بۇگىنگى تاڭدا نۇر-سۇلتاندا ۆاكتسينانىڭ ءبىرىنشى كومپونەنتىن 476 مىڭنان استام ازامات الدى, 438 مىڭ تۇرعىن يممۋنداۋدىڭ تولىق كۋرسىنان ءوتتى.
اكىمدىكتە وتكەن بريفينگتە ەلوردانىڭ قوعامدىق دەنساۋلىق ساقتاۋ باسقارماسى باسشىسىنىڭ ورىنباسارى گۇلناز دوسمىرزاەۆا حابارلاعانداي, ۆاكتسيناتسيا پۋنكتەرى 36-دان استام مەديتسينالىق ۇيىمداردا جانە قالانىڭ 4 ساۋدا كەشەنىندە ورنالاسقان: «كەرۋەن» سوو, «ابۋ-دابي پلازا», «ازيا پارك» جانە «ەۆرازيا» ساۋدا ۇيلەرى.
«ازاماتتاردى ۆاكتسيناتسيالاۋعا 300-دەن استام مەديتسينا قىزمەتكەرى جۇمىلدىرىلدى. 15 قاراشادان باستاپ ەلوردا Pfizer پرەپاراتىمەن جۇكتى جانە بالا ەمىزەتىن ايەلدەردى, 12-18 جاس ارالىعىنداعى جاسوسپىرىمدەردى ۆاكتسيناتسيالاۋعا كىرىستى. تولىق ءۇش اپتا ىشىندە وسى ۆاكتسينامەن ءتيىستى كونتينگەنتتەن 9 300 ادام ۆاكتسيناتسيالاندى. Pfizer الۋ بويىنشا كوشباسشى بولىپ تۇرعان جاسوسپىرىمدەر - 6 200 – دەن استام بالا, ودان كەيىن بالا ەمىزەتىن انالار - 2 800-دەن استام جانە جۇكتى ايەلدەر-206 ادام. جاسوسپىرىمدەر ەكپەنى مەديتسينالىق ۇيىمداردا دا, ءوز مەكتەپتەرىنىڭ مەديتسينالىق پۋنكتتەرىندە دە الا الادى», دەپ حابارلادى گۇلناز دوسمىرزاەۆا.
سونىمەن قاتار 22 قاراشادان باستاپ بۇكىل ەل بويىنشا ازاماتتاردىڭ كوروناۆيرۋستىق ينفەكتسياعا قارسى رەۆاكتسيناتسياسى باستالدى. بۇگىنگى تاڭدا ەلوردادا مەديتسينالىق قىزمەتكەرلەر, پەداگوگتەر, كۇش قۇرىلىمدارىنىڭ قىزمەتكەرلەرى, 60 جاستان اسقان جانە يممۋنيتەتى تومەن ادامدار, مەديتسينالىق-الەۋمەتتىك مەكەمەلەردىڭ پەرسونالى مەن كونتينگەنتىنەن 2 100-گە جۋىق ادام كۆي-گە قارسى قايتالاما ۆاكتسينا الدى.
«رەۆاكتسيناتسيا سانيتارلىق نورمالار مەن كومپونەنتتەر اراسىنداعى ارالىقتى قاتاڭ ساقتاي وتىرىپ جۇرگىزىلەتىنىن اتاپ وتكىم كەلەدى. ۆاكتسينانى قايتادان مەديتسينالىق ۇيىمداردىڭ جانە سوو, ت.ب. ۆاكتسينالاۋ پۋنكتەرىنەن الۋعا بولادى. قىزىل ايماققا ورالماس ءۇشىن كارانتين رەجيمى تۋرالى ۇمىتپاۋ كەرەك. سونىمەن قاتار ۆيرۋستىڭ مۋتاتسياسىن ەسكەرە وتىرىپ, يممۋنيتەتتى ينفەكتسيادان مۇمكىندىگىنشە تەزىرەك قورعاۋ قاجەت. بۇعان تەك ۆاكتسيناتسيا كومەكتەسەدى», دەدى قالالىق دەنساۋلىق ساقتاۋ باسقارماسى باسشىسىنىڭ ورىنباسارى.
