ونەر • 01 جەلتوقسان، 2021

الماتىدا «باستاۋ» IX حالىقارالىق كينوفەستيۆالىنىڭ اشىلۋ سالتاناتى ءوتتى

39 رەت كورسەتىلدى

30 قاراشادا، الماتىدا «باستاۋ» IX حالىقارالىق ستۋدەنتتىك جانە دەبيۋتتىك فيلمدەر كينوفەستيۆالىنىڭ اشىلۋى ءوتتى. رەسمي اشىلۋ ءراسىمى اباي اتىنداعى قازاق ۇلتتىق وپەرا جانە بالەت تەاترىندا ءوتتى، دەپ جازادى Egemen.kz.

اشىلۋ سالتاناتىنا الماتى قالاسى اكىمدىگىنىڭ وكىلدەرى، ت.ق.جۇرگەنوۆ اتىنداعى قازۇوا رەكتورىنىڭ م.ا. شارىپبەك امىربەكوۆ، كينو جۇلدىزدارى مۇرات بيسەنبين، ادينا باجان، ولگا لاندينا جانە تاعى باسقالار قاتىستى. 

«مەنىڭ جانىم، مەنىڭ جۇرەگىم شىنايى قۋانىش پەن فەستيۆالدىڭ ءساتتى وتەتىنىنە دەگەن ۇمىتكە تولى. ءبىز بۇل فەستيۆالدى وتە اسىعىس دايىندادىق. ونىڭ جەتىستىگىنىڭ كەپىلى - ەڭ الدىمەن ءبىزدىڭ دوستارىمىز. ءبىزدى شىن جۇرەكتەن قولداعان ازاماتتاردىڭ بارلىعىنا ۇلكەن راحمەت»،  دەدى «باستاۋ» حكف-ءنىڭ پرەزيدەنتى سەرگەي ءازىموۆ.

سونداي-اق، سالتاناتتى كەشتە پاندەميا كەزىندە قايتىس بولعان بارلىق كينەماتوگرافيستەر ەسكە الىندى. سونىڭ ىشىندە، ءتىرى كەزىندە «باستاۋ» حكف قازىلار القاسىنىڭ قۇرامىنا كىرگەن فارحات ءابدىرايىموۆتى «قازاقستاندىق كينەماتوگرافقا قوسقان ۇلەسى ءۇشىن» ەرەكشە سىيلىعىمەن ماراپاتتادى. ماراپاتتى الۋعا ساحناعا اكتەردىڭ جۇبايى ۆيكتوريا، ۇلدارى اسان جانە تەمىرلان شىقتى.

فەستيۆال داۋرەن قامشىباەۆتىڭ «زەرە» دەبيۋتتىك كارتيناسىمەن اشىلدى. بۇعان دەيىن فيلم برازيلياداعى São Paulo International Film Festival 45-ءشى حالىقارالىق كينوفەستيۆالىنە قاتىسقان. كارتينانى قوناقتارعا رەجيسسەردىڭ ءوزى تانىستىردى.

كينوفەستيۆالدىڭ قازىلار القاسىن رەسەيلىك رەجيسسەر، پروديۋسەر، ستسەناريست جانە اكتەر يۋري بىكوۆ باسقارادى. سونىمەن بىرگە فەستيۆالدىڭ قازىلار القاسىنىڭ قۇرامىنا ترەنتوداعى (يتاليا) كينوفەستيۆالدىڭ كوركەمدىك جەتەكشىسى اندرەا مورگەن، قازاقستاندىق رەجيسسەر، ستسەناريست جانە پروديۋسەر رۇستەم ابدىراشەۆ، ستامبۋلداعى «بوسفور» كينوفەستيۆالىنىڭ كوركەمدىك جەتەكشىسى ەمرا كىليچ جانە قازاقستاندىق اكتريسا، پروديۋسەر، قر ەڭبەك سىڭىرگەن قايراتكەرى ۆەنەرا نيگماتۋللينا، محكف ىرىكتەۋ كوميسسياسىنىڭ مۇشەسى، 2morrow، «كراي سۆەتا. ۆوستوك» (ساحالين) ي «پوسلانيە ك چەلوۆەكۋ» (سانكت-پەتەبۋرگ) فەستيۆالدەرىنىڭ ۇيىمداستىرۋشىسى – الەكسەي مەدۆەدەۆ، BAFTA Student Film Award جۇلدەسىنىڭ يەگەرى جانە Berlinale talents قاتىسۋشىسى تاتيانا فەدوروۆسكايا، «ۇلتتىق كينونى قولداۋ مەملەكەتتىك ورتالىعى» باس پروديۋسەرى اداي ابەلدينوۆ، تاجىك پروديۋسەرى، كينورەجيسسەر، ستسەناريست، دۋشانبەدەگى بالالار كينوسىنىڭ ەكسپەريمەنتتىك مەكتەبىنىڭ جەتەكشىسى - يسكاندار ۋسمونوۆ، رەسەيلىك تەاتر جانە كينو اكتەرى، رەجيسسەر، ستسەناريست – يليا گليننيكوۆ جانە تاعى باسقالار بار.

