ءدۇبىرلى سايىستا قارۋلى كۇشتەردىڭ, اسكەر تەكتەرى مەن وڭىرلىك قولباسشىلىقتارىنان ۇزدىك دەپ تانىلعان اسكەري بولىمدەر, ونىڭ ىشىندە كونكۋرستىق ەرەجەگە سايكەس ءبولىمنىڭ اتىنان ەڭ ۇزدىك دەپ تانىلعان 90 ەر اسكەري قىزمەتشى جانە 10 ايەل اسكەري قىزمەتشى باقتارىن سىنادى. اتالعان كونكۋرس ەكى ايعا جۋىق مەرزىمدە قاتىسۋشى اسكەري بولىمدەردىڭ اۋماعىندا ارنايى كوميسسيا مۇشەلەرىنىڭ تەكسەرۋىمەن ءوتتى.
بايقاۋ بارىسىندا ەرلەر قۇرامى ءۇش جانە بەس شاقىرىمعا قارۋمەن جۇگىرۋ, قول گراناتاسىن دالدىككە جانە قاشىقتىققا لاقتىرۋ, اسكەري قويان-قولتىق ۇرىسىنىڭ تاسىلدەرىن كورسەتۋ, 100 مەترگە جىلدامدىقپەن جۇگىرۋ, بەلتەمىرگە تارتىلۋ جانە جالپى اسكەري جاتتىعۋلار كەشەنىندە 400 مەتر قاشىقتىقتى قۇرايتىن كەدەرگىلەر جولاعىنان وتسە, ايەلدەر قۇرامى ءبىر شاقىرىمعا جۇگىرۋ, كەشەندى ەركىن جانە كۇشەيتىلگەن جاتتىعۋلاردى ورىندادى.
جەڭىمپازداردى انىقتاۋ بايقاۋ باعدارلاماسىندا كورسەتىلگەن سايىستاعى جاتتىعۋلاردى ورىنداۋ بارىسىندا جينالعان بارلىق ۇپاي سانى نەگىزىندە جۇزەگە اسىرىلدى.
سايىس قورىتىندىسى بويىنشا «وڭتۇستىك» وڭىرلىك قولباسشىلىعىنا قاراستى شىمكەنت گارنيزونىنىڭ مەحانيكالاندىرىلعان بريگاداسى ۇزدىك ناتيجە كورسەتىپ جەڭىمپاز اتاندى. ال, ەكىنشى ورىندى «باتىس» وڭىرلىك قولباسشىلىعىنىڭ اسكەري ءبولىمى يەلەنسە, ءۇشىنشى ورىن «استانا» وڭىرلىك قولباسشىلىعىنىڭ اسكەري بولىمىنە بەرىلدى.
– بايقاۋعا قاتىسقان اسكەري قىزمەتشىلەر دەنە دايىندىعى بارىسىندا وزدەرىنىڭ تىنىمسىز ەڭبەكتەرى مەن شەبەرلىكتەرىنىڭ جانە جەڭىسكە دەگەن ىنتا-جىگەرىنىڭ ارقاسىندا ۇزدىك اتاندىق. سونداي-اق, اسكەري ءبولىمنىڭ دەنە دايىندىعى دەڭگەيى جوعارى ەكەنىن كورسەتىپ, جاۋىنگەرلىك تاپسىرمالاردى ءاردايىم ورىنداۋعا دايىن ەكەندىگىمىزدى دالەلدەدىك, – دەيدى مەحانيكالاندىرىلعان بريگادا دەنە شىنىقتىرۋ دايىندىعىنىڭ باستىعى مايور ماديار باباحانوۆ.
ايتا كەتسەك, قازاقستان رەسپۋبليكاسى قارۋلى كۇشتەرىنىڭ اسكەري سپورت كەشەنى جانە جەكپە-جەك جاتتىعۋلارىنىڭ دەنە شىنىقتىرۋ دايىندىعىن ۇزدىك ۇيىمداستىرۋعا ارنالعان بايقاۋدىڭ جۇلدەگەرلەرى ماداقتاما قاعازدارىمەن ماراپاتتالىپ, جەڭىمپاز اسكەري بولىمگە كۋبوك تابىس ەتىلدى.
