اقش-قا العاش رەت 2017 جىلى جولى تۇسكەن دانيار اۋەلى بۇل ەلگە تۋريست رەتىندە ساپارلاپ بارعان. «سول كەزدە اقش-تا جۇمىس ىستەپ جۇرگەن ءبىر زاڭگەرمەن تانىسىپ, ول ماعان كوشىپ كەلۋدىڭ جولدارىن ايتتى. مەن ءتيىستى قۇجاتتاردى راسىمدەپ, كوپ ۇزاماي التى قۇرلىقتى اۋزىنا قاراتقان امەريكاعا كوشتىم. جوعارىدا ايتقان زاڭگەر تانىسىمنىڭ PR مەنەدجەرى, ياعني ونىڭ قوعاممەن بايلانىس بويىنشا مەنەدجەرى رەتىندە جۇمىس ىستەي باستادىم», دەيدى دانيار.
«ەلدەن جىراقتا جۇرگەن وتانداستارىمىزدىڭ باسىن قوسۋدى كوپتەن ويلاپ جۇرەتىنمىن. ودان بولەك امەريكاداعىلارعا قازاقستان تۋرالى ايتىپ بەرگىم كەلەتىن. «بورات» فيلمىنەن كەيىن ەلىمىزگە كوزقاراس وزگەرۋى مۇمكىن. كورگەننىڭ ءبارى ونىڭ اۆتور قيالىنىڭ جەمىسى ەكەنىن تۇسىنبەۋى عاجاپ ەمەس. وسىلاردىڭ بارلىعى جوسپار ەدى. ءبىر كۇنى كولىكتە راديو تىڭداپ كەلە جاتىپ, بىرنەشە تىلدە باعدارلاما بارىن بايقادىم. قىتاي مەن يسپان ءتىلىن ايتپاعاندا, قۇلاعىم ورىس ءتىلىن دە شالىپ قالدى. سول كەزدە ءوزىم راديو اشسام دەگەن يدەيا پايدا بولدى. البەتتە, بۇل ۇلكەن قاراجات پەن كوپ ۋاقىتتى قاجەت ەتەدى. سوندا ءارتۇرلى ەتنوستاردىڭ تىنىس-تىرشىلىگى, مادەنيەتى تۋرالى باعدارلامالارى بار Freedom FM باسشىلىعىمەن كەزدەسىپ, ءوز ۇسىنىسىمدى بىلدىرۋگە بەل بۋدىم», دەيدى دانيار.
Freedom FM باسشىلىعى شەتەلدەگى اۋە تولقىنى باعدارلامالارى تىزىمىنە قازاقستان تۋرالى دا جوبانى قوسۋعا كەلىسىمىن بەرىپتى. البەتتە, بۇعان وڭايلىقپەن قول جەتكىزىلدى دەپ ايتا المايمىز.
كوپ ۇزاماي دانيار قوجان Qazaq time باعدارلاماسىندا 2 ساعات بويى قازاقستان تۋرالى ايتىپ, قازاقتىڭ كۇمبىرلەگەن كۇيىن, اۋەزدى ءانىن امەريكا جۇرتشىلىعىن تانىستىرۋدى باستايدى.
«نيۋ-يوركتە 2 مىڭعا جۋىق قازاقستاندىق تۇرادى. مەن شەتەلدە ءجۇرىپ قازاقتىڭ قامىن جەپ, ەلىمىز ءۇشىن قىزمەت ەتكەن بابالارىمىزدىڭ ءىزىن جالعاستىرىپ كەلەمىن دەپ سەنەمىن. گەننادي گولوۆكين سياقتى ەلىمىزدىڭ تانىلۋى ءۇشىن ءوز ۇلەسىمدى قوسىپ ءجۇرمىن.
باعدارلاما بىرىڭعاي قازاق تىلىندە ەمەس. وعان بىرتە-بىرتە قول جەتكىزەرمىز دەپ ويلايمىن. Freedom FM راديوسى ورىس تىلىندە حابار تاراتاتىن تولقىن. وعان قوسا نيۋ-يوركتى تۇراق ەتكەن باۋىرلاس ۇلتتاردىڭ ءبارى دە ورىس تىلىندە ەركىن سويلەيدى. سوندىقتان اۋديتوريانى باۋراۋ ءۇشىن دە وسى تىلگە باسىمدىق بەرىلىپ وتىر. دەگەنمەن باعدارلاما بارىسىندا شىرقالاتىن اندەردىڭ 95 پايىزى قازاق تىلىندە دەپ ايتا الامىن. سونداي-اق قازاقتىڭ كۇيلەرى, تەرمە-تولعاۋلارى دا تاقىرىپقا ساي بەرىلىپ وتىرادى. وسىنىڭ ءوزى بۇگىندە ۇلكەن جەتىستىك بولىپ تۇر. سەبەبى امەريكادا دۇنيەنىڭ ءتورت بۇرىشىنان جينالعان جۇزدەگەن, ءتىپتى ودان دا كوپ ۇلت وكىلدەرى بار. وكىنىشكە قاراي, ولاردىڭ كوپشىلىگى قازاق ەلىنەن مۇلدە بەيحابار», دەدى كەيىپكەرىمىز.
قازاق گۋمانيتارلىق زاڭ اكادەمياسىن زاڭگەر ماماندىعى بويىنشا تامامداعان دانياردان راديودا باعدارلاما جۇرگىزۋ قيىن ەمەس پە دەپ سۇراعانىمىزدا, ول باعدارلامانى قولعا الاردا كوپ دايىندالعانىن جەتكىزدى.
«قازىر الەۋمەتتىك جەلىنىڭ داۋىرلەپ تۇرعان زامانى. مەن Instagram جەلىسىندە تىكەلەي ەفير ۇيىمداستىرىپ, وقىرماندارمەن سۇحبات قۇردىم. بۇل ماعان كوپ كومەكتەستى, توسىننان قويىلعان سۇراققا تاپقىرلىقپەن جاۋاپ بەرۋ, كوپشىلىك الدىندا ەركىن سويلەۋ, ءسوز ساپتاۋ سياقتى ماشىقتاردى دامىتتىم. راديونىڭ مەن ءۇشىن جاقسى جەرى – سەنى ءبارى ەستىگەنىمەن, كورمەيدى. بۇل دا ءبىر ءوز كەزەگىندە قولايلى.
دانيار ءبىر كەزدەرى بەلگىلى پروديۋسەر قىدىرالى بولمانوۆپەن بىرگە جۇمىس ىستەگەن. ونىڭ ايتۋىنشا, قازاقتىڭ ۇلتتىق مادەنيەتىنە قىزىعۋشىلىعى سول كەزدە ويانعان. «مەن قاشاندا ەلىمنىڭ پاتريوتىمىن. 2005-جىلدارى قىدىرالى بولمانوۆ الماتى قالاسى مادەنيەت باسقارماسىنىڭ باسشىسى بولىپ قىزمەت ەتتى. مەن ونىڭ كومەكشىسى بولىپ جۇمىسقا تۇردىم. ونىمەن جۇمىس ىستەگەنىمدە قازاقتىڭ مادەنيەتى قىزىقتىرا ءتۇستى. سول كەزدە-اق ەلىم ءۇشىن ەلەۋلى ءىس اتقارعىم كەلەتىن. سول كىسىدەن ۇيرەنگەنىم كوپ بولدى, ونىڭ مەكتەبىنەن ءوتتىم دەسە دە بولادى», دەيدى دانيار.
