وليمپيادا وزبەكستاننىڭ فەرعانا قالاسىندا 8-13 قاراشا ارالىعىندا ۇيىمداستىرىلدى. زياتكەرلىك بايقاۋعا 18 ەلدەن, سونىڭ ىشىندە رەسەي, ازەربايجان, بەلارۋس, رۋمىنيا جانە تاعى باسقا ەلدەن 130-عا جۋىق وقۋشى قاتىستى. ءال-فەرعاني اتىنداعى فيزيكا ءپانى بويىنشا حالىقارالىق وليمپيادا ەكى كەزەڭدە ءوتتى. ءبىرىنشىسى كەزەڭدە – جازباشا جۇمىستار, ال ەكىنشى كەزەڭدە پراكتيكالىق جۇمىستار قارالدى. جەڭىمپازداردىڭ قاتارىندا, التىن مەدالدى الىشەر ەركەباەۆ, نۇرداۋلەت نازارباي, كۇمىس مەدالدى دانيل شاتوحين, ورازحان حايدار, دىنمۇحاممەد ساپىبەك, ەرداۋلەت ناحىپ, بەرنار شامگونوۆ, دياس ەسپان السا, قولا مەدال يەگەرلەرى قاتارىندا بەكسۇلتان ءشارىپ, اسقار قاسىموۆ, نۇرجان حاسەنوۆ بار. وقۋشىلار وليمپياداداعى جەڭىستەرىن قازاقستان تاۋەلسىزدىگىنىڭ 30 جىلدىعىنا ارناپ وتىر.
«وليمپياداداعى باسەكەلەستىك وتە جوعارى بولدى. ويتكەنى قاتىسۋشىلاردىڭ باسىم بولىگى فيزيكا بويىنشا حالىقارالىق وليمپيادا (IPhO) رەيتينگىندە الدىڭعى قاتاردا. ءبىزدىڭ بالالار تاماشا ناتيجەلەر كورسەتىپ, قازاقستاندى الەمدىك ارەنادا لايىقتى كورسەتە ءبىلدى. قازىر ءبىلىم جانە عىلىم مينيسترلىگىنىڭ «دارىن» ورتالىعى وقۋشىلارىمىزدىڭ حالىقارالىق وليمپيادالارعا قاتىسۋىنا جاعداي جاساۋ ءۇشىن ءارتۇرلى دەڭگەيدەگى وليمپيادالاردى وتكىزۋ بويىنشا جۇمىس ىستەپ جاتىر», دەپ اتاپ ءوتتى ءبىلىم جانە عىلىم مينيسترلىگى مەكتەپكە دەيىنگى جانە ورتا ءبىلىم كوميتەتىنىڭ ءتورايىمى گۇلميرا كارىموۆا.
