«مەملەكەت باسشىسى جىلدىڭ سوڭىنا دەيىن «عىلىم تۋرالى» زاڭناماعا وزگەرىستەر ەنگىزۋدى تاپسىرعان بولاتىن. اتاپ ايتساق, عالىمداردىڭ جالاقىسىن بازالىق قارجىلاندىرۋعا قوسۋ, ىرگەلى زەرتتەۋلەرمەن اينالىساتىن عىلىمي ينستيتۋتتاردى تىكەلەي قارجىلاندىرۋ تەتىگىن ەنگىزۋ, عىلىمي زەرتتەۋلەردى قارجىلاندىرۋ مەرزىمىن بەس جىلعا دەيىن ۇزارتۋ, ۇلتتىق عىلىمي كەڭەستەر شەشىمدەرى بويىنشا اپەللياتسيا ينستيتۋتىن قۇرۋ. مەملەكەت باسشىسى قاسىم-جومارت كەمەل ۇلى توقاەۆتىڭ قولداۋىنىڭ ارقاسىندا اتالعان ماسەلەلەردى شەشۋ مۇمكىن بولىپ وتىر», دەپ جازدى مينيستر Facebook پاراقشاسىندا.
ۆەدومستۆو باسشىسى ەندىگى جەردە قارجىلاندىرۋ مەن ەسەپ بەرۋ راسىمدەرىن ءالى دە بولسا جەڭىلدەتۋ, بيۋروكراتيالىق كەدەرگىلەردى جويۋ جانە عالىمداردىڭ ءوز يدەيالارى مەن الەۋەتىن جۇزەگە اسىرۋى ءۇشىن قولايلى ورتا قۇرۋ سياقتى ماسەلەلەردى شەشۋ قاجەتتىگىن ايتادى. عىلىم تۋرالى زاڭناماعا ەنگىزىلەتىن وزگەرىستەر وسى ماسەلەلەردىڭ شەشىمىن تابۋعا ءتيىس.
«قازان ايىنىڭ سوڭىندا ۇكىمەت قاۋلىلارىمەن ءۇش نەگىزگى نورماتيۆتىك-قۇقىقتىق اكتىگە وزگەرىستەر ەنگىزىلدى. ولاردىڭ قاتارىندا ۇلتتىق عىلىمي كەڭەستەر تۋرالى ەرەجە, مەملەكەتتىك عىلىمي-تەحنيكالىق ساراپتامانى ۇيىمداستىرۋ جانە جۇرگىزۋ قاعيدالارى مەن بازالىق, گرانتتىق, باعدارلامالىق-نىسانالى قارجىلاندىرۋ قاعيدالارى بار», دەگەن اسحات ايماعامبەتوۆ بۇل نورمالار عالىمداردىڭ ومىرىنە قالاي اسەر ەتەتىنىن قىسقاشا باياندادى.
«بىرىنشىدەن, ەندى 12 ايدان استام مەرزىمگە گرانتتىق قارجىلاندىرۋ الاتىن جوبالار بويىنشا ارالىق ەسەپتەر تاپسىرۋدىڭ قاجەتى جوق. مەملەكەتتىك ستاندارتتىڭ بيۋروكراتيالىق نورمالارى بويىنشا بىرنەشە رەت ەنگىزىلەتىن تۇزەتۋلەردى ەسكەرە وتىرىپ, بۇرىن-سوڭدى جوبا جەتەكشىلەرىنە جىل سايىن قازان-قاراشا ايلارىندا گرانتتىق قارجىلاندىرۋ بويىنشا ارالىق ەسەپتەردى تاپسىرۋ ءۇشىن ءتورت اپتا قاجەت بولاتىن. ەندىگى كەزەكتە 40 بەتتەن تۇراتىن ەسەپ جازىپ, تاپسىرماي-اق جوبا تۋرالى قىسقاشا مالىمەتتەرى بار ساۋالنامانى تولتىرۋعا جارتى ساعات جەتكىلىكتى», دەيدى مينيستر.
