اتالعان دودادا توعىزىنشى نومىرمەن ونەر كورسەتىپ جاتقان ەلەنا العاشقى اينالىمدا بىلتىرعى US Open ءتۋرنيرىنىڭ جەڭىمپازى بريتانيالىق ەمما رادۋكانۋمەن كەزدەسىپ, ايقىن باسىمدىقپەن جەڭىسكە جەتتى. دۇنيەجۇزىلىك رەيتينگتە 18-ورىنعا جايعاسقان رادۋكانۋ جەرلەسىمىزگە تەك ءبىر گەيم عانا قارسىلىق كورسەتە الدى. 56 مينۋتقا عانا سوزىلعان ويىندا ە.رىباكينا قارسىلاسىن ەكى سەتتە – 6:0, 6:1 ەسەبىمەن ۇتتى. بۇل سپورتشىلار اراسىنداعى العاشقى كەزدەسۋ بولدى. وتانداسىمىز ماتچ بارىسىندا ءتورت ەيس جاساپ, دوپتى ويىنعا قوسۋ ساتىندە ءبىر مارتە قاتەلەستى. ەندى قازاقستاندىق تەننيسشى كەلەسى كەزەڭدە فرانتسيالىق كارولينا گارسيامەن شەبەرلىك بايقاسادى.
وسى ءتۋرنيردىڭ جۇپتىق باسەكەسىندە ونەر كورسەتىپ جاتقان الەكساندر نەدوۆەسوۆ پاكىستاندىق ايسام كۋرەشيمەن بىرگە جۇپ قۇراپ, ءبىرىنشى اينالىمدا حارري حەليوۆاارا (فينليانديا) جانە للويد گلاسسپۋل ( ۇلىبريتانيا) جۇبىمەن كەزدەسىپ, ءۇش سەتتە جەڭىسكە جەتتى – 6:7, 6:3, 10:7. ەكىنشى راۋندتا نەدوۆەسوۆ پەن كۋرەشي مارسەلو ارەۆالو (سالۆادور)/جان-جيۋلەن رويەر (نيدەرلاند) جۇبىمەن كەزدەسەدى. سونداي-اق حورۆاتيالىق فرانكو سكۋگورمەن بىرگە ويناپ جاتقان تاعى ءبىر قازاقستاندىق اندرەي گولۋبەۆ تە ەكىنشى اينالىمعا جولداما الدى.
