ايماقتار • 09 جەلتوقسان، 2021

تۇركىستان قالاسى 5G جۇيەسىنە قوسىلدى

95 رەت كورسەتىلدى



«قازاقتەلەكوم» تۇركىستاندا 5G بازالىق ستانتسياسىن ىسكە قوستى، دەپ حابارلايدى Egemen.kz.


تۇركىستان قالاسى بۇگىن رەسمي تۇردە 5G جۇيەسىنە قوسىلدى. ەل تاۋەلسىزدىگىنىڭ 30 جىلدىعىنا وراي ۇيلەستىرىلگەن اۋقىمدى جوبانى «Kcell» جانە «Ericsson» كومپانياسى بىرلەسە جۇزەگە اسىردى. بۇگىن «KUN» قوناق ۇيىندە اتالعان جۇيەنىڭ بازالىق ستانتسياسىن ورناتۋ ءراسىمى ءوتىپ، ارنايى ءباسپاسوز ءماسليحاتى ۇيىمداستىرىلدى.

جيىندا «قازاقتەلەكوم» اق باسقارما مۇشەسى تيمۋر قۇدايبەرديەۆ تۇركىستان قالاسىنىڭ دامۋ دەڭگەيى، وڭىردەگى وڭ وزگەرىستەر وسى يگى ءىستى قولعا الۋعا سەبەپ بولعانىن اتاپ ءوتتى.

5G جەلىسىن ىسكە قوسۋ ءۇشىن تۇركىستان قالاسى كەزدەيسوق تاڭدالعان جوق. بۇل تسيفرلاندىرۋ مەن تسيفرلىق ترانسفورماتسيانىڭ الدىڭعى قاتارىندا تۇرعان ايماق. بيزنەس پەن مەملەكەتتىڭ بىرلەسكەن جۇمىسىنىڭ ارقاسىندا بۇل جوبا ءساتتى اياقتالدى. وسى رەتتە وبلىس اكىمى ومىرزاق ەستاي ۇلىنا، «Kcell» جانە «Ericsson» كومپانيالارىنا العىسىمدى ايتقىم كەلەدى. جوبانى جۇزەگە اسىرۋعا قولداۋ ءبىلدىردى. ناتيجەسىندە تۇركىستان قازاقستان بويىنشا قالالىق اۋقىمدا 5G جۇيەسىنە قوسىلعان العاشقى شاھار اتانىپ وتىر.

5G جۇيەسى «اقىلدى قالا» تۇجىرىمداماسىن ءتيىمدى جۇزەگە اسىرۋعا مۇمكىندىك بەرەدى. بۇل دەگەنىڭىز تەك جوعارى جىلدامدىقتى عالامتور ەمەس، دامۋدىڭ جاڭا ساتىسى دەگەن ءسوز. وسى جۇيە ارقىلى وبلىستىڭ دەنساۋلىق ساقتاۋ، ءبىلىم، اۋىل شارۋاشىلىعى جانە ونەركاسىبىنە جوعارى تەحنولوگيالاردى ەنگىزۋگە بولادى. اتالعان وزگەرىستەر تۇركىستان وبلىسىنىڭ دامۋىنا سەرپىن بەرەدى. تۇركىستان قالاسى وڭتۇستىك وڭىرىندە عانا ەمەس، رەسپۋبليكا بويىنشا 5G جۇيەسىن ەنگىزۋ بويىنشا كوشباسشى اتانىپ وتىر»، دەگەن ول تۇركىستان وبلىسى اكىمىنىڭ ورىنباسارى راشيد ايۋپوۆقا «قازاقتەلەكوم» اق اتىنان ارنايى ەستەلىك ستاتۋەتكانى تابىستادى.