«قىسقا مەتر - كينەماتوگرافتىڭ ەڭ كۇردەلى ءتۇرى. سەبەبى بەس، ون، جيىرما مينۋتتا ءسىز ءوزىڭىزدىڭ جوسپارىڭىزدى، ويىڭىزدى كورسەتۋىڭىز كەرەك. ال ەڭ ماڭىزدىسى جانە ەڭ قيىنى – وسىنداي قىسقا ۋاقىت ىشىندە كورەرمەندى ءوز كەيىپكەرىڭىزگە عاشىق ەتۋ»، دەدى BAFTA Student Film Award سىيلىعىنىڭ يەگەرى تاتيانا فەدوروۆسكايا. سونداي-اق، فەدوروۆسكايا گران-پري الاتىن فيلم جانە قازىلار القاسىنا ۇناعان تاعى ءبىر جوبانى BAFTA Students Academy-نا ۇسىنا الاتىندىعىن اتاپ ءوتتى.

الدىڭعى فەستيۆالدەردەگىدەي، «باستاۋ» كونكۋرستىق باعدارلاماسى تولىق مەتراجدى كوركەم فيلمدەر - BASTAU DEBUTS جانە قىسقا مەتراجدى فيلمدەر - Bastau SHORTS، سونداي - اق BASTAU DOCS - دەرەكتى جۇمىستاردان تۇرادى.

جىل سايىنعى وسى كينو مەرەكەسىن قر مادەنيەت جانە سپورت مينيسترلىگىنىڭ، الماتى قالاسى اكىمدىگىنىڭ، ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ، تۇران ۋنيۆەرسيتەتىنىڭ، ۇلتتىق كينونى قولداۋ مەملەكەتتىك ورتالىعىنىڭ جانە ش.ايمانوۆ اتىنداعى «قازاقفيلم» كينوستۋدياسىنىڭ قولداۋىمەن «Tanaris Production» جانە A Team كينوكومپانيالارى ۇيىمداستىرادى.

كورسەتىلىمدەرگە كىرۋ – تەگىن. «باستاۋ» IX حالىقارالىق ستۋدەنتتىك جانە دەبيۋتتىك فيلمدەر كينوفەستيۆالىنىڭ كەستەسىن –  https://bastauiff.com/  سايتىنان كورە الاسىزدار.

سوڭعى جاڭالىقتار

قىرعىزعا قارسى شىعادى

بوكس • بۇگىن، 09:00

فاتيما حانىمنىڭ كويلەگى

تاريح • بۇگىن، 08:59

ۆاگنەر لاۆ دانيادا وينايدى

فۋتبول • بۇگىن، 08:57

مىقتىلار مەلبۋرندە باس قوستى

تەننيس • بۇگىن، 08:51

كوكتالعا كوپىر سىيلاعان

ايماقتار • بۇگىن، 08:49

كاسىپ مەڭگەرگەن قاتاردان قالمايدى

قازاقستان • بۇگىن، 08:40

دونور بولۋ – ءومىر سىيلاۋ

مەديتسينا • بۇگىن، 08:35

الماتىعا 10 رەانيموبيل سىيلادى

مەديتسينا • بۇگىن، 08:31

«وميكرون» جەدەل تارالۋدا

الەم • بۇگىن، 08:23

ۇقساس جاڭالىقتار