«بيىلعى 10 ايدا مەملەكەتتىك بيۋدجەتكە 8 ترلن 719 ملرد تەڭگە كىرىس ءتۇستى نەمەسە جوسپار 102,9%-عا اتقارىلدى. رەسپۋبليكالىق بيۋدجەتكە 5,6 ترلن تەڭگە ءتۇستى نەمەسە جوسپار 100,2%-عا اتقارىلدى. جالپى, كىرىستەر بويىنشا جوسپار 13 ملرد تەڭگەگە, ونىڭ ىشىندە سالىقتار - 24 ملرد تەڭگەگە اسىرا ورىندالدى. بۇل رەتتە سالىقتىق ەمەس تۇسىمدەر 14 ملرد تەڭگەگە اتقارىلمادى», دەدى قارجى ءمينيسترى ۇكىمەت وتىرىسىندا.
ونىڭ ايتۋىنشا, سالىق بويىنشا اسىرا ورىنداۋدىڭ نەگىزگى سومالارى كورپوراتيۆتىك تابىس سالىعىنا, پايدالى قازبالاردى وندىرۋگە سالىناتىن سالىققا جانە شيكى مۇنايعا ەكسپورتتىق كەدەندىك باجعا تيەسىلى.
«كورپوراتيۆتىك تابىس سالىعى بويىنشا جوسپاردىڭ اسىرا ورىندالۋى 666 ءىرى سالىق تولەۋشى بويىنشا اۆانستىق تولەمدەردىڭ 66,5%-عا ۇلعايۋىنا بايلانىستى. پايدالى قازبالاردى وندىرۋگە سالىق بويىنشا جوسپاردى اسىرا ورىنداۋعا 2020 جىلمەن سالىستىرعاندا بيىلعى 10 ايدا نەگىزگى ەكسپورتتىق پوزيتسيالارعا باعانىڭ ورتا ەسەپپەن 28%-عا ءوسۋى اسەر ەتتى. شيكى مۇنايعا ەكسپورتتىق كەدەندىك باج بويىنشا جوسپاردىڭ اسىرا ورىندالۋىنا بيىلعى 10 ايداعى مۇناي باعاسىنىڭ ورتا ەسەپپەن 44,6%-عا ءوسۋى اسەر ەتتى», دەپ ءتۇسىندىردى ە. جاماۋباەۆ.
سونىمەن بىرگە جەرگىلىكتى بيۋدجەتتەردىڭ كىرىستەرى 108,1%-عا اتقارىلدى جانە 3,1 ترلن تەڭگەنى قۇرادى. جوسپار 231 ملرد تەڭگەگە, ونىڭ ىشىندە سالىق بويىنشا – 177 ملرد تەڭگەگە اسىرا ورىندالعان.
