سولتۇستىك قازاقستان وبلىسى پوليتسيا دەپارتامەنتىنىڭ ءباسپاسوز قىزمەتى ءمالىم ەتكەندەي, اڭشىلار شارتقا وتىرىپ, قارۋلارىن كاسىبي مامانداردىڭ كۇزەتىنە ۋاقىتشا ساقتاۋعا تاپسىرا الادى. شارتتىڭ تالاپتارى بويىنشا يەسى قارۋى مەن وق-دارىلەرىن كەز كەلگەن ۋاقىتتا زاڭدى پايدالانۋعا الىپ, كەيىن قايتا ساقتاۋعا تاپسىرا الادى.
«قارۋى بارلارعا ۇلكەن جاۋاپكەرشىلىك جۇكتەلگەن. ونى ساقتاۋدىڭ دا ءوز تالاپتارى بار. قارۋدى تەك سەيفتە جالعىز ءوزىن ساقتاۋ قاجەت. سونداي-اق دابىل ورناتۋى ءتيىس. پوليتسيا قىزمەتكەرلەرى قارۋدىڭ بەلگىلەنگەن ەرەجەلەرگە سايكەس ساقتالۋىنا كوز جەتكىزۋ ءۇشىن قارۋ يەلەرىن تۇرعىلىقتى جەرلەرى بويىنشا تەكسەرىپ تۇرادى. قارۋدىڭ ورتالىقتاندىرىلعان تۇردە ساقتالۋى يەلەرىن كوپتەگەن كەلەڭسىز جايتتاردان ساقتاندىرادى, قارۋدىڭ ۇرلانۋىنا, كريمينالدىق ورتاعا تۇسۋىنە جول بەرمەيدى», دەدى سقو پد اكىمشىلىك پوليتسيا باسقارماسىنىڭ باستىعى سەرىك ءالجانوۆ.
جىل باسىنان بەرى وبلىستا قارۋ يەلەرىنە قاتىستى 852 قۇقىق بۇزۋشىلىق انىقتالدى, ونىڭ 568-ءى قارۋدى ساقتاۋ ەرەجەلەرىن بۇزۋمەن بايلانىستى.
