– بۇل جاعداي بىرىنشىدەن ينتەرنەتتىڭ جوقتىعىمەن بايلانىستى. ياعني, ءبىز ينكاسساتسيا جاساپ, بانكوماتتارعا اقشا سالا المايمىز. قارجىلىق قىزمەتتەردى كورسەتەتىن جۇيە تولىقتاي جۇمىس ىستەپ تۇر. ەلدەگى جاعداي تۇراقتانىپ, ينتەرنەت قوسىلسا, ازاماتتار تولەم كارتالارىن دا, ءموبيلدى قوسىمشالاردى دا ەش كەدەرگىسىز پايدالانا الاتىن بولادى. سونداي-اق دەپوزيتتەرىن پايدالانىپ, بانك, بانكومات جانە تولەم تەرمينالدارى ارقىلى اقشا اۋدارا الادى. بارشاڭىزعا ءمالىم, قازىرگى تاڭدا ەلدە تەرروريزمگە قارسى وپەراتسيالار ءجۇرىپ جاتىر. ءبىز جاعداي جاقىن ارادا تۇراقتانادى دەگەن ۇمىتتەمىز, سول كەزدە بارلىق بانك وپەراتسيالارى قالپىنا كەلتىرىلەتىن بولادى, – دەدى بەرىك شولپانقۇلوۆ.
ونىڭ سوزىنشە, 5 قاڭتاردا بارلىق قارجى ينفراقۇرىلىمى شتاتتىق رەجيمدە جۇمىس ىستەدى. ياعني بارلىق تولەمدەر وڭدەلىپ, قور بيرجاسىندا ساۋدا ءجۇردى.
بۇگىن تەرروريزمگە قارسى وپەراتسيالاردىڭ جۇزەگە اسىرىلۋىنا بايلانىستى قارجى نارىعىن دامىتۋ جانە رەتتەۋ اگەنتتىگى مەن ۇلتتىق بانك بىرلەسىپ, 6 قاڭتار, ياعني ءبىر كۇنگە بارلىق قارجى ۇيىمدارىنىڭ جۇمىسىن ۋاقىتشا توقتاتۋ تۋرالى شەشىم قابىلدادى. ولاردىڭ قاتارىنا حالىقتىڭ جانە قارجى ۇيىمدارىنىڭ قاۋىپسىزدىگىن سونداي-اق ينفراقۇرالىمنىڭ ساقتالۋىن قامتاماسىز ەتۋ ءۇشىن ەكىنشى دەڭگەيلى بانكتەر دە ەنگىزىلدى.
– ەرتەڭ جانە ودان كەيىنگى ەكى كۇن قاتارىنان دەمالىس, سوندىقتان قارجى ۇيىمدارى وسى كۇندەرى دە قىزمەت كورسەتپەيدى. ينتەرنەت قوسىلعان سوڭ بانك وپەراتسيالارى ەكىنشى دارەجەلى بانكتەردىڭ ءموبيلدى قوسىمشالارىندا قولجەتىمدى بولادى, – دەدى ول.
