اتالعان ءبىلىم وشاعىنىڭ باسشىسى جانار جۇمابەكوۆا ايتۋلى وقيعا ەل تاۋەلسىزدىگىنىڭ تورقالى تويىنا تاماشا تارتۋ بولعانىن ايتادى.
«بيىل تاۋەلسىزدىككە 30 جىل تولىپ وتىر. شيرەك عاسىرعا جۋىقتاعان بۇل شاتتىقتىڭ قاشاندا ءباسى باسىم. وسى ايبىندى مەرەيتوي قارساڭىندا ەل ىشىندە اتقارىلىپ جاتقان يگى ءىس-شارالار مەن ىزگى جۇمىستار كوڭىلگە قۋانىش ۇيالاتادى. اسىرەسە, ەلوردانىڭ تورىندە ورنالاسقان №78 مەكتەپ-گيمنازياسى ءۇشىن دە ەستە قالاتىن جىل. سەبەبى ءبىلىم ورداسىنا مەملەكەت جانە قوعام قايراتكەرى سماعۇل سادۋاقاس ۇلىنىڭ ەسىمى بەرىلدى. وسىلايشا, بىرنەشە جىلدان بەرى جاس ۇرپاققا قايراتكەردىڭ ەرلىك ىستەرىن ناسيحاتتاۋ باعىتىنداعى مەكتەپ مۇراجايىن اشۋ, تۇراقتى تۇردە «سماعۇلتانۋ» اپتالىعىن وتكىزۋ, قالالىق دەڭگەيدە عىلىمي كونفەرەنتسيا, رەسپۋبليكالىق دوڭگەلەك ۇستەل ۇيىمداستىرۋ سىندى اۋقىمدى جۇمىستاردىڭ ناتيجەسىن كوردىك. نەگىزى, مۇنداي ماڭىزدى باستامانى كوتەرىپ, ونىڭ جۇزەگە اسۋىندا, فيلولوگيا عىلىمىنىڭ دوكتورى, پروفەسسور, الاشتانۋشى ديحان قامزابەك ۇلىنىڭ ەڭبەگىن ەرەكشە اتاپ ءوتۋ كەرەك», دەيدى مەكتەپ ديرەكتورى ج.جۇمابەكوۆا.
ءبىز وسى رەتتە يگى ىسكە مۇرىندىق بولعان د.قامزابەك ۇلىنىڭ ءوزىن سوزگە تارتتىق. الاشتانۋشى ءوز ويىن س.سادۋاقاس ۇلىنىڭ ءومىرى مەن ەڭبەك جولى قازاقستاندا عانا ەمەس, شەتەلدەردە دە ناسيحاتتالۋى كەرەك ەكەنىن جەتكىزۋدەن باستادى. ونىڭ ايتۋىنشا, حح عاسىردىڭ باسىنداعى ۇلت زيالىلارىنىڭ اعارتۋ, ءبىلىم, مادەنيەت, ساياسات سالاسىنداعى ەڭبەكتەرى قازاق حالقىنا عانا ەمەس, الەمدىك تۇتاستىققا, ادامزاتتىق ۇيلەسىمگە قىزمەت ەتتى. سونىڭ ىشىندە سماعۇل سادۋاقاس ۇلى جاستايىنان ساياساتقا ارالاستى. ءبىلىم, مادەنيەت, اقپارات, قوعامدىق دامۋ باعىتى كىرەتىن حالىق اعارتۋ كوميسسارياتىن (مينيسترلىگىن) باسقاردى. وسىنداي ازاماتتىڭ اتىن ەلورداداعى مەكتەپكە بەرۋ ۇسىنىسى اكىمدىك تاراپىنان ءبىر اۋىزدان قابىلداندى.
«دەگەنمەن وزدەرىڭىز بىلەسىزدەر, ءبىراز ۋاقىت مەكەمە, جەر اتىن وزگەرتۋگە موراتوري جاريالاندى, سودان كەشەۋىلدەدى. وعان قوسا كوميسسيا وتىرىسى كەزىندە بىرقاتار كەدەرگىگە دە كەزىكتىك. وكىنىشكە قاراي, ءماسليحات دەپۋتاتتارى مەن قوعامدىق كەڭەس مۇشەلەرىنىڭ ىشىندە س.سادۋاقاس ۇلىن مۇلدە تانىمايتىن, ءتىپتى تانىعىسى دا كەلمەيتىن ادامدار بولدى. ءبىر-ەكەۋى قارسى سويلەپ, «تانىستارىڭدى تىقپالاپ جاتىرسىڭدار» دەگەنگە دەيىن باردى. ارينە, الاشتى جانە ۇلت زيالىلارى قايراتكەرلىگىن بىلمەۋ – قوعامدىق ساناداعى ولقىلىق. ءالى ەسىمىزدە, 1998 جىلى استانادا 40 مەكتەپ بولاتىن. سوندا ءبىراز زيالى بۇل وقۋ ورىندارىنا ءبىلىم-عىلىمنىڭ باستاۋىندا تۇرعان 40 الاش تۇلعاسىنىڭ ەسىمىن بەرەيىك دەگەنبىز. ول كەزدە الاشتى قادىرلەيتىن شەنەۋنىك تە ازداۋ ەدى. ال تاۋەلسىزدىكتىڭ 30 جىلدىعى قارساڭىندا وسى كوزقاراستىڭ سالقىنىن سەزگەنىمىزدە, كىمدى كىنالارىمىزدى بىلمەدىك. ابىروي بولعاندا, ءبارىبىر زيالىلىق پەن پاراسات جەڭدى. تۇپتەپ كەلگەندە جەڭىس – ناعىز تاباندىلىق تانىتقان مەكتەپتىڭ ۇجىمى مەن سول كەزدەگى قالالىق ءبىلىم باسقارماسىن باسقارعان قاسىمحان سەنعازيەۆتىكى. ءبىز عالىم رەتىندە ءىستىڭ ءساتتى باستالىپ, دايەكتەلۋىن جۇيەلەپ قانا وتىردىق», دەيدى د.قامزابەك ۇلى.
