ونىڭ ايتۋىنشا, ءساۋىر ايىنان بەرى دەپارتامەنت ماماندارى ۆاكتسينانىڭ تولىق كۋرسىنان وتكەن ادامدارعا 42-45 كۇن وتكەندە كوروناۆيرۋس اۋرۋىنا قاتىستى مونيتورينگ جۇرگىزىپ كەلەدى.
«قالادا اۋرۋعا قايتا شالدىققانداردىڭ جالپى سانى - 3 239 جاعداي. بۇل ۆاكتسينانىڭ تولىق كۋرسىن العان 987 مىڭنان استام ادامنىڭ 0,33 پايىزى. ۆاكتسينانىڭ تولىق كۋرسىن العان سوڭ الماتى قالاسىندا كوروناۆيرۋس جۇقتىرعاندار كورسەتكىشى مىنانداي: «سپۋتنيك V» – 0,37%, Hayat-Vax – 0,26%, «سينوۆاك» – 0,19%, QazCovid-in (QazVaس) – 0,17%. ۆيرۋس جۇقتىرعانداردىڭ باسىم كوپشىلىگىندە سىرقات جەڭىل وتكەن», دەدى ول.
سونىمەن قاتار ول وتاندىق QazCovid-in ۆاكتسيناسىن العاندار اراسىندا قايتا ۆيۋرس جۇقتىرۋ تومەن ەكەنىن ايتتى.
«ستاتيستيكاعا قاراساق, كوروناۆيرۋسپەن قايتا اۋىرعاندار اراسىندا ەڭ تومەنگى كورسەتكىش وتاندىق عالىمدار جاساپ شىققان QazCovid-in ۆاكتسيناسىن العاندار. ونىڭ ۇستىنە وتاندىق ۆاكتسينانى العانداردا ەكپەنىڭ جاناما اسەرى از بولعان. سونداي-اق ۆاكتسينانىڭ تيىمدىلىگى ۇزاق ۋاقىتقا جەتكەنى بايقالدى. وسىعان وراي دارىگەرلەر رەۆاكتسيناتسياعا QazCovid-in لايىقتى دەگەن شەشىمگە كەلدى», دەدى جانداربەك بەكشين.
