وزبەكستاننان كەلگەن دەلەگاتسيانىڭ باستى ماقساتى – قازاقستاندىق ءبىلىم بەرۋ جۇيەسىنە ەنگىزىلىپ جاتقان جاڭاشىلدىقتارمەن تانىسۋ.
كورشى ەل دەلەگاتسياسى بۇعان دەيىن ەكى ەل اراسىنداعى ءوزارا ءىس-قيمىل تۋرالى كەلىسىمگە 1994 جىلى قول قويىلعانىن اتاپ ءوتتى. اڭگىمە بارىسىندا مينيستر جاڭارتىلعان قۇجات ەكى رەسپۋبليكا اراسىنداعى ءبىلىم بەرۋ سالاسىنداعى ىنتىماقتاستىقتى نىعايتۋعا جانە جاڭا دەڭگەيگە شىعارۋعا ىقپالداساتىنىن اتاپ ءوتتى.
ايتا كەتەيىك, قازاقستانعا كەلگەن وزبەكستان رەسپۋبليكاسىنىڭ حالىققا ءبىلىم بەرۋ ءمينيسترى ەڭ الدىمەن ەلوردالىق مەكتەپتەردى ارالادى.
«مەنىڭ ويىمشا, كەلىسىم جوباسىن دايىنداۋ كەزىندە ەكى ەل اراسىنداعى ءبىلىم بەرۋ سالاسىنداعى ىنتىماقتاستىقتىڭ باسىم باعىتتارىنىڭ بارلىق سپەكترى قامتىلعانى ءجون. بۇل — مۇعالىمدەردى دايارلاۋ, بىلىكتىلىكتى ارتتىرۋ, تاجىريبە الماسۋ ماسەلەلەرى. ءبىز مۇعالىمدەرىمىزدىڭ قازاقستانعا ساپارىن ۇيىمداستىرىپ, قازاقستاندىق مۇعالىمدەردى وزبەكستانعا شاقىرا الار ەدىك. بۇل تاجىريبە مەن پىكىر الماسۋ بارىسىندا پايدالى بولادى دەپ ويلايمىن. مەن بىرقاتار قازاقستاندىق مۇعالىممەن سويلەستىم. ولاردىڭ ارقايسىسى جۇمىستارىن زور قۇلشىنىسپەن اتقارىپ, ءوز ەلىنىڭ بولاشاعى ءۇشىن الاڭدايتىنىن بايقادىم. مۇعالىمدەر ءبىلىمدى قالاي بەرگەن ءجون, وقۋشىنى تۇلعا رەتىندە قالىپتاستىرۋدىڭ ماڭىزدىلىعى تۋرالى ويلانادى ەكەن», دەدى وزبەكستان رەسپۋبليكاسىنىڭ حالىققا ءبىلىم بەرۋ ءمينيسترى باحتيەر سايدوۆ.
استانالىق مەكتەپتەردى ارالاۋ بارىسىندا باحتيەر سايدوۆقا وقۋ پروتسەسىنە ينتەگراتسيالانعان ءبىلىم بەرۋ باعدارلامالارى مەن تسيفرلىق جوبالار تانىستىرىلدى. سونداي-اق ب. سايدوۆ قازاقستاندىق مەكتەپتەردەگى مەملەكەتتىك-جەكەمەنشىك ارىپتەستىك جانە جان باسىنا قارجىلاندىرۋ جۇيەسىمەن تانىستى. ب. سايدوۆ وزبەكستاندا مەكتەپتەردەگى ءبىلىم بەرۋ سالاسىن جەتىلدىرۋ ءۇشىن جەكە مەكتەپتەر اراسىنداعى باسەكەلەستىكتى كۇشەيتۋگە مۇمكىندىك بەرەتىن قازاقستاندىق مەملەكەتتىك-جەكەمەنشىك ارىپتەستىك ء(مجا) جۇيەسى دە, سونىمەن بىرگە جان باسىنا شاققانداعى قارجىلاندىرۋعا كوشۋ دە زەردەلەنەتىنىن اتاپ ءوتتى.
