«قالا تۇرعىندارى ءوزىن قاۋىپسىز سەزىنۋى كەرەك. قوعامدىق ءتارتىپ پەن قاۋىپسىزدىكتى جۇيەلى نەگىزدە نىعايتۋ ءۇشىن ماتەريالدىق-تەحنيكالىق بازانى جاڭارتىپ, قادامدىق قولجەتىمدىلىك اياسىندا مودۋلدىك بەكەتتەر اشامىز, پوليتسيانىڭ تىرەك پۋنكتەرىن قالپىنا كەلتىرەمىز جانە ت.ب. قۇقىقبۇزۋشىلىقتى الدىن الۋ جونىندەگى ماسەلەلەر ۆەدومستۆوارالىق كوميسسيانىڭ وتىرىسىندا پوليتسيا دەپارتامەنتىنىڭ باسشىلىعىمەن تالقىلاندى.
مەملەكەت باسشىسى جولداۋىندا ىشكى ىستەر ورگاندارىن جاڭعىرتۋدىڭ باسىمدىقتارى مەن قاۋىپسىزدىكتى قامتاماسىز ەتۋدىڭ سەرۆيستىك مودەلىنە كوشۋدى بەلگىلەدى.
ماسەلەن, بيىلدىڭ وزىندە عانا قالانىڭ ءتۇرلى اۋدانىندا 10 مودۋلدىك پوليتسيا بەكەتى ورناتىلىپ, ۋچاسكەلىك پۋنكتەردى ورنالاستىرۋ ءۇشىن تاعى دا وسىنداي كولەمدە ءۇي-جاي بەرىلدى. بۇل جوسپاردان ەكى ەسە جوعارى.
سول سياقتى, وسىعان دەيىن پوليتسيا دەپارتامەنتىنە 65 بىرلىك ارنايى تەحنيكا بەرىلدى, جاڭا اكىمشىلىك (ەسىل اۋدانى) اشىلدى, وندا 400-دەن استام قىزمەتكەر ەڭبەك ەتەدى, جاڭا تك ءبىرىنشى قاباتتارىندا جانە جاڭا دەنە شىنىقتىرۋ-ساۋىقتىرۋ كەشەندەرىندە الەۋمەتتىك نىسانداردان باسقا پوليتسيانىڭ تىرەك پۋنكتەرىن اشامىز. سارىارقا اۋدانىندا پوليتسيا دەپارتامەنتىنىڭ بولىمشەسىنە ارنالعان عيماراتتىڭ قۇرىلىسى ءجۇرىپ جاتىر.
سونداي-اق, كامەلەتكە تولماعاندارعا قاتىستى قىلمىستاردىڭ الدىن الۋ, جول قوزعالىسىن ۇيىمداستىرۋدى جەتىلدىرۋ جانە جول قاۋىپسىزدىگى دەڭگەيىن ارتتىرۋ بويىنشا جۇمىستار جۇرگىزەمىز, «قاۋىپسىز اۋلا» جانە ت.ب. جوبالاردى كەڭەيتۋدى جالعاستىرۋدامىز.
اتالعان شارالاردىڭ ءبارى تۇرعىندارعا جەدەل كومەك كورسەتۋگە, قۇقىقبۇزۋشىلىقتى بولدىرماۋعا, قىلمىستاردىڭ اشىلۋىن ارتتىرۋعا جانە ت.ب. مۇمكىندىك بەرەدى», دەپ جازدى ەلوردا اكىمى.
