جەكپە-جەكتى تىكەلەي ەفيردە كورسەتەتىن DAZN پلاتفورماسىنىڭ حابارلاۋىنشا, كەزدەسۋ 10 راۋندقا جوسپارلانعان. ايقاس انگليانىڭ ليۆەرپۋل قالاسىندا وتەدى. 35 جاستاعى كەتي تەيلور – اۋەسقوي بوكستا دا, كاسىپقوي بوكستا دا تالاي بيىكتى باعىندىرعان تاجىريبەلى بوكسشى. 2012 جىلى 60 كيلو سالماق دارەجەسىندە لوندون وليمپياداسىنىڭ چەمپيونى اتانعان ول بەس مارتە الەم بىرىنشىلىگىندە, التى رەت ەۋروپا چەمپيوناتىندا قارسىلاس شىداتپاعان. سونداي-اق ەۋرووداق چەمپيوناتتارىندا دا بىرنەشە رەت التىن تۇعىردان كورىنگەن. 2016 جىلدىڭ قاراشاسىندا كاسىپقوي بوكسقا بەت بۇرعان تەيلور بۇگىنگە دەيىن 19 جەكپە-جەك وتكىزىپ, بارلىعىندا باسىم تۇسكەن. 14-ءشى جەكپە-جەگىندە ءوز سالماعىندا الەمنىڭ ءابسوليۋتتى چەمپيونى اتانعان كەتي قاتارىنان بەس كەزدەسۋدە بەلبەۋلەرىن ءساتتى قورعاپ كەلە جاتىر. تەيلور ەڭ كەيىنگى ايقاسىن قىركۇيەكتە امەريكالىق دجەننيفەر حانمەن (18-4-1, 1 كو) وتكىزىپ, ۇپاي سانىمەن جەڭىسكە جەتتى.
ال 27 جاستاعى فيرۋزا شاريپوۆا 2012 جىلعى قازاقستان بىرىنشىلىگىنىڭ جەڭىمپازى, سارى قۇرلىق چەمپيوناتىنىڭ قولا جۇلدەگەرى. 2016 جىلى كاسىپقوي بوكسقا اۋىسقان وتانداسىمىز بۇگىنگە دەيىن 14 جەكپە-جەك وتكىزىپ, ونىڭ 13-ىندە قارسىلاستارىنان باسىم تۇسكەن. تەك ءبىر كەزدەسۋىندە عانا جەڭىلگەن. شاريپوۆا سوڭعى كەزدەسۋىن 12 قىركۇيەكتە رەسەيلىك ليۋبوۆ بەلياكوۆامەن وتكىزىپ, تەحنيكالىق نوكاۋتپەن جەڭگەن ەدى.