ءوز كەزەگىندە راشيد ايۋپوۆ تۇركىستاندى ساياسي، تاريحي-مادەني ورتالىق عانا ەمەس، تەحنولوگياسى دامىعان شاھار ەتۋ جولىندا جۇمىس ءجۇرىپ جاتقانىن مالىمدەدى. «الدىمەن بارشاڭىزدى تاۋەلسىزدىگىمىزدىڭ 30 جىلدىق مەرەكەسىمەن قۇتتىقتايمىن. وسىدان 3 جىل بۇرىن ەلباسى جارلىعىمەن تۇركىستان وبلىسى قۇرىلىپ، تۇركىستان قالاسى جالپۇلتتىق جوباعا اينالدى. وڭىرلەر، ءىرى كومپانيالار تۇركىستاننىڭ قۇرىلىسىنا ۇلەس قوستى. ءبىز قالانىڭ تاريحي كەلبەتىن ساقتاي وتىرىپ، ونى جاڭارتۋ جوسپارىن قويدىق. وسى باعىتتا جۇمىس ءجۇرىپ جاتىر. بيىل جازدا «قازاقتەلەكوم» جانە «Kcell» كومپانيالارىمەن كەلىسسوز جۇرگىزىلىپ، ارنايى مەموراندۋم جاسالدى. مىنە، سول كەلىسىم قىسقا ۋاقىتتا جۇزەگە استى. تۇركىستاننىڭ ەڭ ستراتەگيالىق ماڭىزدى ورىندارى مەن تۇرعىندار تىعىز قونىستانعان بولىگىنە 5G جۇيەسى ەنگىزىلىپ، ونىڭ يگىلىگىن ەل كورەتىن بولادى»، دەدى وبلىس اكىمىنىڭ ورىنباسارى.

«Ericsson» كومپانياسىنىڭ شىعىس ەۋروپا جانە ورتالىق ازيا وڭىرىندەگى راديو جانە كولىك جەلىلەرىن دامىتۋ جونىندەگى ۆيتسە-پرەزيدەنتى اناتولي يليايچ تۇركىستاندىقتاردى تاريحي ساتپەن قۇتتىقتادى. «Ericsson» كومپانياسى قازاقستاندا 120 جىلدان استام ۋاقىتتان بەرى جۇمىس ىستەيدى. 1989 جىلى سەمەيدە 48 ابونەنتكە ارنالعان ەڭ العاشقى «Ericsson» تەلەفون كوممۋتاتورى ورناتىلدى. ءبىز قازاقستانداعى تەلەفون بايلانىسىنىڭ باستاۋىندا تۇرمىز جانە ءاربىر جاڭا تەحنولوگيانىڭ، سونىڭ ىشىندە ۇيالى بايلانىستىڭ دا قازاقستانعا بىزبەن بىرگە كەلگەنىن ماقتان تۇتامىز. 5G جۇيەسى ءوڭىردىڭ دامۋىن جاڭا ساتىعا كوتەرەدى»، دەدى ول.

ال «Kcell» اق باس اتقارۋشى ديرەكتورى يۋري حارلاموۆ بۇگىندە تۇركىستان قالاسىنىڭ بۇكىل تاريحي ءارى ماڭىزدى ورتالىعىن قامتيتىن 8 سىرتقى ستانتسيا دايىندالىپ، تولىق جۇمىس ىستەپ تۇر. اتاپ ايتساق، قالا اكىمدىگى، «كونگرەسس حولل» سارايى، «تۇركىستان ارەنا» ستاديونى، اۆتوۆوكزال، «فاراب» كىتاپحاناسى، «باتىر» جاستار سارايى جانە وزگە نىساندار جۇيەگە ەنگىزىلگەن. الداعى ۋاقىت اۋەجاي، «Kcell» ابونەنتتىك ءبولىمى، «Rixos» قوناق ءۇيى سياقتى ماڭىزدى تۋريستىك نىسانداردا 5G جۇيەسىن ورناتۋ جوسپارلانعان.


سوڭعى جاڭالىقتار

پرەزيدەنت الماتى اكىمىن قابىلدادى

پرەزيدەنت • بۇگىن، 14:07

وتكەن تاۋلىكتە 187 ادام ىندەت جۇقتىردى

كوروناۆيرۋس • بۇگىن، 10:40

دوللار ارزاندادى

قارجى • كەشە

ۇقساس جاڭالىقتار