ايماقتار • 23 قازان، 2021

الماتىدا 41 ادامدى الداعان الاياقتار ۇستالدى

280 رەت كورسەتىلدى

الماتىدا ەكى الاياق بوتەن ادامنىڭ قۇجاتى بويىنشا 4 ميلليون تەڭگەدەن استام نەسيە العان. ەكى جىل ىشىندە كۇدىكتىلەر 41 ادامنىڭ تولقۇجات دەرەكتەرى بويىنشا شاعىن نەسيە راسىمدەگەن، دەپ حابارلايدى Egemen.kz.

الماتى قالاسى پوليتسيا دەپارتامەنتىنىڭ ءباسپاسوز قىزمەتى حابارلاعانداي، 26 جاستاعى ەر ادام مەن 27 جاستاعى ايەلدىڭ الاياقتىق ارەكەتتى اشكەرەلەندى. ەرلى-زايىپتىلار الماتىدا تىركەلگەن ميكروقارجى ۇيىمىنا قاتىستى الاياقتىق جاسادى دەگەن كۇدىككە ءىلىندى.

«2019 جىلدان باستاپ ۇستالعاندار تاۋار ساتىپ الۋ ءۇشىن اقشا قاراجاتىن اۋدارۋ سىلتاۋىمەن ينتەرنەت-دۇكەن ساتۋشىلارىنان ولاردىڭ جسن مەن بانك كارتاسىنىڭ دەرەكتەمەلەرىن العاندىعى انىقتالدى. ساتۋشىلاردىڭ تولقۇجات مالىمەتتەرىن پايدالانا وتىرىپ، ولار مقۇ سايتىندا ونلاين رەجيمدە ميكروكرەديت الۋعا ءوتىنىم بەردى. اقشانى العاننان كەيىن ساتۋشىلارمەن قايتادان بايلانىسقا شىعىپ، ولارعا ابايسىزدا اقشا قاراجاتىن اۋدارعانىن حابارلادى جانە ولاردى باسقا بانك كارتاسىنا قايتارۋدى سۇرادى»، دەپ ءتۇسىندىردى الماتى پد باستىعىنىڭ ورىنباسارى پوليتسيا پودپولكوۆنيگى رۋستام ءابدىراحمانوۆ.

تەرگەۋ جۇمىستارى بارىسىندا ەرلى-زايىپتى الاياقتار 41 ادامدى الداعانى انىقتالدى. بارلىق «قارىز الۋشىلاردى» تاپقاننان كەيىن پوليتسيا ولاردىڭ قارىز الۋعا مۇلدە قاتىسپاعاندىعىن انىقتادى.

كۇدىكتىلەرگە قاتىستى قىلمىستىق ءىستى تەرگەۋ ءىس جۇرگىزۋمەن اياقتالدى. ونىڭ ماتەريالدارى ۇكىم شىعارۋ ءۇشىن سوتقا بەرىلدى. كۇدىكتىلەر قاماۋدا.

سوڭعى جاڭالىقتار

ۇقساس جاڭالىقتار