ەلىمىزدە جەكە كاسىپكەردى تىركەۋدەن باستاپ, ارنايى سالىق رەجىمدەرىن تاڭداۋ, ەسەپ-قيساپ پەن شىعىس-كىرىستەردى جۇرگىزۋ جۇمىستارىندا ايتارلىقتاي قيىندىقتار كەزدەسەدى. مۇنداي راسىمدەرگە ۋاقىت تا كوپ كەتەدى. سوندىقتان مەملەكەت باسشىسى كاسىپكەرلەر ءۇشىن سالىق مىندەتتەمەلەرىن ورىنداۋ راسىمدەرىن جەڭىلدەتۋ جونىندە ارنايى تاپسىرما بەرگەن بولاتىن. وسى مىندەتتى جۇزەگە اسىرۋ ماقساتىندا جانە بيزنەس سۋبەكتىلەرىنىڭ ءجۇمىسىن جەڭىلدەتۋ ءۇشىن مەملەكەتتىك كىرىستەر كوميتەتى E-Salyq Business ءموبيلدى قوسىمشاسىن ازىرلەپ شىعاردى. بۇل جۇيەدە كاسىپكەرلەردىڭ سالىق تولەۋىنە بايلانىستى بارلىق قىزمەت ءتۇرى قامتىلعان.
مەملەكەتتىك كىرىستەر كوميتەتى توراعاسىنىڭ ورىنباسارى جايدار ىڭكارباەۆتىڭ ايتۋىنشا, قوسىمشانى جۇكتەپ العان كاسىپكەرگە سالىق بولىمشەلەرىنە بارۋدىڭ قاجەتى جوق, ەشقايدا شىقپاي-اق, تەلەفونداعى قوسىمشامەن بارلىق شارۋانى بىتىرۋگە بولادى. قىسقاشا ايتقاندا, E-Salyq Business قوسىمشاسى – كاسىپكەرلەردىڭ مەملەكەتتىك كىرىس باسقارمالارىنا بارىپ الاتىن قىزمەتتەرىنىڭ تەلەفونداعى نۇسقاسى. «قوسىمشانى قولدانۋدىڭ ارتىقشىلىعى سول, كاسىپكەرلەر سالىقتار مەن الەۋمەتتىك تولەمدەردى ەسەپتەۋدەن بوساتىلادى. ويتكەنى قوسىمشا كاسسا اپپاراتىنىڭ فۋنتسيونالىمەن جەتىلدىرىلگەن. كاسسا تۇبىرتەكتەرى بازاسىندا كاسىپكەردىڭ كىرىسى ايقىندالادى دا سونىڭ نەگىزىندە سالىقتار مەن تولەمدەر اۆتوماتتى تۇردە ءوزى ەسەپتەلەدى جانە سالىق دەكلاراتسياسى دا اۆتوماتتى تۇردە تولتىرىلادى. بۇعان قوسا, سالىق سالۋدىڭ جاڭا رەجىمىن قولداناتىن كاسىپكەر سالىق ەسەپتىلىگىن ۇسىنۋدان بوساتىلادى», دەيدى ج.ىڭكارباەۆ ورتالىق كوممۋنيكاتسيالار قىزمەتىندە وتكەن بريفينگتە.
E-Salyq Business قوسىمشاسى ازىرشە سىناق رەتىندە ەنگىزىلىپ وتىر. سوندىقتان كاسىپكەردىڭ ءبارى بىردەي ونى قولدانا المايدى. جوباعا جەكە كاسىپكەر رەتىندە تىركەلگەندەر مەن ارناۋلى سالىق رەجىمىن قولداناتىندار عانا قاتىسا الادى. كاسىپكەرلىك قىزمەتتى ونلاين رەجىمدە جۇزەگە اسىرعىسى كەلگەن بيزنەس وكىلى قوسىمشانى جۇكتەپ, اۆتوريزاتسيادان وتكەننەن كەيىن جەكە كاسىپكەر رەتىندە تىركەۋ قىزمەتىن تاڭداۋعا ءتيىس. ول ءۇشىن سەرۆيس سۇراعان ساۋالدارعا جاۋاپ بەرىپ, قاجەتتى دەرەكتەمەلەردى تولتىرۋ قاجەت.
«قازىرگى كەزدە ءموبيلدى قوسىمشا اقمولا جانە جامبىل وبلىستارىندا تەستىلەۋدەن ءوتىپ جاتىر. بۇگىندە باس-اياعى 3,5 مىڭعا جۋىق كاسىپكەر وسى قوسىمشاعا تىركەلىپ, پايدالانۋدا. بيىل تاعى 100 مىڭعا جۋىق دارا كاسىپكەردى جوباعا قوسۋ كوزدەلىپ وتىر. الداعى جىلدان باستاپ قوسىمشا تولىق رەجىمدە ىسكە قوسىلادى», دەيدى ج.ىڭكارباەۆ.
كوميتەت مالىمەتىنە قاراعاندا, E-Salyq Business جاڭا ءموبيلدى قوسىمشاسى كاسىپكەرلەردىڭ سىن-ەسكەرتپەسى مەن ۇسىنىستارىن ەسكەرە وتىرىپ, ءالى دە جەتىلدىرىلە تۇسپەك. اتاپ ايتقاندا, ەڭبەك شارتتارى جونىندەگى دەرەكتەردى الۋ جانە بەرۋ ءۇشىن ءتيىستى مينيسترلىكپەن بىرلەسە جۇمىس ىستەۋ, كاسىپكەرلەردىڭ بانكتىك شوتتارىنا كەلىپ تۇسكەن اۋدارىمدار بويىنشا ەكىنشى دەڭگەيلى بانكتەرمەن كەلىسىمدەر جۇرگىزۋ, ولاردان العان دەرەكتەردى قوسىمشاعا ەنگىزۋ سەكىلدى شارۋالار الداعى جىلدىڭ مىندەتىندە تۇر.
مەملەكەتتىك كىرىستەر كوميتەتى سالىق كودەكسىنىڭ نورمالارىن قولدانۋعا دايىن بولۋ ءۇشىن جاڭا قوسىمشانى باسقا وڭىرلەرگە كەزەڭ-كەزەڭىمەن تاراتىپ, 2022 جىلى بىرىڭعاي جەر سالىعىن ەسەپتەيتىن قىزمەتتى دە قوسىمشاعا ەنگىزۋدى جوسپارلاپ وتىر.
E-Salyq Business ءموبيلدى قوسىمشاسىن ازىرشە Play market-تەن جۇكتەۋگە بولادى. سونىمەن قاتار App store جانە AppGallery-دە قوسىمشانى ورنالاستىرۋ جونىندەگى وتىنىمگە جاۋاپ الۋ راسىمدەرى ءجۇرىپ جاتىر. جاقىندا بۇل جەلىلەردە دە E-Salyq Business پايدا بولماق.
