اتالعان كونكۋرس وتاندىق عىلىمنىڭ دامۋىنا ەلەۋلى ۇلەس قوسقان عالىمدار مەن عىلىمي قىزمەتكەرلەردىڭ ەڭبەگىن باعالاۋ باعىتىندا قولعا الىنعان. ءبىلىم جانە عىلىم مينيسترلىگى جانىنداعى عىلىم كوميتەتىنىڭ ءتورايىمى جاننا قۇرمانعاليەۆا بۇل تۋرالى: «قازىرگى تاڭدا وتاندىق عىلىم سالاسىندا دامۋدىڭ جاڭا ساپالى كەزەڭى باستالعانداي. عالىمدارىمىزدىڭ ەڭبەكتەرى الەمدىك نارىققا شىعىپ جاتىر. جاقىندا عانا ءبىز 14 قازاقستاندىق عىلىمي ازىرلەمەنىڭ قىتاي, رەسەي, تۇركيا, گرۋزيا, چەحيا جانە قىرعىزستانعا ەكسپورتقا شىعارىلاتىنى تۋرالى مالىمدەگەن ەدىك. مەملەكەت باسشىسىنىڭ تاپسىرماسى بويىنشا مينيسترلىك عالىمدار مەن عىلىمي ۇيىمداردىڭ, جوعارى جانە جوعارى وقۋ ورنىنان كەيىنگى ءبىلىم بەرۋ ۇيىمدارىنىڭ قىزمەتكەرلەرىن جان-جاقتى قولداۋ ماسەلەلەرىنە نازار اۋدارادى. قازاقستاندىق عالىمداردى ىنتالاندىرۋ جانە عىلىمي قىزمەتتىڭ بەدەلىن ارتتىرۋ بويىنشا شارالار ازىرلەنىپ, ىسكە اسىرىلىپ كەلەدى. بيىل مينيسترلىك العاش رەت ەلىمىزدىڭ ۇزدىك عالىمدارىنا 50 سىياقى تاعايىنداماق. ولاردىڭ ارقايسىسى شامامەن 6 ملن تەڭگەدەن الادى», دەدى.
كوميتەت باسشىسىنىڭ ايتۋىنشا, عىلىمي جەتىستىكتەردى باعالايتىن بارلىق كريتەري عىلىمي جانە ساراپشىلار قاۋىمداستىعىمەن بىرلەسىپ ازىرلەنگەن. بايقاۋ كوميسسياسىنىڭ قۇرامىنا ەلىمىزدىڭ ءتۇرلى باعىتتا قىزمەت ەتەتىن جەتەكشى عالىمدارى مەن عىلىمي قوعامدىق بىرلەستىكتەردىڭ وكىلدەرى كىردى.
كونكۋرسقا قاتىسۋعا ءوتىنىم مينيسترلىكتىڭ https://universitycontest.iac.kz/bestresearcher/ اقپاراتتىق جۇيەسى ارقىلى ەلەكتروندى فورماتتا 15 جەلتوقسانعا دەيىن قابىلدانادى. ۇمىتكەرلەردىڭ عىلىمي جەتىستىكتەرى عىلىمي دارەجەسى, عىلىمي اتاعى, عىلىمي جاريالانىمدارى مەن مونوگرافيالارىنىڭ بولۋى, عىلىمي جوبالار مەن باعدارلامالارعا باسشىلىق جاساۋ سياقتى كريتەريلەر بويىنشا باعالانادى. بۇل رەتتە ۇمىتكەر سوڭعى جىلى ۋنيۆەرسيتەتتە كەمىندە ءبىر ءپاندى جۇرگىزىپ, سونداي-اق سوڭعى 3 جىلدا PhD فيلوسوفيا دوكتورى عىلىمي دارەجەسى بار كادرلاردى دايارلاۋى جانە عىلىم ماسەلەلەرى جونىندەگى كونسۋلتاتسيالىق ورگانداردىڭ جۇمىسىنا قاتىسۋى مىندەتتى. سونىمەن بىرگە بايقاۋعا قاتىسۋشى عىلىمي ازىرلەمەلەرىنىڭ وندىرىسكە ەنگىزىلۋى بويىنشا ناتيجەلەرىن ۇسىنۋى قاجەت.
بايقاۋ قورىتىندىسى بويىنشا جەڭىمپازدارعا 2000 اەك كولەمىندە سىياقى بەرىلەدى. بۇل 5 ملن 834 مىڭ تەڭگەنى قۇرايدى.
