ايماقتار • 21 قازان، 2021

اقتاۋدا «Caspian Ports and Shipping – 2021» II حالىقارالىق كونفەرەنتسياسى وتۋدە

31 رەت كورسەتىلدى

2021 جىلعى 19-21 قازاندا اقتاۋ قالاسىندا كاسپي ءوڭىرىنىڭ كولىك-كوممۋنيكاتسيالىق كەشەنىن دامىتۋ پەرسپەكتيۆالارىنا ارنالعان «Caspian Ports and Shipping – 2021» II حالىقارالىق كونفەرەنتسياسى وتۋدە، دەپ جازادى Egemen.kz.

فورۋمعا قر يندۋستريا جانە ينفراقۇرىلىمدىق دامۋ ۆيتسە-ءمينيسترى رۋسلان بايميشەۆ قاتىسىپ، مينيستر بەيبىت اتامقۇلوۆتىڭ اتىنان قۇتتىقتاۋىن جەتكىزدى.

كونفەرەنتسياعا الەمدىك دەڭگەيدەگى كولىك جانە لوگيستيكا سالاسىنداعى 80-نەن استام ءتۇرلى ۇيىم وكىلدەرى، ەۋروپالىق وداقتىڭ 11 ەلشىسى، ونىڭ ىشىندە بەلگيا، بولگاريا، حورۆاتيا، فينليانديا، گەرمانيا، لاتۆيا، رۋمىنيا، يسپانيا، ەستونيا، نيدەرلاندى ەلشىلەرى، كاسپي ماڭى ەلدەرى مەن تۇركيانىڭ كونسۋلدارى، سونداي-اق ترانسكاسپي حالىقارالىق كولىك باعدارىنىڭ مۇشەلەرى قاتىستى.

كونفەرەنتسيادا كاسپي وڭىرىندەگى ساۋدا سۇرانىسى، كولىك سالاسىنا ينۆەستيتسيا سالۋ پەرسپەكتيۆالارى، جۇك اعىندارىن كونتەينەرلەۋ، ينفراقۇرىلىمدى تسيفرلاندىرۋ، «جاسىل ەكونوميكانى» دامىتۋ ماسەلەلەرى تالقىلاندى.  

فورۋم اياسىندا اقتاۋ جانە قۇرىق تەڭىز پورتتارىنا بارۋ ۇيىمداستىرىلىپ، ءىس-شاراعا قاتىسۋشىلار پورتتاردىڭ قۋاتىمەن جانە ولاردى دامىتۋ پەرسپەكتيۆالارىمەن تانىستى.

بيىلعى 9 ايدا وسى پورتتار ارقىلى 4،1 ملن.توننا جۇك تيەلىپ، وتكەن جىلدىڭ سايكەس كەزەڭىمەن سالىستىرعاندا استىقتى اۋىستىرىپ تيەۋدە 50%-عا وڭ ديناميكا بايقالادى. (2021 جىلى 9 ايدا - 1،1 ملن. توننا، 2020 جىلدىڭ 9 ايىندا – 733 مىڭ توننا). سونداي-اق كونتەينەرلەر تيەۋ - 24% (2021 جىلدىڭ 9 ايىندا - 29،6 مىڭ جفە، 2020 جىلدىڭ سايكەس كەزەڭىندە - 23،8 مىڭ جفە) ارتتى.

بۇگىنگى تاڭدا كاسپي باعىتىنداعى كولىك قاتىناسىن دامىتۋدىڭ باسىم مىندەتتەرىنىڭ ءبىرى - تەڭىز پورتتارى مەن وتاندىق ساۋدا فلوتىن دامىتۋ، ونىڭ ىشىندە اقتاۋ پورتى بازاسىندا «كونتەينەرلىك حاب» قۇرۋ. 2025 جىلعا قاراي كونتەينەر اعىنى جىلىنا شامامەن 100 مىڭ جفە ارتادى دەپ بولجانىپ وتىر.  

جالپى كاسپي فورۋمى مەملەكەت پەن بيزنەستىڭ كوپجوسپارلى قارىم-قاتىناسى مەن ازيا مەن ەۋروپا اراسىنداعى كولىك قاتىناسىن ودان ءارى دامىتۋ ءۇشىن سىندارلى ۇسىنىستار ازىرلەيتىن الاڭعا اينالادى.

سوڭعى جاڭالىقتار

دجەرۆونتا دەۆيس جەڭىل سالماقتى تاڭدادى

كاسىپقوي بوكس • بۇگىن، 17:45

ۇقساس جاڭالىقتار