وبلىستىق تاريحي-مادەني مۇرانى زەرتتەۋ ورتالىعىنىڭ ديرەكتورى مۇحامبەتقالي كيپيەۆ شىعارعان كىتاپ «XVIII-XX عاسىرلارداعى اتىراۋ وڭىرىندەگى ەلدى مەكەندەر» دەپ اتالادى.
اۆتوردىڭ ايتۋىنشا, وڭىردەگى كەيبىر ەلدى مەكەندەردىڭ ىرگەسى XVIII عاسىردا قالانعان.
«جاڭا كىتاپقا 40 ەلدى مەكەن تۋرالى قىزىقتى دەرەكتەر ەنگىزىلدى. قازىر كەيبىر ەلدى مەكەندەر ءتىپتى جويىلىپ كەتكەن. سول سەبەپتەن, سونداي اۋىلداردىڭ تاريحىن زەردەلەۋ ءۇشىن زەرتتەۋ جۇمىسىن جۇرگىزدىك. رەسەي فەدەراتسياسىنداعى ورىنبور, استراحان, سونداي-اق الماتى قالاسىنداعى مۇراعاتتاردان قىزىقتى ماتەريالدار تاپتىق. كەيبىر كەنتتەردىڭ ورنالاسقان ورنىنا بارىپ قايتتىق», دەدى مۇحامبەتقالي كيپيەۆ.
كىتاپ ەلدى مەكەندەردىڭ پايدا بولۋ كەزەڭى مەن گەوگرافيالىق ورنالاسۋىنا قاراي ءۇش بولىمگە بولىنگەن.
«العاشقى بولىمدە جايىق پەن جەم وزەندەرىنىڭ بويىندا سالىنعان ەلدى مەكەندەر قامتىلسا, ەكىنشىسىندە كاسپي تەڭىزىنىڭ جاعالاۋىنداعى اۋىلدار تۋرالى جازىلدى. ال, ءۇشىنشى بولىمدە حح عاسىردىڭ 20-جىلدارىنا دەيىن بوي كوتەرگەن ساۋدا جانە ءوندىرىس ورتالىقتارى تۋرالى زەرتتەۋلەر بار. بۇل كىتاپتى دايىنداۋ كەزىندە وڭىردەگى ەلدى مەكەندەر جونىندە بۇرىن جارىق كورمەگەن كارتالار, سىزبالار مەن فوتوسۋرەتتەردى پايدالاندىق», دەدى كىتاپ اۆتورى.
