دانيادا مارەسىنە جەتكەن جاھاندىق دودانىڭ ءبىرىنشى ديۆيزيونىندا ونەر كورسەتكەن جەرلەستەرىمىز ءوز توبىندا ءتورتىنشى ورىنعا تابان تىرەدى. ا توبىندا دانيا, بەلارۋس, لاتۆيا, نورۆەگيا جانە ماجارستان قۇرامالارىمەن ەليتالى كەزەڭنىڭ جولداماسىن ساراپقا سالدى. الەكساندر يستومين جاتتىقتىراتىن قازاقستان جاستار قۇراماسى توپتاعى بەس ويىننىڭ ەكەۋىندە جەڭىسكە جەتىپ, ءۇش ماتچتا قارسىلاستارىنا ەسە جىبەردى.
جەرلەستەرىمىز الەم بىرىنشىلىگىندەگى تۇساۋكەسەر ماتچىن ءساتتى باستاپ, ماجارستان قۇراماسىن 3:1 ەسەبىمەن قاپى قالدىرعان بولاتىن. الايدا كەيىنگى ويىندا نورۆەگيادان ۇتىلىپ قالدى – 2:5. ال ءۇشىنشى تۋردا جارىس قوجايىندارى دانيانى 4:1 ناتيجەسىمەن جەڭىپ, جوعارى توپقا جولداما بەرەتىن مۇمكىندىكتى ساقتاپ قالىپ ەدى. الايدا شەشۋشى ەكى ويىندا بەلارۋس حوككەيشىلەرىنەن 2:4, لاتۆيادان 1:3 ەسەبىمەن جەڭىلىپ, كەلەسى جىلى دا الەم چەمپيوناتىنىڭ ءبىرىنشى ديۆيزيونىندا باق سىناۋعا ءماجبۇر بولدى.
توپتاعى بەس ماتچتىڭ بەسەۋىندە دە قارسىلاستارىنا سوقىر ۇپاي ۇستاتپاعان بەلارۋس حوككەيشىلەرى ءبىرىنشى ورىنمەن (15 ۇپاي) دۇنيەجۇزىلىك دودانىڭ ەليتالى كەزەڭىنە شىقتى. ۆ توبىندا ءبىرىنشى ورىندى يەلەنگەن فرانتسيا قۇراماسى دا كەلەسى جىلى جوعارى توپتىڭ چەمپيوناتىندا وينايتىن بولدى.
