قىرىق ءتورتىنشى قارسىلاس

ريوتا مۋراتا دەگەن كىم؟

جاپونيانىڭ نارا قالاسىندا 1986 جىلى دۇنيەگە كەلگەن مۋراتا اۋەسقوي بوكستان 2011 جىل­عى الەم بىرىنشىلىگىنىڭ كۇمىس جۇل­دە­گەرى, 2012 جىلعى لوندون وليم­پيا­داسىنىڭ چەمپيونى بولسا دا, ءوز ەلىندەگى اسا تانىمال سپورتشىنىڭ ءبىرى دەپ ايتۋ قيىن. ويتكەنى سۋمو سپورتىنىڭ داڭقى اسپانداپ تۇرعان ەلدە باسقا سپورت وكىلىنىڭ ايگىلى بولا قويۋى قيىن. دەسە دە ول بوكس بويىنشا جاپونياداعى ەڭ اتاقتى بىلعارى قولعاپ شەبەرى سانالادى. ءتىپتى ونىڭ بۇرىنعى قارسىلاسى روب برانت (اقش) مۋراتانى «جاپونيالىق لەبرون دجەيمس» دەپ اتاعان. «جاپونيادا بولعان جەكپە-جەگىمىزدىڭ الدىن­داعى ءباسپاسوز كونفەرەنتسياسىنا مەنىڭ كەيبىر جەكپە-جەكتەرىمدەگى سياق­تى ريوتانى كورۋ ءۇشىن كوپ­تەگەن جانكۇيەر كەلدى», دەيدى ول.

التى جاسىندا بوكس قولعابىن قولىنا كيگەن مۋراتا 2004 جىلدان باستاپ ءىرى جەتىستىكتەرگە قول جەت­كىزە باستادى. سول جىلى ۋنيۆەر­سيتەت­تىڭ ءبىرىنشى كۋرسىندا وقىپ جۇر­گەنىندە جاپونيا چەمپيونى اتا­نىپ, 2005 جىلى حوشيميندە وتكەن ازيا چەمپيوناتىندا قولا جۇلدەگە قول جەتكىزدى. ال 2006 جىلى قاتار استاناسى – دوحادا وت­كەن جازعى ازيا ويىندارىنىڭ باس­تاپقى باسەكەسىندە افينا وليمپياداسىنىڭ چەمپيونى, وتاندا­سىمىز باقتيار ارتاەۆقا تاپ كەلىپ, 24:5 ەسەبىمەن وڭباي جەڭىل­گەنى ەسىمىزدە. سودان كەيىن ريوتا قاتارىنان ءتورت جىل (2007, 2009, 2010 جانە 2011) جاپونيا بىرىن­شىلىگىندە قارسىلاس شاق كەلتىر­گەن جوق.

2008 جىلى وليمپيا ويىندارىنا قاتىسۋعا بەل بۋعان ول العاش بانگكوكتاعى ىرىكتەۋ تۋرنيرىنە قاتىسىپ, جارتىلاي فينالعا دەيىن جەتتى. فينالعا جولداما بەرەتىن باسەكەدە وزبەكستاندىق ەلشود را­سۋلوۆتان جەڭىلىپ, جارىستى قو­لا جۇلدەمەن تۇيىندەدى. بىراق ول بۇل ناتيجەمەن جولداماعا قول جەتكىزە المادى. استانادا وتكەن ەكىنشى ىرىكتەۋ كەزەڭى دە ريوتا ءۇشىن ءساتسىز اياقتالدى. شيرەك فينالدا حومايون اميريدەن ۇتىلعان مۋراتا جارىستى نەبارى جەتىنشى ورىنمەن قورىتىندىلادى. وسى ءبىر ساتسىزدىكتەن كەيىن جاپونيالىق بوكسشى قولعابىن شەگەگە ءىلۋدى ءجون كورىپ, ءوزى وقىعان ۋنيۆەرسيتەتتە ستۋدەنتتەرگە ءدارىس بەرىپ, بوكس كلۋبىندا جاتتىقتىرۋشى بولىپ جۇمىس ىستەدى. الايدا ارادا ءبىر جارىم جىل وتكەندە كارەراسىن قايتا باستاعان مۋراتانىڭ ەكىنشى تىنىسى اشىلىپ, ايتارلىقتاي جەتىستىكتەرگە قول جەتكىزە باستادى.

