ءبىلىم الۋشىلاردىڭ 64%-ى تمد ەلدەرىنەن كەلگەن.
«قازاقستاندىق ۋنيۆەرسيتەتتەر ءتۇرلى حالىقارالىق ءبىلىم بەرۋ كورمەلەرىنە بەلسەندى قاتىسۋدا. ماسەلەن, وسى جىلدىڭ قاراشا ايىندا قازاقستاننىڭ قىرعىزستان استاناسى بىشكەك پەن وزبەكستان استاناسى تاشكەنت قالالارىندا قۇرىلعان كۇندەرى وتكىزىلدى. وسىلايشا, باسقا ەلدەردىڭ ازاماتتارى ءبىزدىڭ جوعارى وقۋ ورىندارىمىز تۋرالى اقپارات الا الادى. سونىمەن قاتار, ءبىزدىڭ ۋنيۆەرسيتەتتەرىمىز شەتەلدىك ستۋدەنتتەرگە ارنايى ءبىلىم گرانتتارىن ءبولىپ وتىرادى. نەگىزىنەن, شەتەلدىك ستۋدەنتتەر «مەديتسينا», «پەداگوگيكالىق عىلىمدار», «بيزنەس, باسقارۋ جانە قۇقىق», «الەۋمەتتىك عىلىمدار» باعىتتارىن تاڭدايدى», دەپ اتاپ ءوتتى قر بعم جوعارى جانە جوعارى وقۋ ورنىنان كەيىنگى ءبىلىم دەپارتامەنتىنىڭ ديرەكتورى ادىلەت تويباەۆ.
ءبىلىم بەرۋ قىزمەتتەرىنىڭ ەكسپورتىن ىنتالاندىرۋ تەتىكتەرىنىڭ ءبىرى – شەتەلدىك ازاماتتار ءۇشىن ستيپەنديالىق باعدارلامانى ىسكە اسىرۋ. ول قر ءبىلىم جانە عىلىم مينيسترلىگىمەن 2019 جىلى ىسكە قوسىلدى. باعدارلاما شەتەلدىك ستۋدەنتتەرگە, ونىڭ ىشىندە قازاقستان ازاماتتارى بولىپ تابىلمايتىن ۇلتى قازاق ادامدارعا گرانتتار ءبولۋدى كوزدەيدى.
وسى باعدارلامانى ىسكە قوسۋدىڭ ءبىرىنشى جىلىندا قازاقستاندىق جوعارى وقۋ ورىندارىندا تەگىن وقۋ مۇمكىندىگىن ۇلگەرىمى جوعارى 89 شەتەلدىك ازامات الدى. 2021 جىلى بۇل سان 2,5 ەسەدەن استام ءوستى جانە جوعارى جانە جوعارى وقۋ ورنىنان كەيىنگى ءبىلىم بەرۋدىڭ بارلىق دەڭگەيلەرى بويىنشا 240 گرانتقا جەتتى.
ايتا كەتسەك, بيىل قازاقستاندىقتار ءۇشىن رەكوردتىق 56 مىڭ گرانت ءبولىندى. سونىمەن قاتار, قازاقستاندىق جوعارى وقۋ ورىندارىندا اعىلشىن تىلىندە ءبىلىم بەرۋ باعدارلامالارىنىڭ سانى ەداۋىر ارتتى. الەمدىك تاجىريبەگە سۇيەنە وتىرىپ, جوعارى وقۋ ورىندارى بىلىكتى شەتەلدىك مامانداردى تارتادى. ولار قازاقستاندىق جوعارى وقۋ ورىندارىنىڭ باسشىلارىمەن, وقىتۋشىلارىمەن تاجىريبە الماسىپ, ستۋدەنتتەردى جاڭا تەحنولوگيالارعا, عىلىمي زەرتتەۋ ادىستەمەلەرىنە وقىتادى.
سونىمەن قاتار, قازاقستاندىق جوعارى وقۋ ورىندارى جىلدان جىلعا حالىقارالىق ءبىلىم بەرۋ كەڭىستىگىندە ءوز پوزيتسيالارىن نىعايتۋدا. مىسالى, QS رەيتينگىنە 14 قازاقستاندىق جوو, Times Higher Education-گە 3 ۋنيۆەرسيتەت كىردى.
