ادامداردان ءاردايىم العىس پەن باتا الادى

ەرەكشە قاجەتتىلىگى بار ادامدارعا مەملەكەت قامقورلىعى قاي كەزدە دە اۋا­داي قاجەت. ولاردى ومىرگە بەيىمدەۋ، ەڭبەككە ىنتالاندىرۋ، كەشەندى كومەك كورسەتۋدىڭ ماڭىزى زور. وسى ماقساتتا ىسكە اسقان ايشىقتى جوبانىڭ ءبىرى – بەلسەندى ۇزاق ءومىر ءسۇرۋ ورتالىقتارى. بۇگىنگى تاڭدا الماتىدا مۇنداي بىرنەشە ۇجىم قاريالارعا ۇزدىكسىز قولداۋ كور­سە­تۋمەن اينالىسىپ وتىر. مەدەۋ اۋدانىنا قاراستى بەلسەندى ۇزاق ءومىر ءسۇرۋ ورتالىعىنىڭ جاس مامانى ايگەرىم شىڭعىسقىزى ءوز قىزمەتىنە قاتىستى ويىمەن ءبولىستى.

– بىرەر جىلدان بەرى وسى ورتالىقتا جۇمىس ىستەيمىن. قارتتار دا بالا سياق­تى. ولارعا ەرەكشە كوڭىل ءبولۋ كە­رەك. ورتالىعىمىزعا كەلۋشىلەر ءان ايتىپ، شاحمات وينايدى، ساۋىقتىرۋ جاتتىعۋلارىن جاسايدى، ءوزارا سىر-سۇحبات قۇرىپ ءتۇرلى تاقىرىپتا اڭگىمە وربىتەدى. كوپشىلىك ادامدار زەينەتكە شىققاندا ءوزىن قوعامنان الشاقتاپ قالعانداي سەزىنەدى. بۇل ءبىر جاعىنان پسيحولوگيالىق سوققى، سول سەبەپتەن دە ولار ءوزىن قۇردىمعا تاستاپ جىبەرۋى مۇمكىن. ويتكەنى ءبارى بىردەي ۇيىندە نەمەرەسىن باعىپ، ءتۇرلى دەمالىس ورىندارىنا بارىپ ءومىرىن ءوزى قالاعانداي وتكىزىپ جاتقان جوق. اسىرەسە قالالىق جەردەگى پاتەرلەردە تۇراتىن قارتتار تاڭنان كەشكە دەيىن ءتورت قابىرعاعا تەلمىرىپ وتىرعىسى كەلمەيدى. وزىنە قولايلى ورتا ىزدەيدى، تەڭ قۇربىسىمەن سىرلاسقىسى كەلەدى. ولاردىڭ ءاربىرىنىڭ پىكىرىن تىڭ­داپ، بارىنشا قولايلى جاعداي جاساۋعا تىرىسامىز. ءبىزدىڭ ۇجىمداعى بارلىق الەۋمەتتىك قىزمەتكەر جۇمىسىنا جاۋاپكەرشىلىكپەن قارايدى. ءوز كاسىبىمدى جاقسى كورەمىن، بۇل ءبىر جاعىنان ادال تابىس بولسا، ەكىنشى جاعىنان ساۋاپتى ءىس دەپ ويلايمىن. ويتكەنى ۇلكەن كىسىلەردەن كۇندە العىس پەن باتا الامىز، – دەيدى ايگەرىم شىڭعىسقىزى.

الماتى – ەلىمىزدىڭ مادەني ورتالىعى. سول سەبەپتى دە مەگاپوليستە مۇمكىندىگى شەكتەۋلى شىعارماشىلىق ادامدارىن قولداۋعا باعىتتالعان شارالار ءجيى وتەدى. اسىرەسە قالادا سۋرەت ونەرىنە اۋەستەنەتىن جانداردىڭ كوپ ەكەنىن ەسكەرسەك، ولارعا رۋحاني مەدەت بەرۋ ماڭىزدى ءىس. جۋىردا وسىنداي يگى باستاما ءا.قاستەەۆ اتىنداعى ونەر مۋزەيىندە قانات قاقتى. رەسمي دەرەككە سۇيەنسەك، ەلىمىزدە ەستۋ مەن كورۋ قابىلەتىنەن ايىرىلعان 18 مىڭ ادام ءومىر ءسۇرىپ جاتىر. ىرگەلى ونەر وشاعىندا كورۋ مەن ەستۋ قابىلەتى ناشار ازاماتتار ءۇشىن ءسۋبتيترى بار ىم-يشارا تىلىندەگى بەينە-ەكسكۋرسيالار جوباسى ىسكە قوسىلدى. جانارى جارقىراپ تۇرماعانىمەن، ەستۋ مەن كورۋ قابىلەتى ناشار تۇلعالارعا ەرەكشە سەزگىرلىك قابىلەت بەرىلەدى دەگەندى تالاي مارتە ەستىگەنبىز. بۇل دا جاراتىلىستىڭ شەكسىز ادىلدىگىن ايگىلەپ تۇرعانداي. مۇنداي تۇلعالارعا ءبىلىم بەرۋ، رۋحاني دامىتۋ تاقىرىبىنىڭ كوكجيەگى كەڭەيە بەرسە دەيسىڭ.

