قوعام • 28 جەلتوقسان، 2021

جەكە ءموبيلدى اۋدارىمدارعا سالىق سالىنبايدى

3287 رەت كورسەتىلدى

الماتى قالاسى مەملەكەتتىك كىرىستەر دەپارتامەنتى باسشىسىنىڭ ورىنباسارى ورىنكۇل قازيەۆا بريفينگ بارىسىندا ءموبيلدى اۋدارىمدار مەن تولەمدەرگە قاتىستى ءجيى قويىلاتىن سۇراقتارعا جاۋاپ بەردى، دەپ حابارلايدى Egemen.kz.

ايتا كەتسەك، جەلتوقسان ايىندا قر-دا «سالىق جانە بيۋدجەتكە تولەنەتىن باسقا دا مىندەتتى تولەمدەر تۋرالى» كودەكسكە (سالىق كودەكسى) تۇزەتۋلەر قابىلداندى.

ورىنكۇل قازيەۆا 2022 جىلدىڭ 1 ناۋرىزىنان باستاپ ەل مەن مەگاپوليس تۇرعىندارىنا قانداي وزگەرىستەر اسەر ەتەتىنىن ايتتى. الماتى مەملەكەتتىك كىرىستەر دەپارتامەنتىنىڭ وكىلى ەلىمىزدە شاعىن جانە ورتا بيزنەس سوڭعى جىلدارى كاسىپكەرلىك قىزمەتتە جەكە تۇلعالار اراسىنداعى ترانزاكتسيالارعا ارنالعان جەدەل ءموبيلدى اۋدارىمداردى جاپپاي پايدالانا باستاعانىن اتاپ ءوتتى. سوندىقتان دا وسى ماسەلەنى زاڭنامالىق رەتتەۋ ءۇشىن «موبيلدىك تولەمدەر» جانە «موبيلدىك اۋدارىمدار» ۇعىمى ايقىندالدى. مەملەكەتتىك كىرىستەر دەپارتامەنتى باسشىسىنىڭ ورىنباسارى اتاپ وتكەندەي، ءموبيلدى تولەمدەردى فيسكاليزاتسيالاۋ كەز كەلگەن ادام ءۇشىن جاڭا سالىقتىڭ پايدا بولۋىن بىلدىرمەيدى، تەك بيزنەستىڭ قولدانىستاعى زاڭنامادا قاراستىرىلعان سالىق مىندەتتەمەلەرىن ورىنداۋىنا باعىتتالعان.

«جالپى، موبيلدىك اۋدارىمداردى پايدالانۋعا قاتىستى سالىق زاڭناماسىنا ەنگىزىلگەن تۇزەتۋلەر جەكە تۇلعالاردىڭ موبيلدىك تولەمدەردەن جەكە اۋدارىمدارىن كاسىپكەرلىك ماقساتتا جۇزەگە اسىرىلاتىن موبيلدىك تولەمدەردەن بولۋگە ارنالعان. ولار بيزنەس-قوعامداستىقپەن جانە بانكتەرمەن بىرنەشە رەت تالقىلاندى»، دەدى ورىنكۇل قازيەۆا.

سپيكەر اتالعان باستامالاردىڭ ماقساتى تسيفرلىق كەڭىستىكتە بيزنەستى ودان ءارى دامىتۋعا ارنالعانىن ايتتى. قولما-قول ەسەپ ايىرىسۋعا كوشۋ ماقساتتارىن كوزدەمەيدى. مەملەكەتتىك كىرىستەر ورگاندارىنا دەرەكتەردى بەرۋگە قاتىستى بارلىق الاڭداۋشىلىقتار نەگىزسىز.

«بانكتەردەن مالىمەتتەر الۋ كاسىپكەرلىك شوتتارعا تۇسەتىن تولەمدەر بويىنشا عانا جۇرگىزىلەتىن بولادى. وسىلايشا، جەكە اۋدارىمدارعا سالىق سالىنبايدى. موبيلدىك تولەمدەرگە قاتىستى نورمالار 2022 جىلعى 1 ناۋرىزدان باستاپ كۇشىنە ەنەدى. كاسىپكەرلىك قىزمەت بەلگىلەرى بار ءموبيلدى تولەمدەر بويىنشا دەرەكتەرمەن الماسۋ تەك 2025 جىلدان باستاپ جوسپارلانادى» دەدى سپيكەر.

سونىمەن قاتار، ورىنكۇل قازيەۆا ەكىنشى دەڭگەيلى بانكتەر مەن مەملەكەتتىك ورگاندار اراسىندا جاسالعان موبيلدىك اۋدارىمدار تۋرالى اقپارات الماسۋ قالاي جۇرەتىنىن ءتۇسىندىردى.

«بىرىنشىدەن، دارا كاسىپكەرلەر بويىنشا موبيلدىك تولەمدەر جونىندەگى مالىمەتتەردى ەكىنشى دەڭگەيدەگى بانكتەر مەملەكەتتىك كىرىس ورگاندارىنا: اي سايىن، E-salyk Business سالىق رەجيمىن قولداناتىندار بويىنشا، سونداي-اق قىزمەتتى باسقا سالىق رەجيمدەرىندە جۇزەگە اسىرعان كەزدە جانە وسىنداي مالىمەتتەردى بەرۋگە كەلىسىم بەرگەن كەزدە; جىلىنا ءبىر رەت بارلىق دارا كاسىپكەرلەر بويىنشا (پوست-تەرمينالدار بويىنشا مالىمەتتەردى بەرۋگە ۇقساس، قولدانىستاعى نورما) بەرەدى.

كاسىپكەرلەر بولىپ تابىلمايتىن جەكە تۇلعالارعا قاتىستى مكك جانە ەكىنشى دەڭگەيدەگى بانكتەر اراسىندا اقپارات الماسۋ قر ۇلتتىق بانكىمەن، قر قارجى نارىعىن رەتتەۋ جانە دامىتۋ اگەنتتىگىمەن، قازاقستان قارجىگەرلەرىنىڭ قاۋىمداستىعىمەن جانە ەكىنشى دەڭگەيدەگى بانكتەرمەن بىرلەسىپ ازىرلەۋ جوسپارلانىپ وتىرعان كريتەريلەرگە سايكەس جۇزەگە اسىرىلاتىن بولادى. ولشەمدەردى بەكىتۋ جونىندەگى نورماتيۆتىك قۇقىقتىق اكتىنىڭ جوباسى جاريا تالقىلاۋ ءۇشىن «اشىق نقا» پورتالىندا جاريالانادى»، دەدى ول.

بۇدان باسقا، مالىمەت الماسۋ جۇرگىزىلەتىن تۇلعالار ساناتتارى جەكە تۇلعالاردىڭ جالپىعا بىردەي دەكلاراتسيالاۋعا كىرۋىنە ۇقساس كەزەڭ كەزەڭىمەن جۇزەگە اسىرىلادى.



 

سوڭعى جاڭالىقتار

دوللار ارزاندادى

ەكونوميكا • بۇگىن، 15:50

ۆاكتسينا سالدىرعاندار سانى ارتتى

كوروناۆيرۋس • بۇگىن، 09:17

1227 قازاقستاندىق ىندەتتەن ساۋىقتى

كوروناۆيرۋس • بۇگىن، 09:08

وتكەن تاۋلىكتە 1169 ادام ىندەت جۇقتىردى

كوروناۆيرۋس • بۇگىن، 09:01

ۇقساس جاڭالىقتار