ۇشاق بيلەتتەرى قىمباتتادى

تۇركىستان وبلىسىندا ۇشاق بيلەتتەرىنىڭ قۇنى سوڭعى ءبىر جىل كولەمىندە 30 پايىزعا قىمباتتاسا، قىزىلوردا وبلىسىندا 22،9، ال ماڭعىستاۋ وبلىسىندا 19،4 پايىزعا وسكەن. ەلدەگى 17 ءوڭىردىڭ ىشىندە تەك سولتۇستىك قازاقستان وبلىسىندا عانا باعا بىلتىرعى قازان ايىنداعى كورسەتكىشىمەن قالعان. سونىمەن قاتار پاۆلودار (12،7 پايىز)، باتىس قازاقستان (15،3 پايىز) جانە اقمولا وبلىستارىندا (22،5 پايىز) دا باعا تومەندەۋى بايقالادى.

بۇل رەتتە قاڭتار-قىركۇيەك ارالىعىندا اۋە كوم­پا­نيا­لارىنىڭ تابىسى 265،7 ملرد تەڭگەگە جەتىپ، بىلتىرعى كورسەتكىشتەن ەكى ەسە اسىپ تۇسكەن. تابىستىڭ نەگىزگى بولىگى – 252،6 ملرد تەڭگە جولاۋشىلار تاسىمالىنان تۇسسە، قالعان 13،1 ملرد تەڭگە جۇك تاسىمالدارىن تاسۋ ناتيجەسىندە تۇسكەن. سالىستىرا ايتار بولساق، 2020 جىلدىڭ ءۇش توقسانىندا اۋە كومپانيالارىنىڭ تابىسى 135،8 ملرد تەڭگەنى قۇراعان. بۇل 2019 جىلدىڭ ءۇش توقسانىنداعى تابىس­تان ەكى ەسە از. ارينە بۇعان COVID-19 پاندەمياسىنا بايلانىستى تۋىنداعان ءتۇرلى شەكتەۋ شارالارى، شەكارالاردىڭ جابىلۋى اسەر ەتكەنى ءسوزسىز. اۋە كومپانيالارىنىڭ تابىسى شارىقتاي وسكەن ۋاقىت رەتىندە Finprom 2016 جانە 2019 جىلداردى ايرىقشا ءبولىپ اتايدى.

«2021 جىلدىڭ توعىز ايىندا اۋە كومپانيالارى 6،9 ملن ادامدى تاسىمالداعان. بۇل ءبىر جىل بۇرىنعىدان 81،5 پايىزعا جوعارى كورسەتكىش. «كوروناداعدارىسقا» دەيىنگى 2019 جىلمەن سالىستىرعاندا بيىل جولاۋشىلار تاسىمالى 8،1 پايىزعا ءوستى. ەسكە سالايىق، 2020 جىلدىڭ توعىز ايىندا جولاۋشىلار تاسىمالى 40،4 پايىزعا قۇلدىراپ، نەبارى 3،8 ملن ادامدى قۇراعان ەدى»، دەپ جازادى پورتال.

بيىل قاڭتار-قىركۇيەك اراسىندا اۋە كومپانيالارى 25 مىڭ توننا جۇك پەن باگاج تاسىمالداعان. بۇل دا بىلتىرعى دەرەكتەن 61،8 پايىزعا كوپ. ازاماتتىق اۆياتسيا كوميتەتىنىڭ مالىمەتىنشە، 2020 جىلى اۋە كومپانيالارىنىڭ شىعىنى 350 ملرد تەڭگە بولعان. قازىر ىشكى رەيستەردىڭ بارلىعى دەرلىك تولىقتاي قالپىنا كەلدى، سوندىقتان جولاۋشىلار تاسىمالى دا كۇن ساناپ ءوسىپ جاتىر.

«قازىر «قۋاتتى وڭىرلەر – ەل دامۋىنىڭ درايۆەرى» اتتى ۇلتتىق جوبا جاسالىپ جاتىر. ول بويىنشا بەس اۋەجاي (قوستاناي، ورال، قىزىلوردا، شىمكەنت، الماتى) مودەرنيزاتسيادان وتەدى. سونداي-اق 8 اەرودرومداعى اۋە لينياسى ينفراقۇرىلىمىن قالپىنا كەلتىرۋ جوسپارلانعان»، دەپ جازادى Finprom.

2020 جىلدىڭ قورىتىندىسى بويىنشا ىشكى اۋە تاسىمالى بويىنشا Air Astana كوش باستاعان. ولارعا ىشكى اۋە تاسىمالىنىڭ 70 پايىزى تيەسىلى. سونىڭ ىشىندە 31 پايىزى FlyArystan-نىڭ ەنشىسىندە. ەكىنشى جانە ءۇشىنشى ورىنداردى 24 جانە 4 پايىزبەن SCAT Airlines پەن Qazaq Air بولىسەدى. سونىمەن قاتار «يۋجنوە نەبو» 2 پايىزدىق كورسەتكىشكە يە. حالىقارالىق اۋە تاسىمالى بويىنشا دا Air Astana-نىڭ ءباسى جوعارى – 46 پايىز. SCAT Airlines 16 پايىزدى السا، «اەروفلوت» 9 پايىز دەڭگەيىندە جولاۋشىلاردى شەكارا اسىرادى. ۇزدىك بەستىك قاتارىنا Turkish Airlines (7 پايىز) جانە Flydubai (5 پايىز) كومپانيالارى دا كىرەدى.

2020 جىلى Air Astana-نىڭ تابىسى 400،3 ملن دوللارعا جەتكەن. اۋە كومپانياسىنىڭ قۇرامىندا ورتاشا جاسى 5،1 جىلدى قۇرايتىن 34 اۋە كەمەسى بار.