«جالپى ەپيدەميولوگيالىق جاعداي تۇراقتى كۇيدە ساقتالىپ تۇر. ستاتسيونارلىق جانە امبۋلاتورلىق ەمدەۋدەگى ناۋقاستار سانى ايتارلىقتاي ازايدى. ينفەكتسيالىق اۋرۋحانالارداعى ورىندار 29 پايىزعا, ال رەانيماتسيالىق ورىندار 23 پايىزعا تولىق.
«قىزىل» ايماقتا سولتۇستىك قازاقستان وبلىسى عانا قالىپ وتىر, 5 ءوڭىر – «سارى» ايماقتا, 11 – «جاسىل» ايماقتا. باسقا ەلدەردە كوروناۆيرۋستىڭ «وميكرون» دەگەن جاڭا شتامم پايدا بولعانىن ەسكەرە وتىرىپ, مەملەكەتتىك شەكارادا باقىلاۋدى كۇشەيتۋ تۋرالى دەنساۋلىق ساقتاۋ مينيسترلىگىنىڭ ۇسىنىسىن قولدايمىن», دەدى اسقار مامين ۇكىمەت وتىرىسىندا.
پرەمەر-مينيستر ەل ىشىندە دە ەپيدەميولوگيالىق جاعداي ۇنەمى باقىلاۋدا بولۋى قاجەتتىگىن, عيماراتتار مەن كولىكتە ماسكا كيۋ, الەۋمەتتىك اراقاشىقتىقتى ساقتاۋ جالعاسۋ تيىستىگىن باسا ايتتى.
«حالىقتى ۆاكتسينالاۋمەن جانە رەۆاكتسينالاۋمەن تيىسىنشە قامتاماسىز ەتۋ كەرەك. قازىرگى ۋاقىتتا شامامەن 8,8 ملن ادام ءبىرىنشى كومپونەنتتى سالدىردى, بۇل 18 جاستان اسقان ادامداردىڭ 76,6 پايىزى جانە 8 ميلليوننان استام ادام ەكىنشى كومپونەنتتى سالدىردى, بۇل – 70,8 پايىز. بىراق بۇل ۇجىمدىق يممۋنيتەتتى قالىپتاستىرۋ ءۇشىن ءالى جەتكىلىكسىز. دەنساۋلىق ساقتاۋ مينيسترلىگىنە اقپارات مينيسترلىگىمەن جانە اكىمدىكتەرمەن بىرلەسىپ, وسى باعىتتاعى جۇمىستى كۇشەيتۋدى تاپسىرامىن», دەگەن پرەمەر-مينيستر جالپى باقىلاۋدى ورىنباسارى ەرالى توعجانوۆقا جۇكتەدى.
