«دەمەۋ» الەۋمەتتىك جوباسى دەنساۋلىق ساقتاۋ, قۇقىقتىق جانە پسيحولوگيالىق كومەك سالاسىندا حالىقتى قولداۋعا باعىتتالعان. ونى جۇزەگە اسىرۋ بارىسىندا پسيحولوگتەردەن, دارىگەر-تەراپەۆتەردەن جانە زاڭگەرلەردەن تۇراتىن 60 باستاماشىل توپ اۋىل تۇرعىندارىن مەملەكەتتىك باعدارلامالار جونىندە اقپاراتتاندىرىپ, ءاربىرى ءۇش نەمەسە ودان دا كوپ اۋىلداردا 300 كونسۋلتاتسيا وتكىزەدى. ازاماتتىق باستامالاردى قولداۋ ورتالىعىنىڭ مەملەكەتتىك گرانتتىق قارجىلاندىرۋ جونىندەگى جوبالىق كەڭسەسىنىڭ ديرەكتورى جاسۇلان بيسەمباەۆتىڭ ايتۋىنشا, بۇل رەتتە ەڭ الدىمەن, ۇەۇ-نىڭ الەۋەتىن مەملەكەتتىك باعدارلامالاردى اۋىلدىقتارعا تۇسىنىكتى تىلدە جەتكىزۋ ناۋقانىنا تارتۋعا باسا نازار اۋدارىلىپ وتىر. ول سونىمەن بىرگە اۋىل-ايماقتاردا كاسىپكەرلىكتى دامىتۋعا سەرپىن بەرەتىن بولادى.
«بۇل – وتە ماڭىزدى جوبا. مەملەكەت باسشىسىنىڭ قازاقستان حالقىنا سوڭعى جولداۋىندا قويعان مىندەتتەرمەن ۇيلەسەدى. جوبانىڭ يدەياسى نەدە؟ مەملەكەت ەڭ ءبىرىنشى كەزەكتە حالىقتى الەۋمەتتىك تۇرعىدا قولداۋعا مىندەتتەلگەن ءارتۇرلى مەملەكەتتىك باعدارلامالاردى ىسكە اسىرىپ جاتىر. الايدا ءىس جۇزىندە حالىق, وكىنىشكە قاراي, بەلگىلى ءبىر مەملەكەتتىك باعدارلاماعا قاتىسا الارلىق مۇمكىندىكتەرى تۋرالى بىلمەيدى. كوپ جاعدايدا باعدارلامالار «بيۋروكراتيالىق», ىسكەرلىك تىلدە جازىلاتىندىقتان كوپ ادام تۇسىنە بەرمەيدى. سول سەبەپتى كوممۋنيكاتسيانى جاقسارتۋدا, ۇعىمدىق اقپاراتتى كوتەرۋدە ۇكىمەتتىك ەمەس سەكتوردىڭ الەۋەتىن تارتۋدىڭ ۇلكەن مۇمكىندىگى بارىنا كوز جەتكىزدىك. سەبەبى ۇەۇ – ءدال سول ادامدار مەن قوعامدىق ۇيىمدار, بىراق ولار بەلسەندىرەك, ازاماتتار بەلگىلى ءبىر مەملەكەتتىك باعدارلامانىڭ الەۋەتىن تۇسىنىكتى تىلدە ءتۇسىندىرىپ بەرە الادى. سەبەبى مەملەكەتتىك باعدارلامالاردىڭ وراسان كوپ بولىگى اۋىل شارۋاشىلىعىن دامىتۋعا, اگروسەكتوردى قولداۋعا, سۋبسيديا الۋعا, اۋىلدا ءارتۇرلى جوبالاردى قوسىمشا قارجىلاندىرۋعا باعىتتالعان. «دەمەۋ» اۋىلداعى كاسىپكەرلىك باستامالاردىڭ ءتيىمدى ءارى وڭدى وسىمىنە اينالار دەگەن سەنىمدەمىز», دەيدى ج.بيسەمباەۆ.
