«اتامەكەن» تاراتقان اقپاراتقا سۇيەنسەك, 2020 جىلعى ستاتيستيكا بويىنشا 10 023 ادام «مەملەكەتتىك جانە جەرگىلىكتى باسقارۋ», «ماركەتينگ», «مەنەدجمەنت», «الەمدىك ەكونوميكا», «باعالاۋ», «ەسەپ جانە اۋديت», «قارجى جانە ەكونوميكا» سياقتى 8 ماماندىق بويىنشا باكالاۆردى ءبىتىرىپ, ديپلوم العان.
ۇلتتىق كاسىپكەرلەر پالاتاسى باسقارما توراعاسىنىڭ ورىنباسارى ولجاس ورداباەۆ: «بۇل تۇلەكتەردىڭ 2500-ءى – دەكرەتتىك دەمالىستا, اسكەردە, ماگيستراتۋرادا (قازاقستاندا جانە شەتەلدە) وقۋىن جالعاستىرىپ جاتىر نەمەسە شەتەل ازاماتتارى. قالعان 7 523 ادامعا ساراپتاما جۇرگىزىلدى. 79 پايىزى ديپلوم العاننان كەيىن 12 اي ىشىندە جۇمىسقا ورنالاسقان, بىراق ونىڭ 71 پايىزى عانا 3 ايدان اسا ۋاقىتتان بەرى جۇمىس ىستەيدى (تۇراقتى جۇمىسپەن قامتىلعان)», دەدى.
«اتامەكەن» ۇكپ اناليتيكالىق دەرەكتەرىنە سايكەس Big4 (Ernst&Young, KPMG, Deloitte, PricewaterhouseCoopers) كومپانياسى «بۋحگالتەرلىك ەسەپ جانە اۋديت», «قارجى» ماماندىقتارى بويىنشا كوبىنە كەلەسى ۋنيۆەرسيتەتتەردىڭ تۇلەكتەرىن قابىلدايدى: KIMEP; قازاق-بريتان تەحنيكالىق ۋنيۆەرسيتەتى (اكادەميالىق ادالدىق ليگاسىنىڭ مۇشەسى); م.نارىكباەۆ اتىنداعى كازگيۋ ۋنيۆەرسيتەتى (اكادەميالىق ادالدىق ليگاسىنىڭ مۇشەسى); NARXOZ ۋنيۆەرسيتەتى; Almaty Management University (اكادەميالىق ادالدىق ليگاسىنىڭ مۇشەسى).
ولجاس ورداباەۆ اتالعان سالا تۇلەكتەرى ءۇشىن ەڭ ءىرى جۇمىس بەرۋشىلەر قاتارىندا «قازاقستان حالىق بانكى» اق, «ەۋرازيالىق بانك» اق, Kaspi Bank اق, «حوۋم كرەديت بانك» اق جانە «بانك تسەنتركرەديت» اق كومپانيالارى بار ەكەنىن ايتادى.
