ايماقتار • 19 قاراشا, 2021

جامبىل وبلىسىنداعى جول ساپاسى ءۇشىن 211 شەنەۋنىك جازالاندى

424 رەت

كورسەتىلدى

2 مين

وقۋ ءۇشىن

جامبىل وبلىسىنداعى جول ساپاسى ءۇشىن 211 شەنەۋنىك جازالاندى, دەپ حابارلايدى Egemen.kz.

گاۋھار قاپاش

جامبىل وبلىسىنداعى جول ساپاسى ءۇشىن 211 شەنەۋنىك جازالاندى

بۇل تۋرالى Polisia.kz سايتى جازادى.

سايت مالىمەتىنشە, بيىل وبلىستا 1684 جول تەكسەرىسى جۇرگىزىلىپ, تەكسەرۋ بارىسىندا 11 713 اقاۋ انىقتالعان.

«جۇرگىزىلگەن تەكسەرۋلەر ناتيجەسى بويىنشا جول ۇيىمدارىنىڭ باسشىلارىنا 1684 نۇسقاۋ بەرىلگەن. اۆتوكولىك جولدارىن كۇتىپ ۇستاۋداعى كەمشىلىكتەر بويىنشا 323 اقپارات جولداندى», دەلىنگەن حابارلامادا.

سونداي-اق, تەمىرجول وتكەلدەرىنە بارلاۋ جۇمىستارى جۇرگىزىلىپ, 185 اقاۋ انىقتالدى. وتكەلدەرگە قىزمەت كورسەتەتىن مەكەمە باسشىلارىنا ولاردى جويۋ تۋرالى 71 ۇيعارىم شىعارىلدى.

«بەرىلگەن نۇسقاۋلارعا سايكەس, وبلىستىق ماڭىزى بار جولداردا 3185 جول بەلگىسى ورناتىلدى, 6802 شاقىرىمنان اسا جول سىزبالارى سالىندى, 154 541 شارشى مەتر جول جوندەلدى, 53 جول بۋفەرلەرى اۋىستىرىلدى, 1660 دانا سيگنال باعانالارى مەن 8515 جارىق شاعىلدىرعىشتارى ورناتىلدى», دەلىنگەن حابارلامادا.

جولداردى كۇتىپ ۇستاۋ جانە جول قوزعالىسى قاۋىپسىزدىگىن قامتاماسىز ەتپەگەنى ءۇشىن 211 لاۋازىمدى تۇلعا اكىمشىلىك جاۋاپكەرشىلىككە تارتىلعان.

«جولداردا جۇمىستاردى ورىنداۋ, جولداردى, جول وتكەلدەرىن جانە باسقا دا جول قۇرىلىستارىن كۇتىپ ۇستاۋ تالاپتارىن ورىنداماعانى ءۇشىن قر اقبتك-ءنىڭ 631-بابى 1-بولىگىنە سايكەس 129 لاۋازىمدى تۇلعا اكىمشىلىك جاۋاپكەرشىلىككە تارتىلدى. تاعى ءبىر لاۋازىمدى تۇلعاعا قاتىستى وسىعان ۇقساس, بىراق جول-كولىك وقيعاسىن جاساۋعا اكەپ سوققان قۇقىق بۇزۋشىلىق ءۇشىن اكىمشىلىك حاتتاما تولتىرىلدى (قر اقبتك-ءنىڭ 631-بابى 2-بولىگى). اۆتوموبيل جولدارىن, تەمىرجول وتكەلدەرىن جانە جول قوزعالىسىن رەتتەۋدىڭ باسقا دا قۇرىلىستارىن نەمەسە تەحنيكالىق قۇرالدارىن بۇلدىرگەنى ءۇشىن (قر اقبتك-ءنىڭ 630-بابى, 1-بولىگى) 79 تۇلعا اكىمشىلىك جاۋاپكەرشىلىككە تارتىلدى», دەدى جامبىل وبلىسى بويىنشا پد جپب باسشىسى جايداربەك قۇتتىباەۆ.

سونىمەن قاتار, تاراز قالالىق پوليتسيا باسقارماسى مەن مەركى اۋداندىق پوليتسيا ءبولىمى بەرگەن نۇسقامالاردى ورىنداماعانى ءۇشىن قر اقبتك-ءنىڭ 462-بابىنىڭ 3-بولىگى بويىنشا «تاراز قالاسى اكىمدىگىنىڭ تۇرعىن ءۇي-كوممۋنالدىق شارۋاشىلىعى, جولاۋشىلار كولىگى جانە اۆتوموبيل جولدارى ءبولىمى» كمم مەن مەركى اۋدانى ت.رىسقۇلوۆ اۋىلدىق وكرۋگىنىڭ اكىمدىگى اكىمشىلىك جاۋاپكەرشىلىككە تارتىلدى.