«التىن دارىگەر» توسبەلگىسى ءوز قىزمەتىندە ەرەكشە كاسىبي شەبەرلىك پەن قايسارلىق تانىتقان دەنساۋلىق ساقتاۋ جۇيەسىنىڭ قىزمەتكەرلەرىنە ادال جانە ءمىنسىز ەڭبەگى ءۇشىن تاپسىرىلادى.
مەدال ماماننىڭ وتاندىق دەنساۋلىق ساقتاۋدى, حالىق دەنساۋلىعىن جاقسارتۋعا جانە بەلسەندى قوعامدىق قىزمەتكە قوسقان زور ۇلەسى مەن ەڭبەگىن مويىنداۋ بولىپ سانالادى.
ورازالى راحيموۆ دەنساۋلىق ساقتاۋ سالاسىندا 35 جىلدان استام جۇمىس ىستەپ كەلەدى. ەڭبەك جولىن تسەلينوگراد وبلىستىق اۋرۋحاناسىندا دارىگەر-ينتەرن بولىپ باستاعان, اۋىلدىق دارىگەرلىك امبۋلاتوريادا الدىمەن تەراپەۆت, سودان كەيىن باس دارىگەر بولىپ جۇمىس ىستەيدى. جەدەل مەديتسينالىق جاردەم بريگاداسىنىڭ دارىگەرى جانە بالالار اۋرۋحاناسىندا لور-دارىگەر بولدى. №3 قالالىق ەمحانادا ورازالى راحيموۆ 24 جىل جۇمىس ىستەيدى. سوڭعى جىلدارى ەسىل اۋدانى بويىنشا شاقىرىلعان مەديتسينالىق كوميسسيانىڭ توراعاسى.
«شىنىمدى ايتسام, كۇتپەدىم. بىراق مەنىڭ كانديداتۋرامدى ۇسىنعان جاندارعا ريزامىن. دەنساۋلىق ساقتاۋ سالاسىنداعى ەڭبەگىمنىڭ ەلەنۋى - مەن ءۇشىن ۇلكەن قۇرمەت پەن قۋانىش. سەزىمىمدى ايتىپ جەتكىزۋ مۇمكىن ەمەس», دەپ ءوز ويىمەن ءبولىستى دارىگەر.
ورازالى راحيموۆتىڭ اق حالاتىندا التىن جالاتىلعان جانە ءفيانيتى بار توسبەلگى ايقىن كورىنەدى.
ايتا كەتەيىك, بۇعان دەيىن COVID-19 پاندەمياسى كەزىندە قايتىس بولعان دارىگەرلەر «التىن دارىگەر» مەدالىمەن ماراپاتتالدى.