سونىمەن قاتار, ازاماتتىق باستامالاردى قولداۋ ورتالىعىنىڭ مەملەكەتتىك گرانتتىق قارجىلاندىرۋ جونىندەگى جوبالىق كەڭسە ديرەكتورىنىڭ ايتۋىنشا, «دەمەۋ» جوباسى دەنساۋلىق دەڭگەيىنە جانە اۋىل حالقىنىڭ جالپى پسيحولوگيالىق كورسەتكىشتەرىنە وڭ اسەر ەتۋى مۇمكىن.
«جوبانىڭ ەكىنشى كومپونەنتى مەديتسينامەن بايلانىستى. كوروناۆيرۋس ينفەكتسياسى تاراعان قازىرگى كۇردەلى كەزەڭدە ادامدار قورعانۋ, ۆاكتسينالاۋ, شەكتەۋ شارالارىنا بايلانىستى ماسەلەلەر بولىگىندە قاجەتتى كونسۋلتاتسيالاردى الۋ ارقىلى ءوز-وزدەرىن قاۋىپتەن قورعاي الادى. بۇل كونسۋلتاتسيالار حالىقتىڭ دەنساۋلىعىنا وڭ اسەر ەتەدى. تاعى ءبىر ماڭىزدى باعىتتاردىڭ ءبىرى – پسيحولوگيالىق دەنساۋلىق. بۇگىنگى تاڭدا مەملەكەت تە, ۇكىمەتتىك ەمەس سەكتور دا حالىقتىڭ پسيحولوگيالىق دەنساۋلىعىنا كوبىرەك نازار اۋدارادى. بۇل – تەحنولوگيالىق جاھاندىق دامۋدا وتە ماڭىزدى ءسات. اڭگىمەنىڭ ءبارى الەۋمەتتىك جەلىلەردە ايتىلادى, وففلاين كوممۋنيكاتسيا ازايىپ كەتتى, مۇنىڭ ارتى جاقسىلىققا اپارماۋى مۇمكىن. ءسۋيتسيدتىڭ, اتاپ ايتقاندا, بالالاردىڭ ءوز-وزىنە قول جۇمساۋىنىڭ ەلدەگى قىلمىستىڭ جيىلەۋى دە سودان. مۇنىڭ ءبارى پسيحولوگيا ماسەلەلەرىمەن بايلانىستى تۇلعاارالىق قاتىناستارعا بايلانىستى. بۇل جوبا ءوزىنىڭ وڭ اسەرىن تيگىزەدى دەپ ۇمىتتەنەمىز», دەيدى ول.
«دەمەۋ» جوباسىمەن از قامتىلعان ازاماتتارعا ماتەريالدىق جانە گۋمانيتارلىق كومەك كورسەتۋ ءۇشىن كاسىپكەرلەردى, قايىرىمدىلىق قورلارىن تارتۋ كوزدەلەدى. جوبا 2021 جىلدىڭ سوڭىنا دەيىن جۇزەگە اسىرىلادى. ج.بيسەمباەۆتىڭ ايتۋىنشا, تابىستى ناتيجەلەرگە قول جەتكەن جاعدايدا جوبانى جالعاستىرۋعا مۇمكىندىك بار.
«بۇل جوبامەن ەلىمىزدىڭ بارلىق ءوڭىرىن قامتيمىز. كەم دەگەندە 180 ەلدىمەكەن قامتىلادى. «دەمەۋ» ىسكە اسىرۋدىڭ بەلگىلى ءبىر نىسانى بولادى. ەگەر ءساتتى بولسا, ونى جۇزەگە اسىرۋدى ابقو قىزمەتى شەڭبەرىندە جالعاستىرۋعا نەمەسە وڭىرلىك دەڭگەيلەردە ىسكە اسىرۋعا ۇسىنۋعا بولادى. بۇل جوبانى قولداۋعا مۇددەلى باسقا دا ۇيىمدار بولۋى مۇمكىن», دەدى مەملەكەتتىك گرانتتىق قارجىلاندىرۋ جونىندەگى جوبالىق كەڭسەنىڭ ديرەكتورى.
