سىبايلاس جەمقورلىققا قارسى ءىس-قيمىل اگەنتتىگى اتىراۋ وبلىستىق دەپارتامەنتى باسشىسىنىڭ ءبىرىنشى ورىنباسارى ايدوس مامىتتىڭ ايتۋىنشا, بيىلعى 9 ايدا قۇقىق قورعاۋ ورگاندارىندا 18 دەرەك انىقتالعان.
«بۇگىن, 21 قازاندا اتىراۋ قالالىق №2 سوتىنىڭ ۇكىمىمەن اتىراۋ وبلىستىق مامانداندىرىلعان كۇزەت قىزمەتى باسقارماسى باستىعىنىڭ ورىنباسارى ءوزىنىڭ قاراۋىنداعى قىزمەتكەرلەرىنەن پارا العان ءۇشىن كىنالى دەپ تانىلىپ, 7 جىلعا باس بوستاندىعىنان ايىرىلدى. سوت وتىرىسىنا سوتتالۋشىنىڭ تۋىستارىمەن بىرگە ۇجىمداستارى قاتىستى. مۇنداي شارا سىبايلاس جەمقورلىق قۇقىق بۇزۋشىلىقتارى سالدارىمەن كۇرەستە ماڭىزدى ءرول اتقارادى. سول سەبەپتەن, وبلىستىق سوتپەن اراداعى كەلىسىم نەگىزىندە مەملەكەتتىك قىزمەت ۇجىمدارى ارىپتەستەرىنە قاتىستى قارالاتىن سوت پروتسەستەرىنە قاتىساتىن بولادى. وسىلايشا, مەملەكەتتىك قىزمەتشىلەر اراسىنداعى سىبايلاس جەمقورلىقتى قىسقارتۋدى, ءتىپتى جويۋدى جوسپارلاپ وتىرمىز», دەيدى ايدوس مامىت.
سوت ۇكىمى زاڭدى كۇشىنە ەنگەن جوق.