كارەراسىن قايتا جالعاعاننان كەيىنگى مۋراتانىڭ العاشقى ءىرى جارىسى 2010 جىلى استانادا وت­كەن پرەزيدەنت كۋبوگى بولدى. وكى­نىشكە قاراي, ونىڭ ەلىمىز­گە جاساعان ەكىنشى ساپارى دا نا­تيجەسىز اياقتالدى. العاشقى كە­زەڭ­دە گرۋزيالىق لەۆان گۋلەدا­نيدى جارىس جولىنان ىعىستىر­عانىمەن, شيرەك فينالدا جەرلەسىمىز دانا­بەك سۋجانوۆتان ايلاسىن اسىرا المادى.

مۋراتانىڭ جۇلدىزى 2011 جىلى باكۋدەگى (ازەربايجان) الەم چەمپيوناتىندا جاندى. جا­ھاندىق دودانىڭ ءبىرىنشى اينا­لىمىندا ول ەكى دۇركىن الەم چەم­پيونى وزبەكستاندىق اببوس اتوەۆتى تەحنيكالىق نوكاۋتپەن جەڭسە, كەيىنگى كەزەڭدەردە يراندىق موحامەد ساتتارپۋردى, گەرمانيالىق شتەفان حارتەلدى ەلىنە قايتاردى. وسىدان كەيىن ول شيرەك فينالدا يرلانديالىق دار­رەن ءو’نيلدى, جارتىلاي فينال­دا برازيليالىق ەسكيۆا فالكان­دى جەڭدى. فينالدا ۋكراينالىق ەۆگەني حيتروۆتىڭ وسال تۇسىن تابا الماي, العاشقى الەم بىرىن­شىلىگىن كۇمىس جۇلدەمەن اياقتادى.

اراعا ءبىر جىل سالىپ ريوتا 2012 جىلى لوندون وليمپياداسىندا اتوي سالدى. ىرىكتەۋ كەزەڭدەرىندە الجير جانە تۇركيا وكىلدەرىنەن باسىم تۇسسە, جارتىلاي فينال مەن فينالدا ەجەلگى قارسىلاستارى اببوس اتوەۆ پەن ەسكيۆا فالكاندى ءبىر ۇپاي ايىرماشىلىعىمەن جەڭىپ, وليمپ شىڭىنىڭ تورىنەن كورىندى. وسىلايشا, مۋراتا جاپو­نياعا 48 جىلدان كەيىن العاش رەت وليمپيادانىڭ التىنىن سىيلادى. لوندونداعى تابىستى ونەرىنەن كەيىن ول كاسىپقوي بوكستاعى قىراعى پرو­موۋتەرلەردىڭ كوزىنە ءتۇسىپ, 2013 جىلدان باستاپ ءبىرجولا كاسىپ­قويلار اراسىندا باق سىناۋعا بەل بۋدى.

ايگىلى بوب ارۋم باسقاراتىن Top Rank Promotions كومپانيا­سىمەن كەلىسىمشارت جاساعان جا­پونيالىق بوكسشى سەگىز جىلدان بەرى 18 جەكپە-جەك وتكىزىپ, 16-سىندا جەڭىسكە جەتتى. 13 قار­سى­­لاسىن نوكاۋتقا جىبەردى. ەكى اي­­قاسىندا قارسىلاسىنا ەسە جى­بەردى. 2017 جىلى حاسسان ن’دام ن’جيكامنان جەڭىلسە, 2018 جىلى روب برانتتان ۇتىلدى. بىراق ەكى رە­ۆانش كەزدەسۋىندە دە مۋراتا ەسەسىن قايتاردى. حاسسان ن’دام ن’جي­كاممەن بولعان ەكىنشى جەكپە-جەگىندە ريوتا جەتىنشى راۋندتا تەحنيكالىق نوكاۋتپەن جەڭىسكە جەتىپ, WBA نۇسقاسى بويىنشا الەم چەمپيونى بەلدىگىنە يەلىك ەتتى. كەيىن ول يتاليالىق ەمانۋەلە بلاندامۋرا, امەريكالىق روب برانت جانە كانادالىق ستيۆەن باتلەر سىندى بىلعارى قولعاپ شەبەرلەرىمەن قولعاپ ءتۇيىستىرىپ, الەم چەمپيونى اتاعىن ءساتتى قورعادى.

