«قر تۇڭعىش پرەزيدەنتى – ەلباسى ن. نازارباەۆتىڭ بەس ينستيتۋتسيونالدىق رەفورماسىن ىسكە اسىرۋ جونىندەگى 100 ناقتى قادام» ۇلت جوسپارىن ورىنداۋ بويىنشا 2021 جىلعى جۇمىس قورىتىندىلارى شىعارىلدى.
اتقارىلىپ جاتقان جۇمىستار تۋرالى ۇلتتىق ەكونوميكا ءمينيسترى اسەت ەرعاليەۆ, اۋىل شارۋاشىلىعى ءمينيسترى ەربول قاراشوكەەۆ, يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ, ەكولوگيا, گەولوگيا جانە تابيعي رەسۋرستار ءمينيسترى سەرىكقالي برەكەشەۆ, دەنساۋلىق ساقتاۋ ءمينيسترىنىڭ مىندەتىن اتقارۋشى جاندوس بۇركىتباەۆ, نۇر-سۇلتان قالاسىنىڭ اكىمى التاي كولگىنوۆ جانە وزگەلەر بايانداما جاسادى.
قازىرگى ۋاقىتتا ۇلت جوسپارىندا كورسەتىلگەن 100 قادامنىڭ 76 قادامى ىسكە اسىرىلدى: «كاسىبي مەملەكەتتىك اپپاراتتى قالىپتاستىرۋ» باعىتى بويىنشا 15 قادامنىڭ 13-ءى, «زاڭ ۇستەمدىگىن قامتاماسىز ەتۋ» باعىتى بويىنشا 19 قادامنىڭ بارلىعى, «يندۋستريالاندىرۋ جانە ەكونوميكالىق ءوسۋ» باعىتى بويىنشا 50 قادامنىڭ 31-ءى, «بىرەگەيلىك جانە بىرلىك» باعىتى بويىنشا 6 قادامنىڭ 3-ءى, «ەسەپ بەرەتىن مەملەكەتتى قالىپتاستىرۋ» باعىتى بويىنشا بارلىعى 10 قادام ورىندالدى.
«مەملەكەت باسشىسى قاسىم-جومارت كەمەل ۇلى توقاەۆ ۇلت جوسپارى مەن بەس ينستيتۋتسيونالدىق رەفورما اياسىندا قر تۇڭعىش پرەزيدەنتى – ەلباسى نۇرسۇلتان ءابىش ۇلى نازارباەۆتىڭ رەفورمالارىن تولىققاندى ءارى ساپالى جۇزەگە اسىرۋعا ەرەكشە كوڭىل بولەدى. بيىل ەداۋىر جۇمىس جۇرگىزىلىپ, جاقسى ناتيجەلەرگە قول جەتكىزىلدى», دەدى ا. مامين.
پرەمەر-مينيستر ۇلت جوسپارىن جۇزەگە اسىرۋ بويىنشا ودان ءارى بەلسەندى جۇمىس جۇرگىزۋدى تاپسىردى. دەنساۋلىق ساقتاۋ جانە ءبىلىم بەرۋ جۇيەلەرىن جەتىلدىرۋ, سونداي-اق, ءبىرىنشى كەزەكتە ەكونوميكانىڭ باسىم سەكتورلارىنداعى جاڭا ءىرى جوبالارعا ينۆەستيتسيا تارتۋ كولەمىن ارتتىرۋ جونىندەگى تارماقتارعا ەرەكشە نازار اۋدارىلدى.
وتىرىستا گەولوگيا جانە جەر قويناۋىن پايدالانۋ, مەديتسينا جانە فارماتسەۆتيكا, ەنەرگەتيكا, تسيفرلاندىرۋ جانە ت. ب. سالالارداعى ۇلت جوسپارىنىڭ قادامدارىن كەلەسى جىلى ىسكە اسىرۋدى كوزدەيتىن ۇلتتىق كوميسسيانىڭ 2022 جىلعا ارنالعان جۇمىس جوسپارى بەكىتىلدى.
