قازاقستان • 27 قازان، 2021

ەرلان قارين جانۋارلارعا قاتىستى زاڭعا پىكىر ءبىلدىردى

50 رەت كورسەتىلدى

مەملەكەت باسشىسىنىڭ كومەكشىسى ەرلان قارين «جانۋارلارعا جاۋاپكەرشىلىكپەن قاراۋ تۋرالى» زاڭ جوباسىنىڭ ماجىلىستە قارالۋىنا قاتىستى پىكىر ءبىلدىردى، دەپ حابارلايدى Egemen.kz.

«بۇگىن ماجىلىستە «جانۋارلارعا جاۋاپكەرشىلىكپەن قاراۋ تۋرالى» زاڭ جوباسى ءبىرىنشى وقىلىمدا قابىلداندى. مەملەكەت باسشىسى بىرنەشە رەت، اسىرەسە قوعامدا رەزونانس تۋدىرعان جاعدايلاردان كەيىن جانۋارلارعا قاتىستى قاتىگەزدىككە جول بەرمەۋگە نازار اۋدارعان ەدى. جاڭا زاڭنىڭ قاجەتتىگى تۋرالى قاسىم-جومارت توقاەۆ ءوزىنىڭ 2020 جىلعى جولداۋىندا ايتتى. ول جانۋارلارعا قارىم-قاتىناستى قوعام وركەنيەتىنىڭ ولشەمى دەپ اتادى»، دەپ جازدى ەرلان قارين ءوزىنىڭ Telegram كانالىندا.

پرەزيدەنت كومەكشىسى بۇل ماسەلە ۇلتتىق قوعامدىق سەنىم كەڭەسىنىڭ ءتورتىنشى وتىرىسىندا دا جەكە تالقىلانعانىن ەسكە سالدى. ازىرلەنگەن زاڭ جوباسى مەملەكەتتىك ورگانداردىڭ، پارلامەنتاريلەردىڭ، ۇلتتىق كەڭەس مۇشەلەرىنىڭ جانە ساراپشىلار مەن ازاماتتىق قوعام وكىلدەرىنىڭ بىرلەسكەن جۇمىسىنىڭ ناتيجەسى بولدى.

«زاڭ جوباسىندا جانۋارلارعا قاتىگەزدىكتى ناسيحاتتاۋعا تىيىم سالىنادى، ولاردى باعۋ ەرەجەلەرى ەگجەي-تەگجەيلى جازىلعان. ارنايى نورما جانۋارلاردى قولدانىپ، قاتىگەز ويىن-ساۋىق جاساۋعا تىيىم سالۋعا باعىتتالعان. جانۋارلاردى قورعاۋشىلار بىرنەشە جىل بويى وسى زاڭدى ازىرلەۋگە ارەكەت ەتتى. تۇتاستاي العاندا، بۇل زاڭ جوباسىن قابىلداۋ ازاماتتاردىڭ ەكولوگيالىق مادەنيەتىن كوتەرۋگە ىقپال ەتەتىن بولادى»، دەپ تۇيىندەدى ەرلان قارين.

سوڭعى جاڭالىقتار

ۇقساس جاڭالىقتار