سەناتور باقتىباي شەلپەكوۆ زاڭ جوباسى قىلمىستىق كىرىستەردى زاڭداستىرۋعا جانە تەرروريزمدى قارجىلاندىرۋعا قارسى ءىس-قيمىل جونىندەگى ەۋرازيالىق توپتىڭ ءوزارا باعالاۋىنىڭ ەكىنشى راۋندىن وتكىزەر الدىندا, ۇلتتىق زاڭناماعا فاتف-تىڭ ستاندارتتارىنان تۋىندايتىن حالىقارالىق مىندەتتەمەلەردى, مەملەكەتتىڭ ىشكى دەڭگەيىندە ناقتى ىسكە اسىرۋ, ياعني يمپلەمەنتاتسيالاۋ ماقساتىندا ازىرلەنگەنىن ايتتى.
«جوبادا كورسەتىلگەن زاڭنامالىق شارالار ساراپشىلاردىڭ ءوزارا باعالاۋ كەزىندەگى تۋىنداۋى مۇمكىن ەسكەرتپەلەردى بولدىرماۋعا جانە ەلىمىزدى حالىقارالىق ۇيىمدار مەن بىرىككەن ۇلتتار ۇيىمىنا مۇشە مەملەكەتتەر تاراپىنان ىقتيمال ەكونوميكالىق سانكتسيالاردان ساقتاندىرۋعا مۇمكىندىك بەرەدى. بۇدان باسقا, ەلىمىزدەگى لاۋازىمدى تۇلعالاردىڭ اقشامەن جانە وزگە م ۇلىكپەن جاسايتىن وپەراتسيالارى بويىنشا ءتيىستى باقىلاۋدى زاڭنامالىق دەڭگەيدە بەلگىلەۋ كوزدەلگەن. ال قارجى مونيتورينگى اگەنتتىگى, ءوز كەزەگىندە وسى ادامداردىڭ جانە وتباسى مۇشەلەرىنىڭ, جاقىن تۋىستارىنىڭ جەكە ءتىزىمىن جۇرگىزەتىن بولادى», دەدى سەناتور.
سونداي-اق جوبادا تسيفرلىق اكتيۆتەردى شىعارۋ, ولاردىڭ ساۋدا-ساتتىعىن ۇيىمداستىرۋ, وسى اكتيۆتەردى اقشاعا, نە بولماسا باسقا م ۇلىككە ايىرباستاۋ جونىندەگى قىزمەتتەردى جۇرگىزەتىن تۇلعالاردى, قارجى مونيتورينگى سۋبەكتىلەرىنە جاتقىزۋ قاراستىرىلعان.
«مەكەمەنىڭ زاڭدى يەسى تۋرالى مالىمەتتەردىڭ اشىقتىعىن بەلگىلەۋ ماقساتىندا ۋاكىلەتتى ورگانعا ۇلتتىق ءتىزىلىمىنىڭ دەرەكتەرىنە قول جەتكىزۋ ۇسىنىلعان. وسى زاڭ جوباسىمەن 4 زاڭعا ءتيىستى وزگەرىستەر مەن تولىقتىرۋلار ەنگىزىلەدى. بۇل «سايكەستەندىرۋ نومىرلەرىنىڭ ۇلتتىق تىزىمدەرى تۋرالى», «قىلمىستىق جولمەن الىنعان كىرىستەردى زاڭداستىرۋعا (جىلىستاتۋعا) جانە تەرروريزمدى قارجىلاندىرۋعا قارسى ءىس-قيمىل تۋرالى», «رۇقساتتار جانە حابارلامالار تۋرالى», «اقپاراتتاندىرۋ تۋرالى», دەپ ءتۇسىندىردى باقتىباي شەلپەكوۆ سەناتتا.
قارجى جانە بيۋدجەت كوميتەتى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قىلمىستىق جولمەن الىنعان كىرىستەردى زاڭداستىرۋعا (جىلىستاتۋعا) جانە تەرروريزمدى قارجىلاندىرۋعا قارسى ءىس-قيمىل ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭدى قابىلداۋدى سۇرادى.
ءوز كەزەگىندە دەپۋتاتتار تالقىلاۋدان كەيىن زاڭ جوباسىن قابىلدادى.