– كەزەكتى جوبامىز مۋزەي بازاسىندا قازاق جانە ورىس تىلىندە جارىق كوردى. ماقساتىمىز – ايرىقشا نازار اۋدارۋدى قاجەت ەتەتىن كەلۋشىلەرىمىزگە قولجەتىمدى بەينەەكسكۋرسيالار ۇيىمداستىرۋ. ولار­عا دا ونەر قولجەتىمدى بولۋى كەرەك. اتالعان ساناتتاعى بالالار مەن جاسوسپىرىمدەرگە مۋزەي كوللەكتسياسىن تانىستىرۋ ارقىلى الەۋمەتتەندىرۋ، سول ارقىلى وتانداستارىمىزدى الەۋمەتتىك-مادەني ومىرگە تارتۋدى كوزدەيمىز. وسى جوبانى ىسكە اسىرۋ ارقىلى ءبىز شىعارماشىلىق جانە كوركەمدىك ۇيىمداردىڭ نازارىن ەستۋ قابىلەتى بۇزىلعان ادامداردىڭ، اسىرەسە، بالالار مەن جاسوسپىرىمدەردىڭ پروبلەمالارىنا اۋدارۋعا نيەتتىمىز، – دەيدى مۋزەي قىزمەتكەرى اقبوتا الىمعوجينا.

بۇگىندە مۇمكىندىگى شەكتەۋلى جان­دار­عا مەملەكەتتىك قىزمەت كورسەتۋ مەن ولاردى جۇمىسپەن قامتۋ ماڭىزدى ماسەلە. ايتالىق، «ازاماتتارعا ارنالعان ۇكى­مەت» مەملەكەتتىك كورپوراتسياسىنىڭ الما­تى فيليالىندا جەتپىسكە تارتا مۇمكىندىگى شەكتەۋلى جان جۇمىس ىستەيدى.

«مۇگەدەكتەر ءۇشىن كوپتەگەن قىزمەتتى ونلاين رەجىمدە الۋ قاراستىرىلعان. ماسەلەن، ازامات مۇگەدەكتىك توبىن انىق­تاۋ ءۇشىن كوميسسيادان وتكەندە، باسقا ەش جەرگە جۇگىنۋدىڭ قاجەتى جوق. ونىڭ قۇجاتتارى ونلاين رەجىمدە مەم­لەكەتتىك كورپوراتسياعا بەرىلىپ، وسىن­دا بارلىق جاردەماقى مەن تولەم­ ءتۇرى بەلگىلەنىپ، ونىڭ تولەنۋى ۇيىم­داس­تىرىلادى. مامان­دا­رىمىز جارتى جىلدا 1 737 ۇيگە بارىپ 2 مىڭعا جۋىق قىزمەت كورسەتتى»، دەيدى مەكەمەنىڭ ءباسپاسوز قىزمەتى.

ايرىقشا قامقورلىقتى قاجەت ەتەتىن ازاماتتارعا قىزمەت كورسەتۋ ساپاسى تا­لاپقا ساي بولعانى ابزال. بۇل تاقى­رىپ كامەلەتكە تولماعاندارمەن جۇمىس ماسە­لەلەرى جونىندەگى جەدەل ارەكەت ەتۋ شتابىنىڭ كۇنى كەشە وتكەن وتىرىسىندا دا كەڭىنەن تالقىلاندى. الماتىنىڭ ءبىلىم باسقارماسى ورتا ءبىلىم بەرۋ ۇيىم­دارىنىڭ بازاسىندا جۇمىس ىستەي­تىن پسيحولوگيالىق قىزمەتتەر جۇمى­سىنىڭ تيىمدىلىگىن ارتتىرۋ بويىنشا شولۋ جۇرگىزدى. مەگاپوليستىڭ 207 مەكتەبىندە 365 پسيحولوگ، 207 الەۋمەتتىك پەداگوگ جۇمىس ىستەيدى. 286 پسيحولوگ كامەلەتكە تولماعاندارمەن قارىم-قاتىناستىڭ جاڭا فورماتتارىنا ساي وقىتىلىپ، ولارعا جان-جاقتى قولداۋ كورسەتىلمەك.