ء ۇشىنشى بوكسشىنىڭ ءۇمىتى

جوعارىدا ايتىپ وتكەنى­مىزدەي, مۋراتا – گولوۆكيننىڭ كارە­راسىنداعى ءۇشىنشى جاپونيا­لىق بوكس­شى. وتانداسىمىزدىڭ كۇن­شىعىس ەلىنىڭ بوكسشىلارىمەن تانىستىعى سوناۋ 2012 جىلى باس­تالدى. سول جىلى ۋكراينانىڭ بروۆارى قالاسىندا وتكەن بوكس كەشىنىڭ اندەركاردىندا گەننادي ماكوتو فۋتيگاميمەن (19-6) قول­عاپ ءتۇيىستىرىپ, وزىنە تيەسىلى ورتا سالماقتاعى WBA بەلدىگىن ءتورتىنشى مارتە, ال IBO چەمپيوندىق اتا­عىن ءبىرىنشى رەت قورعادى. 12 راۋند­قا جوسپارلانعان جەكپە-جەك ءۇشىن­شى راۋندتا وتانداسىمىزدىڭ تەحني­كالىق جەڭىسىمەن اياقتالدى.

وسى كەزدەسۋدەن كەيىن گولوۆكين اتاقتى امەريكالىق HBO تەلەارناسىمەن كەلىسىمشارتقا وتىرىپ, ءىرى جەكپە-جەكتەر وتكىزە باس­تادى. وتانداسىمىز 2013 جىلى بەس جەكپە-جەك وتكىزۋدى ماقسات ەتىپ, قار­سىلاسىنىڭ اتاق-داڭقىنا قاراماي كەز كەلگەن بوكسشىمەن شارشى الاڭدا كەزدەسۋگە دايىن ەكەنىن مالىمدەدى. بىراق اتاقتى بوكس­شىلار گەنناديمەن ايقاس وتكىزۋدەن باس تارتا باستادى. ءسوي­تىپ جۇرگەندە جاپونيالىق نو­بۋحيرو يسيدا وتانداسىمىزبەن جۇدىرىقتاسۋعا كەلىسىمىن بەردى. 2013 جىلى 30 ناۋرىزدا گەننادي گولوۆكين موناكودا جاپون بوكس­شىسىمەن كەزدەستى. راۋندتىڭ ال­عاشقى سەكۋندتارىنان باستاپ العا ۇمتىلعان گولوۆكين بۇل جولى دا قارسىلاسىن ءۇشىنشى راۋندتا تىزە بۇكتىردى. ءبىر ايتا كەتەرلىگى, يسيدا بۇعان دەيىنگى بىردە-ءبىر اي­قا­سىندا قارسىلاستارىنان مەرزى­مىنەن بۇرىن جەڭىلمەگەن ەدى.

جاپونيالىق بوكسشىلارمەن ءۇش راۋندتان ارتىق جۇدى­رىق­تاس­پايتىن گولوۆكينگە مۋراتا نەشە راۋند شىدار ەكەن؟ بۇل سۇراق­تىڭ جاۋابى 29 جەلتوقساندا ساي­تاما قالاسىنداعى Saitama Super Arena سپورت كەشەنىندە وتەتىن بوكس كەشىندە بەلگىلى بولماق.