى ءبىلىم دەپارتامەنتىنىڭ ديرەكتورى ادىلەت تويباەۆ وكق-دە وتكەن بريفينگتە.
ونىڭ ايتۋىنشا, بۇگىندە ەلىمىزدە 5 مىڭنان استام ستۋدەنت جاتاقحانادا تۇرادى.
«جوعارى وقۋ ورىندارى باسقا قالادان كەلەتىن ستۋدەنتتەردى جاتاقحاناعا ورنالاستىرۋدى الدىن الا قامتاماسىز ەتەدى. سونداي-اق, كوروناۆيرۋستىق ينفەكتسياعا قارسى ۇجىمدىق يممۋنيتەتتى قالىپتاستىرۋ ماقساتىندا ۋنيۆەرسيتەتتەر پروفەسسور-وقىتۋشىلار قۇرامى مەن قىزمەتكەرلەردى, ستۋدەنتتەردى تولىق ۆاكتسيناتسيالاۋعا تارتۋ بويىنشا اقپاراتتىق-ءتۇسىندىرۋ جۇمىسىن جالعاستىرىپ جاتىر. بۇگىنگى تاڭدا جوعارى وقۋ ورىندارى ستۋدەنتتەرى اراسىندا 18 جاسقا تولماعان جانە مەديتسينالىق انىقتاماسى بارلاردى ەسەپكە العاندا 81,3%-ى, پروفەسسورلىق-وقىتۋشىلار قۇرامى اراسىندا 94,6% (14 قاڭتار) ەكپە الدى», دەيدى ول.
سونداي-اق دەپارتامەنت ديرەكتورى كارانتين تالاپتارىن ساقتاي وتىرىپ, وقۋ كەستەسىنىڭ بۇزىلماۋىنا ەرەكشە ءمان بەرىلەتىنىن ايتتى.
