قازىرگى ۋاقىتتا مىسىردا 4 مىڭعا جۋىق قازاقستاندىق تۋريست بار.
«ولاردىڭ بارلىعى الداعى كۇندەرى Air Astana اۋە كومپانياسىنىڭ 23 رەپارتاتسيا رەيسىمەن قازاقستانعا قايتارىلادى. قازىر مىسىردا جۇرگەن ازاماتتارعا ەش الاڭداۋعا سەبەپ جوق جانە ولاردان بارلىق سانيتارلىق تالاپتاردى ساقتاۋدى سۇرايمىز. مىسىرداعى جاڭا جىلدىق تۋرلاردى ساتىپ العان تۋريستەر ساياحاتتايتىن ەلدى اۋىستىرا الادى, سونداي-اق, اۋە قاتىناسى قالپىنا كەلگەنگە دەيىن قاراجاتتى دەپوزيتكە سالىپ نەمەسە قايتارىپ الۋلارىنا بولادى», دەدى «تۋريستىك قامقور» كورپوراتيۆتىك قورىنىڭ ءباسپاسوز قىزمەتى.
بيلەتتەردى قايتارۋ 3 اي بويى جۇرگىزىلەدى.
ەگەر مىسىرعا باراتىن بيلەتتەردى اۋە كومپانيالارىنىڭ كاسسالارىنان نەمەسە سايتتاردان ساتىپ العان بولسا, جولاۋشىلارعا جۇمسالعان قاراجات قايتارىلادى, دەپ مالىمدەدى يندۋستريا جانە ينفراقۇرىلىمدىق دامۋ مينيسترلىگى.
ال ەگەر بيلەتتى تۋروپەراتورلارىنان نەمەسە بيلەت ساتۋ قىزمەتىن كورسەتەتىن باسقا دا سايتتان ساتىپ العان بولسا, وندا بيلەتتى ساتقان ورىنعا جۇگىنۋگە تۋرا كەلەدى.
