Polisia.kz مالىمەتىنشە, تۇركىستان قپب-عا جەرگىلىكتى تۇرعىن پاتەر ۇرلىعى تۋرالى ارىزدانعان. جابىرلەنۋشىنىڭ ايتۋىنشا, ونىڭ ۇيىنە تەرەزە ارقىلى بەلگىسىز بىرەۋ كىرىپ, قۇنى 100 مىڭ تەڭگە تۇراتىن تىگىن ماشيناسىن ۇرلاپ كەتكەن. اتالعان جايت قر قك-ءنىڭ 188-بابى (ۇرلىق) بويىنشا تىركەلگەن.
ۇرلىقتى اشۋ ماقساتىندا تۇركىستاندىق تاجىريبەلى پوليتسيا قىزمەتكەرلەرىنەن جەدەل-تەرگەۋ توبى قۇرىلدى. جەدەل ۋاكىلدەر قاجەتتى ءىس-شارالار كەشەنىن جۇرگىزىپ, جاقىن ماڭداعى اۋماقتاردى ارالاپ, كۋالاردان سۇراستىردى, سونداي-اق بەينەباقىلاۋ كامەرالارىن تەكسەردى.
ءبىرشاما ۋاقىتتان كەيىن جەدەل-ىزدەستىرۋ ءىس-شاراسى ناتيجەسىندە تۇركىستان قپب-نىڭ قىزمەتكەرلەرى كۇدىكتى رەتىندە جەرگىلىكتى تۇرعىندى قۇرىقتادى. تەرگەۋ بارىسىندا كۇدىكتىنىڭ وسىنداي 14 پاتەر ۇرلىعىن جاساعانى انىقتالدى. قولدى بولعان زاتتاردىڭ بارلىعى ايعاقتى زات رەتىندە تاركىلەنىپ الىنىپ, زاڭدى يەلەرىنە قايتارىلدى.
قازىرگى ۋاقىتتا اتالعان جايتتار بويىنشا سوتقا دەيىنگى تەرگەۋ امالدارى جۇرگىزىلىپ, قىلمىستىق ءىس ايىپتاۋ اكتىسىمەن سوتقا جولداندى. كۇدىكتى قاماۋعا الىندى.
ءوز كەزەگىندە, تۇركىستان وبلىسىنىڭ پوليتسەيلەرى ازاماتتارعا ساق بولۋ كەرەكتىگىن جانە ءوز ۇيلەرىن قاراۋسىز قالدىرماۋ قاجەتتىگىن ەسكەرتەدى.