ونىڭ جازباسىنا قاراعاندا, كونكۋرستىق راسىمدەردى وتكىزۋ مەرزىمى 145 جۇمىس كۇنىنەن 92-گە دەيىن قىسقارتىلىپ وتىر. سونداي-اق, كونكۋرستىق وتىنىممەن بىرگە بەرىلەتىن قوسىمشالاردىڭ سانى 12-دەن 5-كە دەيىن ازايتىلعان. ءتىپتى كەلەشەكتە ءبىر وتىنىمگە ءبىر قوسىمشا عانا ىلەستىرىپ بەرۋ قامتاماسىز ەتىلمەك. ءوتىنىم بەرگەن كەزدە فورس-ماجور جاعداي بولىپ قاسلا, ءۇش كۇننىڭ ىشىندە ءوتىنىش بەرۋشى ۇيىمنان باسقا دەرەكتىڭ ءبارىن وزگەرتۋگە مۇمكىندىك بەرىلەدى.
«عىلىمي جانە عىلىمي-تەحنيكالىق قىزمەتتىڭ ناتيجەلەرىن كوممەرتسيالاندىرۋ بويىنشا جەكە ۇلتتىق عىلىمي كەڭەس قۇرىلادى. ونىڭ قۇرامىنا نەگىزىنەن ەكونوميكانىڭ ناقتى سەكتورى مەن ۆەنچۋرلىك بيزنەستىڭ وكىلدەرى, ماركەتولوگتار, تاۋەكەل-مەنەدجەرلەر, ءىرى ينۆەستيتسيالىق جوبالاردىڭ قاتىسۋشىلارى, قارجى ساراپشىلارى جانە تاعى باسقالار كىرەدى. ۇلتتىق عىلىمي كەڭەس مۇشەلەرىنىڭ ادەپ كودەكسى بەكىتىلدى. ونى بۇزۋ كەڭەستەن شىعارىپ جىبەرۋگە نەگىز بولادى. ەندى ۇلتتىق عىلىمي كەڭەس قۇرامىنداعى عالىمداردىڭ سانى كوپ بولادى, ياعني 50%-دان استامى عالىمداردان قۇرالادى. بۇرىن ەرەجە بويىنشا ۇلتتىق عىلىمي كەڭەس قۇرامىندا مەملەكەتتىك ورگاندار مەن قوعامدىق بىرلەستىكتەردىڭ وكىلدەرى كوپ بولاتىن», دەلىنگەن ءمينيستردىڭ جازباسىندا.
ونىڭ ايتۋىنشا, زاڭ اياسىندا عالىمدارعا ەلەۋلى قارجىلىق ەركىندىك بەرىلىپ وتىر. جوباعا بولىنگەن قاراجات ۇنەمدەلگەن جانە پايدالانىلماي قالعان جاعدايدا عىلىمي جەتەكشى ونى جالاقىعا, وزگە دە قىزمەتتەر مەن جۇمىستارعا, ماتەريالدار مەن جابدىقتاردى ساتىپ الۋعا, جالعا الۋعا, جابدىقتار مەن تەحنيكانى پايدالانۋ شىعىستارىنا ءوز بەتىنشە بواعىتتاي الادى.
«بۇعان دەيىن عالىمدار ءاربىر ۇساق-تۇيەك ءۇشىن ۇلتتىق عىلىمي كەڭەسكە جۇگىنۋگە ءماجبۇر بولاتىن. اتالعان ماڭىزدى تۇزەتۋلەر توپتاماسى قابىلدانىپ, كۇشىنە ەنە باستادى. الايدا, بۇل دا جەتكىلىكسىز. عىلىم كوميتەتىنە پروتسەستەردىڭ باسىم بولىگىن ەلەكتروندىق فورماتقا كوشىرۋ جانە بارلىق پروتسەسس پەن مەملەكەتتىك قىزمەتتەردىڭ تولىق رەينجينيرينگىن جۇرگىزۋگە, سونداي-اق راسىمدەردىڭ مەرزىمىن ازايتۋعا باعىتتالعان تاعى ءبىر وزگەرىستەر توپتاماسىن ازىرلەپ, ەنگىزۋ تاپسىرىلدى», دەپ جازدى اسحات ايماعامبەتوۆ.
