قوس ساياسي تۇلعا دا تاۋەلسىزدىك تىزگىنىنىڭ باس يەسى جاستار ەكەنىنە باسىمدىق بەرە وتىرىپ, ءوز تولعامدارى ارقىلى ءبىزدىڭ باعىت-باعدارىمىزعا اينىماس جول سىلتەپ, كوكەيىمىزگە سەنىم ۇيالاتار سوزدەرىن ناقتى مىسالدارمەن دايەكتەيدى. ال ادام بالاسى ءۇشىن سەنىمنەن كۇشتى قۇدىرەت جوق دەسەك, بۇل سەنىمنىڭ تالاي جاسقا رۋحاني كۇش سىيلايتىنىنا زارەدەي ءشۇبا ەتپەيمىز. ءوز ماقالاسىندا تاۋەلسىز ەل بولۋ ونى جاريالاۋمەن نەمەسە مەملەكەتتىڭ ىرگەتاسىن قالاۋمەن شەكتەلمەيتىنىن شەگەلەپ ايتقان قاسىم-جومارت كەمەل ۇلى: «تاۋەلسىزدىك ءۇشىن ناعىز كۇرەس كۇندەلىكتى ەڭبەكپەن, ۇزدىكسىز ءارى دايەكتى ەلدىك ساياساتپەن ماڭگى جالعاسادى. ءبىز قۋاتتى تاۋەلسىز مەملەكەتىمىزبەن عانا ۇلت رەتىندە جەر بەتىندە ساقتالامىز», دەگەن بولاتىن. ال ۇرپاقتار الدىنداعى بۇل ۇلى مىندەت ەلباسى ۇندەۋىندە: «رۋحىمىزدى قايراپ, ەڭسەمىزدى تىكتەپ, بۇدان دا بيىك اسۋلارعا جەتۋ ءۇشىن جانە تاۋەلسىز قازاقستاننىڭ جارقىن بولاشاعى جولىندا تىنباي جۇمىس ىستەۋگە ءتيىسپىز! ءبىز كەز كەلگەن سىناقتان سۇرىنبەي ءوتىپ, جەڭىسكە بىرگە جەتەمىز», دەگەن ايشىقتى سوزدەرمەن كورىنىس تابادى.
وي مەن سوزدە, ءسوز بەن ىستە بىرلىك تانىتىپ, بايتاعىنىڭ بەرەكەسىن ارتتىرۋ ءداستۇرىن كەرەي مەن جانىبەك حاندارىمىزدان سىڭىرگەن ەل ەدىك قوي. ەندەشە, تۇعىرىنا قونعان تاۋەلسىزدىك تۋىن ماڭگى ەتۋ جولىندا ءبىز دە ايانىپ قالمايىق!
سەرىك سەيىتمان,
مەملەكەت تاريحى ينستيتۋتىنىڭ عىلىمي قىزمەتكەرى
