وقيعا • 28 قازان، 2021

پەنجىمدەگى وقۋشىلار توبەلەسى: اۋدان اكىمى تۇرعىندارمەن كەزدەستى

69 رەت كورسەتىلدى

بۇگىن الماتى وبلىسىنداعى پانفيلوۆ اۋدانىنىڭ اكىمى پەنجىم اۋىلىنداعى جاعداي بويىنشا تۇرعىندارمەن كەزدەستى، دەپ حابارلايدى Egemen.kz.

پانفيلوۆ اۋدانى پەنجىم اۋىلىنداعى وقۋشىلاردىڭ 27 قازاندا جاساعان تەرىس قىلىعى الەۋمەتتىك جەلىلەردە كوپ تالقىلاندى. بۇگىن كەنتتىڭ مادەنيەت ۇيىندە ماسەلە وبلىستىق دەڭگەيدە كوتەرىلدى. جانجال 9، 10 جانە 11-سىنىپ وقۋشىلارىنىڭ سوزگە كەلىسە الماۋىنان باستالعان بولاتىن. سوڭى 20-دان استام ادام قاتىسقان جاپپاي توبەلەسكە ۇلاستى. اتىس كەزىندە 2 ادام زارداپ شەكتى. كەزدەسۋ بارىسىندا جيىنعا قاتىسۋشىلار جاستاردىڭ بۇزاقىلىعىن تالقىلادى.

«مەن مۇندا ءتۇنى بويى بولدىم. جاستاردىڭ جاۋاپسىز ارەكەتىن كوردىم. ولار مەكتەپ جانجالىن ءورشىتىپ، جەرگىلىكتى تۇرعىندارعا زيان كەلتىردى. مەن اقساقالداردى، جەرگىلىكتى تۇرعىنداردى بالالاردى ءبىر-ءبىرىن قۇرمەتتەۋگە ۇيرەتۋگە شاقىرعىم كەلەدى. سىزدەر ءومىر بويى وسى جەردە تۇراسىزدار. ءبىر-بىرىڭىزىگە دوس، كورشى، باۋىر، ارىپتەسسىزدەر. سىزدەر قۋانىش پەن قايعى-قاسىرەتتى بىرگە بولىسەسىز. وسى قۇندىلىقتاردىڭ بارلىعىن بالالارىڭىزعا جەتكىزۋلەرىڭىز كەرەك»، دەدى پانفيلوۆ اۋدانىنىڭ اكىمى تالعات ومىراليەۆ.

اۋىل تۇرعىندارى دا ءبىر-ءبىرىن قۇرمەتتەۋگە شاقىردى.

«جاستار – ەلدىڭ بولاشاعى. ءبىز ولاردىڭ تاربيەسىنە كوڭىل ءبولۋىمىز كەرەك. مۇنداي جاعدايلار ارقىلى بۇكىل ەلدىڭ كوڭىلىندە بىزگە قاتىستى تەرىس پىكىر تۋىندايدى. دەگەنمەن، ايتقىم كەلگەنى، بۇل ۇلتارالىق قاقتىعىس ەمەس. وسىنداي جاعدايدىڭ ورىن الۋى وسكەلەڭ ۇرپاقتى تاربيەلەۋدەگى ولقىلىقتاردىڭ كورىنىسى دەپ بىلەمىن. وقيعانى ءوربىتۋدىڭ قاجەتى جوق. كەي ادامدار وسى جايتتى تەرىس ماعىنادا قولدانادى. ولار كەشەگى كەزدەيسوق ءورتتى سول وقيعانىڭ سالدارى رەتىندە كورسەتۋگە تىرىستى. بىراق ولاي ەمەس جانە سىزدەر ءبارىن بىلەسىزدەر. ءبىر-ءبىرىمىزدى قۇرمەتتەيىك. ءبىزدىڭ ەلىمىز دە، جەرىمىز دە – ءبىر»، دەدى پەنجىم اۋىلىنىڭ تۇرعىنى اۋتجان حامراەۆ.

پانفيلوۆ اۋدانىنىڭ اكىمى تالعات ومىراليەۆ بولعان وقيعادا ۇلتارالىق ماسەلە جوقتىعىن ايتتى.

«قازىر وسى جەردە ۇلتارالىق ۇلكەن ماسەلە بار دەپ ايتا المايمىن. بۇل جاس بالالار اراسىنداعى ورىن العان جايت. ياعني بالالاردىڭ تەنتەكتىك تانىتۋىنىڭ سالدارىنان ورىن العان. تەك قانا مەكتەپتەن ەمەس، ۇيدەن تاربيە بەرۋ، ءبىر-ءبىرىن سىيلاۋعا ۇيرەتۋ كەرەك. اۋدان اكىمى رەتىندە ۇلتارالىق ماسەلەنى كورىپ وتىرعانىم جوق. تاربيە جاعىنا ۇلكەن ءمان بەرۋىمىز قاجەت»، دەدى اۋدان اكىمى.

سوڭعى جاڭالىقتار

دجەرۆونتا دەۆيس جەڭىل سالماقتى تاڭدادى

كاسىپقوي بوكس • بۇگىن، 17:45

ۇقساس جاڭالىقتار