«جاڭا «وميكرون» شتامىنىڭ انىقتالۋى الەمدەگى كوپتەگەن ەلدە الاڭداۋشىلىق تۋدىرۋدا. بىرقاتار ەۋروپا ەلى, سينگاپۋر, يزرايل قاتاڭ شەكتەۋ ءىس-شارالارىن قابىلداپ وتىر. دۇنيەجۇزىلىك دەنساۋلىق ساقتاۋ ۇيىمىنىڭ الدىن الا دەرەكتەرىنە سايكەس, جاڭا شتامم «دەلتا» نۇسقاسىنان دا قاۋىپتى جانە تەز تارالادى. سوندىقتان شتامدى ەل اۋماعىنا ەنگىزبەۋگە باعىتتالعان ءىس-شارالاردى قولداۋدى سۇرايمىز. ۇسىنىلعان شەكتەۋ ءىس-شارالارى ۆەدموستۆوارالىق كوميسسيانىڭ وتىرىسىندا قارالىپ, ماقۇلداندى. سونىمەن قاتار بيىل ماۋسىمدىق تۇماۋ جانە جرۆي-ءدىڭ تارالۋ جيىلىگى 2019 جىلمەن سالىستىرعاندا 1,4 ەسەگە ارتىپ وتىر. وسىعان وراي جانە الەمدەگى جاعدايدى ەسكەرە وتىرىپ, بارلىق اكىمدىكتەن سانيتارلىق تالاپتارعا باقىلاۋ كۇشەيتۋدى سۇرايمىز», دەدى ۆيتسە-پرەمەر.
ەرالى توعجانوۆ بىرىنشىدەن قوعامدىق ورىنداردا الەۋمەتتىك قاشىقتىق پەن ماسكا رەجيمى بويىنشا تۇسىندىرمە جۇمىستارىن ارتتىرۋ قاجەتتىگىن باسا ايتتى. بۇل رەتتە مونيتورينگ توپتاردىڭ جۇمىسىن جانداندىرۋ قاجەت.
«ەكىنشىدەن, كوروناۆيرۋسقا قارسى ۆاكتسينا جانە رەۆاكتسيناتسيا الۋعا شاقىرۋ اقپاراتتىق جۇمىستارىن كۇشەيتۋ وتە ماڭىزدى. ازاماتتاردىڭ ۆاكتسينا الۋى ءۇشىن قولايلى جاعداي قامتاماسىز ەتىلۋى ءتيىس. ۇشىنشىدەن, اكىمدىكتەر وڭىردەگى ينفەكتسيانىڭ تارالۋ دەڭگەيىنە كۇندەلىكتى تالداۋ جۇرگىزىپ وتىرۋى قاجەت. بۇل ءۇشىن ەپيدەميولوگيالىق احۋالدى باقىلاۋ جونىندەگى وڭىرلىك شتاب جۇمىستارىن كۇشەيتۋدى سۇرايمىز», دەدى ول.
