بەلگىلى ءانشى بەيبىت سەيدوللا ۇلى توراعالىق ەتكەن قازىلار القاسىنىڭ قۇرامىنا ارمەنيا, بولگاريا, قىرعىزستان, بەلورۋسسيا, ۋكراينا مەملەكەتتەرىنىڭ بىلىكتى ماماندارى وتىردى. ولاردىڭ ارقايسىسى وزدەرىمەن بىرگە ەندى قالىپتاسىپ كەلە جاتقان ەڭ دارىندى دەگەن تاڭداۋلى ءبىر-ەكى انشىدەن ەرتە كەلىپ, توبىل وڭىرىندەگى ونەر بايقاۋىنا قوستى. وسىدان بولار, بيىلعى «التىن ميكروفوننىڭ» دەڭگەيى جوعارى بولدى. كىشكەنتاي انشىلەردىڭ اراسىنداعى ناعىز ۇلكەن ونەر باسەكەسى دەۋگە بولادى.
ونەر فەستيۆالىنىڭ اشىلۋ سالتاناتىنا قاتىسقان وبلىس اكىمىنىڭ ورىنباسارى باقىت ەسىموۆا ءار ەلدەن, ءار وڭىردەن ءۇمىت ارقالاي كەلگەن جاس انشىلەرگە ساتتىلىك تىلەپ, بۇل ءداستۇرلى بايقاۋدىڭ ءباسى جوعارى ەكەنىن ايتتى.
– بۇگىندە بۇكىل ەلگە تانىلعان قوستاناي ءوڭىرىنىڭ تالانتتارى وسى بايقاۋدان شىڭدالىپ شىققان. سوندىقتان, بۇل فەستيۆالدى ءوز ناتيجەسىن, جەمىسىن بەرگەن تاعىلىمدى ونەر مەكتەبى دەپ ايتۋعا بولادى. مىسالى, كەزىندە «سلاۆيان بازارىندا» توپ جارعان ەرنار سادىرباەۆ وسى بايقاۋدان ءوسىپ شىققان بالا. بۇگىنگى اباي اتىنداعى مەملەكەتتىك اكادەميالىق وپەرا جانە بالەت تەاترىنىڭ بەلدى ءسوليسى بالۋان بەركەنوۆ تە وسى «التىن ميكروفون» فەستيۆالىنەن ءوسىپ شىققان ءانشى, – دەدى ب.ەسىموۆا.
بايقاۋدىڭ باستاپقى كەزەڭدەرى ونلاين تۇردە ءوتتى. فينالدىق باسەكەگە وسى ىرىكتەۋدەن ءوتىپ, جۇزدەن جۇيرىك شىققان 41 ونەرپاز قاتىستى. ولار جاس ەرەكشەلىكتەرىنە قاراي كىشى, ورتا, ەرەسەك جانە كاسىپقوي توپقا ءبولىنىپ, ارقايسىسى ەكى-ەكى اننەن ورىنداپ شىقتى.
فەستيۆال جەڭىمپازدارى قازىلار القاسىنىڭ قالاۋى بويىنشا انىقتالدى. 7-10 جاس ارالىعىنداعى بالعىندار ىشىنەن السۋ ۇلتۋعانوۆا ءبىرىنشى ورىندى جەڭىپ الدى. ال 11-13 جاس ارالىعىنداعى قاتىسۋشىلار اراسىنان قوستانايلىق ياسمينا ايۋپوۆا, 14-17 جاس ارالىعىنداعى ونەرپازداردىڭ ىشىنەن داريا ماتۆەەۆا ۇزدىك شىقتى.
«كاسىپقويلار» توبى بويىنشا 1-ورىندى قوستانايلىق جاس ءانشى المات جاڭاباي جەڭىپ الدى. 2-ورىنعا تۇركيالىق ۆولكان تالشىك لايىق دەپ تانىلدى. ال گران-پري سىيلىعىن نۇر-سۇلتان قالاسىنان كەلگەن جاس دارىن اسلان امانگەلديەۆ جەڭىپ الدى.
بيىل فەستيۆالدا قازاقستاننىڭ ەڭبەك سىڭىرگەن قايراتكەرى, كوپ جىلدار بويى وسى بايقاۋعا قازىلىق ەتىپ, تالاي تالانتتىڭ جولىن اشقان كومپوزيتور كەڭەس دۇيسەكەەۆ اتىنداعى ارنايى سىيلىق تاعايىندالدى. تۇڭعىش جۇلدەنى قىزىلوردا وبلىسىنان كەلگەن تاعى ءبىر تالانتتى جاس ونەرپاز ەرالى ەسكەندىر يەلەندى.
قوستاناي
