كلۋبتار اراسىنداعى ەڭ بەدەلدى ءتۋرنيردىڭ نەگىزگى كەزەڭىنە – 18 رەت, ەليتالى ساتىسىنا 15 مارتە شىققان الماتىنىڭ «قايراتى» بيىلعى دودادا رەسەيدىڭ «تيۋمەن», بەلارۋستىڭ «ۆيتەن» جانە فرانتسيانىڭ «انەر-ۆيلنەۆ» كوماندالارىمەن ا توبىندا وينايتىن بولدى. توپتاعى ماتچتار رەسەيدە وتەدى. جانكۇيەرلەردىڭ ەسىندە بولسا, «قايرات» چەمپيوندار ليگاسىنىڭ نەگىزگى كەزەڭىندە «تيۋمەن» كلۋبىمەن كەزدەسىپ, 3:3 ەسەبىمەن تەڭ تۇسكەن-ءدى. ال «انەر-ۆيلنەۆ» جارىستىڭ اتالعان ساتىسىندا قازاقستاندىق «اتىراۋدى» 6:0 ەسەبىمەن جەڭگەن بولاتىن.
سونىمەن قاتار ەليتالى كەزەڭنىڭ ۆ توبىندا «سپورتينگ» (پورتۋگاليا), «حوۆوكۋبو» (نيدەرلاند), «ولميسسۋم» (حورۆاتيا), «سينارا» (رەسەي); س توبىندا «پلزەن» (چەحيا), «دوبوۆەتس» (سلوۆاكيا), «حاللە-گوويك» (بەلگيا), «بارسەلونا» (يسپانيا) جانە D توبىندا «بەنفيكا» (پورتۋگاليا), «ۋراگان» (ۋكراينا), «حالاداش» (ماجارستان), «لەۆانتە» (يسپانيا) كوماندالارى سىنعا تۇسەدى. بۇل كەزەڭنىڭ ويىندارى 30 قاراشا مەن 5 جەلتوقسان ارالىعىندا وتەدى. فينالعا ءار توپتىڭ جەڭىمپازى عانا جولداما الادى.
